ކުޅިވަރު / ޚަބަރު

އެމްއެންޔޫގެ އަހަރީ ދުވަސް ފާހަގަކުރުމަށް "އެމްއެންޔޫ މެރެތަން" ބޭއްވުމަށް ނިންމައިފި

އެމްއެންޔޫގެ އަހަރީ ދުވަސް ފާހަގަކުރުމަށް "އެމްއެންޔޫ މެރެތަން" ބޭއްވުމަށް ނިންމައިފި

އެމްއެންޔޫގެ ފަރާތުން ބޭއްވުނު ހިނގާލުމެއް ފޮޓޯ: ސަން

އާމިނަތު ޔުމްނާ

އާމިނަތު ޔުމްނާ

02 ޑިސެމްބަރު 2024، 12:20

02 ޑިސެމްބަރު 2024، 12:20

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ)ގެ 51 ވަނަ އަހަރީ ދުވަސް ފާހަގަކުރުމުގެ ގޮތުން "އެމްއެންޔޫ މެރެތަން" ގެ ނަމުގައި އަހަރީ މެރެތަނެއް ބޭއްވުމަށް  އެ ޔުނިވަރސިޓީން ވަނީ ނިންމާފައެވެ. މި މެރެތަން ބޭއްވުމުގެ މައިގަނޑު މަޤްޞަދަކީ ދުޅަހެޔޮ ޞިއްޙަތެއްގައި ދިރިއުޅުން ބައްޓަންކުރުމަށް ޔުނިވަރސިޓީގެ ދަރިވަރުންނާއި މުވައްޒަފުންނަށް އަދި މުޅި މުޖުތަމަޢުއަށް ހިތްވަރު ދިނުމެވެ.

އެމްއެންޔޫ މެރެތަން ބޭއްވުމަށް ހަމަޖެހިފައިވަނީ 2025 ވަނަ އަހަރުގެ ފެބްރުއަރީ 20 އާއި 21 އާ ދެމެދު ހުޅުމާލޭ ސެންޓްރަލް ޕާކު ސަރަޙައްދުގައެވެ. މި މެރެތަންގައި އެކި އުމުރުފުރާތަކަށް އަމާޒުކޮށްގެން އެކި ދިގުމިނުގެ ރޭސްތައް ހިމެނެއެވެ.

މެރެތަންގެ ހަރަކާތްތައް ފެށުމަށް ހަމަޖެހިފައިވަނީ ފެބްރުއަރީ 20 ވާ ބުރާސްފަތި ދުވަހުގެ ހަވީރު 5:00 ގައި 7 އަހަރާއި 14 އަހަރާ ދެމެދުގެ ކުޑަކުދިންނަށް ޚާއްޞަކޮށްގެން ބާއްވާ 2 ކިލޯމީޓަރުގެ "ކިޑްސް ޑޭޝް" ރޭހުންނެވެ. މީގެ އިތުރުން، ފެބްރުއަރީ 21 ގައި 42.2 ކިލޯމީޓަރުގެ ފުލް މެރެތަން، 21.1 ކިލޯމީޓަރުގެ ހާފް މެރެތަން، 10 ކިލޯމީޓަރު އަދި 5 ކިލޯމީޓަރުގެ ރޭސްތައް ބޭއްވުމަށް ވަނީ ހަމަޖެހިފައެވެ.

މި މެރެތަންގައި ބައިވެރިވާ ދުވުންތެރިންނަށް ބޮޑެތި ފައިސާގެ އިނާމުތަކެއް ކަނޑައަޅާފައިވެއެވެ. މިގޮތުން، ފުލް މެރެތަންގެ އެންމެ މޮޅު ތިން ފިރިހެން އަދި ތިން އަންހެން ދުވުންތެރިންނަށް 10,000 ރުފިޔާގެ އިނާމު ލިބޭނެއެވެ. އަދި ހާފް މެރެތަން، 10 ކިލޯމީޓަރު އަދި 5 ކިލޯމީޓަރުގެ ރޭސްތަކުގައިވެސް އެކި މިންވަރުގެ ފައިސާގެ އިނާމުތައް ކަނޑައަޅާފައިވެއެވެ.

މެރެތަންގައި ބައިވެރިވާން ބޭނުންވާ ފަރާތްތަކަށް އޮންލައިންކޮށް ރަޖިސްޓަރީ ކުރެވޭނެ އިންތިޒާމު ހަމަޖައްސާފައިވާ ކަމަށް އެމްއެންޔޫއިން މަޢުލޫމާތު ދީފައިވެއެވެ. އަދި ރޭސް ކިޓް ދޫކުރުމަށް ފެބްރުއަރީ 15 އިން 19 އަށް އެކްސްޕޯއެއް ބޭއްވުމަށްވެސް ވަނީ ހަމަޖެހިފައެވެ.

އެމްއެންޔޫއިން ބުނެފައިވަނީ މި މެރެތަނަކީ ތަފާތު އަދި ޖޯޝުގަދަ ހަރަކާތަކަށް ވާނެ ކަމަށާއި، ވީހާވެސް ގިނަ ބައެއްގެ ބައިވެރިވުން މި ހަރަކާތުގައި އެދޭ ކަމަށެވެ. މި މެރެތަން ބޭއްވުމަކީ ދުޅަހެޔޮ ޞިއްޙަތަކަށް ހިތްވަރުދިނުމުގެ އިތުރުން، އެމްއެންޔޫގެ އަހަރީ ދުވަސް ފާހަގަކުރުމުގެ ޚާއްޞަ ގޮތެއް ކަމުގައި ވެގެންދާނެއެވެ.

މެރެތަންގެ ސަލާމަތީ ކަންކަމަށް ޚާއްޞަ ސަމާލުކަމެއް ދީފައިވާކަން ފާހަގަކުރެވެއެވެ. މިގޮތުން، ރޭސް ކުރިއަށްދާއިރު މެޑިކަލް އެހީތެރިކަމަށް އަދި އިމަރޖެންސީ ޙާލަތްތަކަށް އެމްއެންޔޫގެ މެޑިކަލް ޓީމަކާއި އެމްބިއުލަންސްގެ ޚިދުމަތް ތައްޔާރީ ޙާލަތުގައި ބެހެއްޓުމަށް ވަނީ ހަމަޖެހިފައެވެ.

5 ކިލޯމީޓަރުގެ ރޭސް ބޭއްވުމަށް ހަމަޖެހިފައިވަނީ ކަމާބެހޭ މުއައްސަސާތަކުގެ މަޝްވަރާއާއި ހުއްދައާއެކު ކަނޑައަޅާ ވަކި ލޫޕެއްގައި ކަމަށް އެމްއެންޔޫއިން ބުނެފައިވެއެވެ. މިއީ ދުވުންތެރިންގެ ސަލާމަތާއި ރައްކާތެރިކަމަށް އިތުރު ސަމާލުކަމެއް ދިނުމުގެ ގޮތުން އެޅޭ ފިޔަވަޅެއް ކަމަށް ބެލެވެއެވެ.

މި މެރެތަނަކީ އެމްއެންޔޫގެ އަހަރީ  އަހަރީ ދުވަސް ފާހަގަކުރުމުގެ އިތުރުން، މުޅި މުޖުތަމަޢުގައި ދުޅަހެޔޮ ދިރިއުޅުމެއް އާލާކުރުމަށް ބާރުއަޅާ މުހިންމު ހަރަކާތަކަށް ވެގެންދާނެ ކަމަށް އުންމީދު ކުރެވެއެވެ. މީގެ އިތުރުން، މި ފަދަ ބޮޑު ސްޕޯޓްސް އިވެންޓެއް ބޭއްވުމަކީ ރާއްޖޭގެ ކުޅިވަރުގެ ދާއިރާއަށް ކުރިއެރުމެއް ގެނެސްދޭނެ ކަމެއް ކަމަށްވެސް ބެލެވެއެވެ.

އެމްއެންޔޫ މެރެތަންގައި ބައިވެރިވުމަށް ޝައުޤުވެރިވާ ފަރާތްތަކަށް އޮންލައިންކޮށް ރަޖިސްޓަރީ ކުރެވޭނެ ލިންކު އެމްއެންޔޫއިން ވަނީ ޢާންމުކޮށްފައެވެ. އަދި އިތުރު މަޢުލޫމާތު ހޯދުމަށް އެމްއެންޔޫގެ ވެބްސައިޓަށް ނުވަތަ ސޯޝަލް މީޑިއާ ޕްލެޓްފޯމްތަކަށް ޒިޔާރަތްކުރުމަށް ވަނީ އެދިފައެވެ.

މި މެރަތަންގައި ބައިވެރިވާން ބޭނުންވާ ފަރާތްތަކަށް https://races.3000tfg.com/product/mnu-marathon-2025/ މި ލިންކު މެދުވެރިކޮށް ބޭނުންވާ ރޭހެއް ޚިޔާރު ކުރެވޭނެއެވެ.
 

 


                    

މި ލިޔުން ކިޔާލުމުން

Ads by MSS