ރާއްޖޭގައި 175 މިލިއަން ޑޮލަރުގެ ޓައުންޝިޕް މަޝްރޫއެއް ފަށަނީ

ތާ އައިލެންޑް ކްލަސްޓަރ ސަސްޓެއިނަބަލް ޓައުންޝިޕް" ގެ ނަމުގައި މަޝްރޫއެއްގެ ފަހުމުނާމާގައި ސޮއިކޮށް، އަމަލީ މަސައްކަތްތަކަށް ތައްޔާރުވާން ފަށައިފިއެވެ. 

މި މަޝްރޫއަކީ 175 މިލިއަން އެމެރިކާ ޑޮލަރު (ގާތްގަނޑަކަށް 2.7 ބިލިއަން ރުފިޔާ) ގެ ބޮޑު އިންވެސްޓްމަންޓެކެވެ.

މި މަޝްރޫއު ކުރިއަށް ގެންދިއުމަށް ނިންމާފައިވަނީ ރާއްޖޭގެ ބްލޫ ސިނަޖީ އިންވެސްޓްމަންޓްސްއާއި ލަންޑަނުގެ މަޝްހޫރު ކުންފުންޏެއް ކަމަށްވާ އެމެރަލްޑް ކޯޕަރޭޓްސް ގުޅިގެންނެވެ. މި ދެ ކުންފުނީގެ ދެމެދުގައި މިހާރު ވަނީ މި މަސައްކަތުގެ ރަސްމީ އެއްބަސްވުމުގައި ސޮއިކޮށްފައެވެ.

މި މަޝްރޫއުގެ އެންމެ ފާހަގަކޮށްލެވޭ އެއް ސިފައަކީ މިއީ ތިމާވެއްޓާ ރައްޓެހި، "ސަސްޓެއިނަބަލް" ނުވަތަ ދެމެހެއްޓެނިވި ތަރައްޤީގެ މޮޑެލްއަކަށް ފަރުމާކުރެވިފައިވާ މަޝްރޫއަކަށް ވުމެވެ. އެގޮތުން، މި ޓައުންޝިޕްގައި ބޭނުންކުރާ ހަކަތައިގެ ބޮޑު ބައެއް އިއާދަކުރަނިވި ހަކަތައިން އުފެއްދުމަށް ވަނީ ޚާއްސަ އިސްކަމެއް ދީފައެވެ. "މަލްޓި-އައިލެންޑް ކޮންސެޕްޓް" އަށް ތަރައްޤީކުރާ މި ސަރަހައްދުގައި ދިރިއުޅުމަށް ބޭނުންވާ އެކި ފެންވަރުގެ ބޯހިޔާވަހިކަމުގެ އިތުރުން، ޒަމާނީ ވިޔަފާރި މަރުކަޒުތަކާއި މުނިފޫހިފިލުވުމުގެ ޚިދުމަތްތައް އެންމެ މަތީ ފެންވަރުގައި ލިބެން ހުންނާނެއެވެ.

މި މަޝްރޫއަކީ އަމިއްލަ ފަރާތަކުން ރާއްޖޭގެ އަތޮޅެއްގައި ހިންގާ އެންމެ ބޮޑު އެއް އިންވެސްޓްމަންޓެވެ. ބްލޫ ސިނަޖީ އިންވެސްޓްމަންޓްސްއިން ހާމަކުރި ގޮތުގައި، މި މަޝްރޫއު ނިމުމުން ތ. އަތޮޅުގެ އިގުތިޞާދަށް ދިރުން ލިބި، އެ ސަރަހައްދުގެ ރައްޔިތުންނަށް ގިނަ އަދަދެއްގެ ވަޒީފާގެ ފުރުސަތުތައް ތަނަވަސްވެގެންދާނެއެވެ. މި މަޝްރޫއު އަމަލީގޮތުން ހިންގައި ތަންފީޒު ކުރުމުގެ މުޅި އޮޕަރޭޝަން އިސްކޮށް ބަލަހައްޓަވާނީ ބްލޫ ސިނަޖީގެ މެނޭޖިންގ ޑިރެކްޓަރ މުޙައްމަދު ފަޔާޒެވެ.

ތ. އަތޮޅުގެ އިތުރުން ނ. އަތޮޅުގައިވެސް މިފަދަ ބޮޑު މަޝްރޫއެއް ކުރިއަށްދާކަން އިންވެސްޓް މޯލްޑިވްސްއިން ވަނީ ފާހަގަކޮށްފައެވެ. އެއީ ކްރިސްޓަލް ހޯލްޑިންގްސްއިން ކުރިއަށްގެންދާ 790 މިލިއަން ޑޮލަރުގެ 'އައިލާ ސަސްޓެއިނަބަލް ޓައުންޝިޕް' މަޝްރޫއެވެ.

މިފަދަ އިންވެސްޓްމަންޓްތަކުގެ ސަބަބުން ރާއްޖޭގެ ފަތުރުވެރިކަމާއި އިޖުތިމާއީ ތަރައްޤީ އައު އުސްމިންތަކަކަށް ވާސިލުވާނެ ކަމަށް މުހައްލިލުން ލަފާކުރެއެވެ. މި މަޝްރޫއަކީ ރައީސް ޑރ. މުޙައްމަދު މުއިއްޒުގެ ސަރުކާރުން ރާއްޖޭގެ އަތޮޅުތައް ތަރައްޤީކުރުމަށް ގެންގުޅުއްވާ ސިޔާސަތަށް ލިބިގެންދާނެ ބޮޑު ކުރިއެރުމެކެވެ.