ރައްޔިތުންގެ މަޖިލީހުގެ އިސް މަޤާމުތަކަށް ދެވަނަ ދައުރަކަށް ޢައްޔަންކުރެވުނު ބޭފުޅުން މަޤާމާ ހަވާލުވެއްޖެ

ރައްޔިތުންގެ މަޖިލީހުގެ އަމީންއާންމާއި، ކައުންސެލް ޖެނެރަލް އަދި ސާޖަންޓް އެޓް އަރމްސްގެ މަޤާމުގައި ތިއްބެވި ބޭފުޅުން އިތުރު ދައުރަކަށް މަޤާމާ ހަވާލުވެވަޑައިގެންފިއެވެ. މި ބޭފުޅުން އަލުން މަޤާމުތަކާ ހަވާލުވެވަޑައިގެންނެވީ މިދިޔަ ހަފުތާގައި މަޖިލީހުން އެ މަޤާމުގައި ތިއްބެވި ބޭފުޅުން އިތުރު ދައުރަކަށް ޢައްޔަންކުރުމަށް ފާސްކުރުމާ ގުޅިގެންނެވެ.

ރައްޔިތުންގެ މަޖިލީހުގެ ގަވާއިދުގައިވާ ގޮތުން، އަލަށް އެކުލަވާލާ ކޮންމެ މަޖިލީހެއް އިންތިޚާބުވެ މަސައްކަތް ފެށުމަށްފަހު، ހިނގާ ފުރަތަމަ ދެ ދައުރު ނިމުމުގެ ކުރިން އަމީން އާންމާއި ކައުންސެލް ޖެނެރަލް އަދި ސާޖެންޓް އެޓް އަރމްސްގެ މަޤާމަށް ބޭފުޅަކު ޢައްޔަން ކުރަން ޖެހެއެވެ. މި ގަވާއިދުގެ ދަށުން، ރައްޔިތުންގެ މަޖިލީހުގެ ރިޔާސަތުން ވަނީ މިހާރުވެސް އެ މަޤާމުތަކުގައި ތިއްބެވި ބޭފުޅުންގެ މަޤާމުގެ މުއްދަތު އިތުރު ދައުރަކަށް ދެމެހެއްޓުމަށް ވޯޓަށް އަހާފައެވެ.

މަޖިލީހުން ވަނީ އަމީންއާންމުގެ މަޤާމުގައި މިހާރުވެސް ހުންނެވި ފާތިމަތު ނިއުޝާ އެ މަޤާމަށް އައްޔަންކުރުމަށް ވޯޓުގައި ބައިވެރިވި މެންބަރުންގެ އިއްތިފާޤުން ފާސްކުރައްވާފައެވެ. އަދި ކައުންސެލް ޖެނެރަލްގެ މަޤާމުގައި މިހާރުވެސް ހުންނެވި ފާތިމަތު ފިލްޒާވެސް އެ މަޤާމަށް އަލުން އައްޔަންކުރުމަށް ފާސްކުރައްވާފައިވާއިރު، ސާޖަންޓް އެޓް އަރމްސް ކަމަށް އެ މަޤާމުގައިވެސް ކުރިން ހުންނެވި މޭޖަރ (ރޓޑ) ޠަލްޙަތު ޙަސަން ވަނީ ހަމަޖައްސަވާފައެވެ.

އަމީން އާންމާއި، ކައުންސެލް ޖެނެރަލާއި، ސާޖެންޓް އެޓް އަރމްސްގެ މަޤާމުގެ މުއްދަތަކީ ފަސް އަހަރު ދުވަހެވެ. މަޖިލީހުގެ ގަވާއިދުގައިވާ ގޮތުން ރައްޔިތުންގެ މަޖިލީހުގެ ރައީސް އާއި ނައިބު ރައީސަށްފަހު، މަޖިލީހުގައި އެންމެ އިސް ބޭފުޅަކަށް ހުންނަވާނީ އަމީން އާންމެވެ. ކައުންސިލް ޖެނެރަލްއަކީ، ރައްޔިތުންގެ މަޖިލީހުގެ އަމީންއާންމުގެ މަޤާމާ ޖެހިގެން ދެ ވަނައަށް އެންމެ އިސްވެރިޔާއެވެ.

ރައްޔިތުންގެ މަޖިލީހުގެ އަމީން ޢާންމު އަލްއުސްތާޛާ ފާޠިމަތު ނިޔުޝާ، ކައުންސެލް ޖެނެރަލް އަލްއުސްތާޛާ ފާޠިމަތު ފިލްޒާ އަދި ސާޖަންޓް އެޓް އާމްސް މޭޖަރ (ރޓޑ) ޠަލްޙަތު ޙަސަން އަހުދުގެ ލިޔުމުގައި ސޮއިކުރެއްވުން pic.twitter.com/UiUB5fmggj

— People's Majlis (@mvpeoplesmajlis) December 2, 2024