ކޮޕީރައިޓާ ގުޅޭ ޙައްޤުތައް ހިމާޔަތްކުރުމަށް ޤާނޫނަށް ގެނެވުނު އިސްލާޙު މަޖިލީހުން ފާސްކޮށްފި

ރައްޔިތުންގެ މަޖިލީހުން އިއްޔެ ބޭއްވި ޖަލްސާގައި ކޮޕީރައިޓާއި އެއާގުޅޭ އެހެނިހެން ޙައްޤުތަކުގެ ޤާނޫނަށް ހުށަހެޅުނު އިސްލާޙު ފާސްކޮށްފިއެވެ. މި އިސްލާޙު ފާސްކުރެވުނީ މަޖިލީހުގެ 57 މެންބަރުންގެ ތާއީދާއެކުއެވެ.

ސަރުކާރުގެ ފަރާތުން މި ބިލު މަޖިލބިލު މަޖިލީހަށް ހުށަހެޅުއްވީ ނިލަންދޫ ދާއިރާގެ މެންބަރު ފާތިމަތު ސައުދާއެވެ. މި އިސްލާޙުގެ މައިގަނޑު މަޤްޞަދަކީ ކޮޕީރައިޓުގެ ހިމާޔަތްލިބިދޭ އުފެއްދުންތަކާއި ކޮޕީރައިޓާގުޅޭ ޙައްގުތަކާއި ކަންކަން އިތުރަށް ތަފްޞީލުކޮށް، ކޮޕީރައިޓަޑް އުފެއްދުންތައް ބޭނުންކުރެވޭނެ އިތުރު ހާލަތްތައް ބަޔާންކުރުމެވެ.

މި އިސްލާޙުގެ ދަށުން، ދިވެހިރާއްޖޭގެ ސަރަހައްދުގައި އުފައްދާ އަދަބީ އަދި ފަންނީ އުފެއްދުންތަކާއި ޕަފޯމަންސްތަކާއި އަޑުގެ ރެކޯޑިންތަކާއި ބްރޯޑްކާސްޓްތައް ހިމާޔަތްކުރެވިގެންދާނެއެވެ. އަދި ކޮޕީރައިޓުގެ ވެރިފަރާތުގެ ހުއްދަނެތި އެ މީހެއްގެ އުފެއްދުމެއްގެ އަސްލެއް ނުވަތަ ކޮޕީއެއް އުފެއްދުމާއި ފޯރުކޮށްދިނުން މަނާވާނެއެވެ. ނަމަވެސް އުނގަންނައިދިނުމުގެ ބޭނުމުގައި އެފަދަ އުފެއްދުމެއް ހުއްދައާނުލައި ބޭނުންކުރެވިދާނެއެވެ.

މި އިސްލާޙުގެ އެހެން މުހިންމު ބަދަލުތަކުގެ ތެރޭގައި:

• ކޮޕީރައިޓަޑް އުފެއްދުންތަކަށް ހިމާޔަތް ލިބޭ މުއްދަތު 50 އަހަރުން 70 އަހަރަށް އިތުރުކުރުން
  
• ކޮޕީރައިޓުގެ ވެރިފަރާތަށް ކޯޓުގައި ދަޢުވާކުރުމުގެ ޙައްޤު ލިބިދިނުން
  
• ކޮޕީރައިޓުގެ ޙައްޤަށް އަރައިގަތުމުގެ ޢަމަލުތަކަށް 10،000 ރުފިޔާ އާއި 100،000 ރުފިޔާއާ ދެމެދުގެ އަދަދަކުން ބަދަލު ނެގުމުގެ ފުރުޞަތު ދިނުން
  
• ޤާނޫނުގެ ދަށުން ހިމާޔަތްކޮށްދީފައިވާ ޙައްގަކަށް ގަސްތުގައި އުނިކަމެއް އަންނަގޮތަށް އަމަލުކޮށްފިނަމަ 50،000 ރުފިޔާ އާއި 300،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމުގެ ފުރުޞަތު ދިނުން.