ސައުދީގެ އަރާމްކޯ ތެޔޮ މަރުކަޒުތަކަށް ހަމަލާދޭނެ ކަމުގެ އިންޒާރު ހޫތީންދީފި

ޔަމަނުގެ ސަންޢާ އިން ޔޫސުފް މައުރީ ރިޕޯޓްކޮށްފައިވާ ގޮތުގައި، ޔަމަނަށް ކުރިމަތިކޮށްފައިވާ ބަންދު ނުވަތަ ބުލޮކޭޑް އުވައިނުލައިފިނަމަ ސައުދީ އަރަބިއްޔާގެ އަރާމްކޯ ތެޔޮ މަރުކަޒުތަކަށް ހަމަލާދޭނެ ކަމުގެ އިންޒާރެއް ހޫތީން ދީފިއެވެ.

ހޫތީން ނެރުނު ބަޔާނެއްގައި ބުނެފައިވަނީ، ދާދި ފަހުން އެ ޖަމާއަތުން ދިން ހަމަލާތަކުގައި ދެ އުޅަނދަކަށް އަމާޒުކޮށްފައިވާ ކަމަށެވެ. މީގެ ތެރެއިން އެއް އުޅަނދަށް ޑްރޯން ހަމަލާއެއް ދީފައިވާއިރު، އަނެއް އުޅަނދަށް ހަމަލާދީފައިވަނީ ކްރޫޒް މިސައިލަކުންނެވެ.

ހޫތީންނާއި އިނގިރޭސި މެރިޓައިމް އިދާރާތަކުން ކަށަވަރުކޮށްދޭ ގޮތުގައި، ހަމަލާދިން އެއް އުޅަނދުގެ މަތީ ފަންގިފިލާގައި ވަނީ އަލިފާން ރޯވެފައެވެ. ނަމަވެސް، އުޅަނދުގެ ބަނޑުފިލައަށް ހަމަލާ އަމާޒުނުވުމުގެ ސަބަބުން އެ އުޅަނދު އަޑިއަށް ގޮސްފައެއް ނުވެއެވެ. ހޫތީން ދެ އުޅަނދަށް ހަމަލާ އެރި ކަމަށް ބުނި ނަމަވެސް، އިނގިރޭސި އިދާރާތަކުން ބުނަނީ ދެވަނަ އުޅަނދު ވަނީ މިސްރާބު ބަދަލުކޮށް ސުއޭޒް ކެނަލާ ދިމާލަށް ދަތުރު ފަށާފައި ކަމަށެވެ.

މި ހަމަލާތަކާ ގުޅިގެން ބާބުލް މަންދަބު ހުރަސްކުރަން އުޅުނު ގާތްގަނޑަކަށް 10 އުޅަނދެއް ވަނީ މަގު ބަދަލުކުރަން މަޖުބޫރުވެފައެވެ. މީގެ ސަބަބުން އެ އުޅަނދުތަކަށް އެފްރިކާ ވަށާލާފައި ކޭޕް އޮފް ގުޑް ހޯޕް މަގުން ވަރަށް ދިގު ދަތުރެއް ކުރަން ޖެހޭނެއެވެ. ހަމަލާ އަމާޒުވި ދެ އުޅަނދަކީ އިންޑިއާއާއި ޗައިނާއަށް ދަތުރުކުރަމުންދިޔަ އުޅަނދުތަކެކެވެ.

ހޫތީން މި ހަރަކާތް ސިފަކުރަނީ "ބަންދަކަށް ބަންދެއް" (blockade for a blockade) ގެ ގޮތުގައެވެ. އަދި ސައުދީ އަރަބިއްޔާއިން ޔަމަނަށް ކުރިމަތިކޮށްފައިވާ ބަންދު ނުވަތަ ބުލޮކޭޑް  އުވައިނުލައިފިނަމަ، ބާބުލް މަންދަބު ހުރަސްނުކުރި ނަމަވެސް ސައުދީގެ ތެޔޮ ޓޭންކަރުތަކަށް ހަމަލާދޭނެ ކަމަށް އެ ޖަމާއަތުން ބުނެއެވެ. މީގެ މާނައަކީ ސުއޭޒް ކެނަލް މަގުން ދަތުރުކުރާ އުޅަނދުތަކަށްވެސް ނުރައްކާ އޮތުމެވެ.

ހޫތީންގެ މަސްދަރުތަކުން އިތުރަށް ހާމަކޮށްފައިވާ ގޮތުގައި، ޔަމަނުގެ ބަންދު އުވައިނުލާ ކުރިއަށްދާނަމަ، ކުރިއަށް އޮތް ތަނުގައި ސައުދީ އަރާމްކޯގެ ތެޔޮ މަރުކަޒުތަކަކީ ހޫތީންގެ މައިގަނޑު އަމާޒުތަކަށް ވެގެންދާނެއެވެ.