ސްޓޭޓް ފާމާގެ ބޭސްތަކުގެ ތަފްސީލު ބަލާލެވޭނެ ޚާއްސަ ޕޯޓަލްއެއް އަންނަ ސެޕްޓެމްބަރު މަހު އިފްތިތާހު ކުރަނީ

ސްޓޭޓް ފާމާގެ ފާމަސީތަކުން ލިބެން ހުންނަ ބޭސްތަކުގެ މައުލޫމާތާއި، އެ ބޭސްތައް ލިބޭނެ ފާމަސީތައް ފަސޭހަކަމާއެކު ބަލާލެވޭނެ ޚާއްސަ ޕޯޓަލްއެއް އަންނަ ސެޕްޓެމްބަރު މަހު ލޯންޗުކުރުމަށް އެ ކުންފުނިން ނިންމައިފިއެވެ.

މި އައު ޕޯޓަލްއާ ގުޅޭގޮތުން ވާހަކަދައްކަވަމުން ކުންފުނިން ވިދާޅުވީ، މިއީ ރައްޔިތުން ބޭސް ހޯދުމުގައި އުފުލަމުންދާ ތަކުލީފުތަކަށް ދާއިމީ ހައްލެއް ހޯދައިދިނުމުގެ މަގުސަދުގައި ކުރިއަށްގެންދާ މަސައްކަތެއް ކަމަށެވެ. ޚާއްސަކޮށް، ބޭނުންވާ ބޭސް ލިބެން ހުންނަނީ ކޮން ފާމަސީއަކުންކަން ނޭނގުމުގެ ސަބަބުން ގިނަ ބަޔަކު ކަންބޮޑުވުން ފާޅުކުރަމުންދާކަން ކުންފުނިން ވަނީ ފާހަގަކޮށްފައެވެ.

މި ޕޯޓަލް ފަރުމާކުރެވިފައިވަނީ ކޮންމެ ތަނެއްގައި ހުރެގެންވެސް، ފޯނު ނުވަތަ ކޮމްޕިއުޓަރު މެދުވެރިކޮށް ބޭނުންވާ ބޭހުގެ މައުލޫމާތު ހޯދޭނެ ގޮތަށެވެ. އެގޮތުން ބޭސް ލިބެން ހުރި ފާމަސީތަކުގެ އިތުރުން، އެ ބޭހެއް ވިއްކާ އަގުވެސް މި ޕޯޓަލް މެދުވެރިކޮށް ބަލާލެވޭނެއެވެ.

ސްޓޭޓް ފާމާއިން ބުނީ، މި ޚިދުމަތުގެ ސަބަބުން ބޭސް ހޯދުމަށް ފާމަސީތަކަށް ހިނގަންޖެހޭ ވަގުތު ސަލާމަތްވެ، ރައްޔިތުންނަށް ބޮޑު ލުޔެއް ލިބިގެންދާނެ ކަމަށެވެ. އަދި މިއީ ސިއްހީ ދާއިރާ ޑިޖިޓަލައިޒްކޮށް، ޚިދުމަތްތައް އަވަސްކުރުމަށް ސަރުކާރުން ކުރަމުންދާ މަސައްކަތްތަކަށް ލިބިގެންދާ އިތުރު ކުރިއެރުމެއްގެ ގޮތުގައި އެ ކުންފުނިން ދެކެއެވެ.