ނިޝާން ޢިއްޒުއްދީން ޢިއްޒަތް، ޗަންޕާ ޙުސެއިން އަފީފަށް އަރުވައިފި

ރާއްޖެއަށް ފަތުރުވެރިކަން ތައާރަފުކޮށްދެއްވި ބާނީންގެ ތެރޭގައި ހިމެނިވަޑައިގަންނަވާ، މއ. ޗަންޕާވިލާ، ޗަންޕާ ޙުސެއިން އަފީފަށް ދިވެހި ދަޢުލަތުގެ މަތިވެރި އިއްޒަތް، ނިޝާން އިއްޒުއްދީންގެ އިއްޒަތުގެ ވެރިކަން އަރުވައިފިއެވެ.

މިނިވަން ދުވަހުގެ ރަސްމީ ޖަލްސާގެ ތެރެއިން ޗަންޕާ ޙުސެއިން އަފީފަށް، މި ލަޤަބު އަރުވާފައިވަނީ  ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. 

ރާއްޖެއަށް ފަތުރުވެރިކަން ތައާރަފުކޮށްދެއްވި އެންމެ އިސް އެއް މޭސްތެރިޔާ، ޗަންޕާ ޙުސެއިން އަފީފް ވަނީ ޤައުމަށް ޚިދުމަތްކުރެއްވުމަށް މިއަދާހަމަޔަށް ދެމިހުންނަވާފައެވެ. އެކަމުގެ އެންމެ ބޮޑު އެއް ހެއްކަކީ، ރާއްޖޭގައި ފަތުރުވެރިކަން ތަރައްގީކުރެއްވުމަށް ޓަކައިކޮށްދެއްވި ދެމެހެއްޓެނިވި މަސައްކަތްޕުޅުތަކެވެ. 

ރާއްޖެއަށް ފަތުރުވެރިކަން ގެނެސްދެއްވި ބާނީންގެ ތެރޭގައި ހިމެނިވަޑައިގަންނަވާ، އިޓަލީގެ މިސްޓަރ ޖޯޖް ކޯބިންއާއި، މަރްޙޫމް މުޙައްމަދު އުމަރުމަނިކާއި، ހ. ހިކިފިނިފެންމާގޭ އަޙްމަދު ނަސީމާއިއެކު، ޙުސެއިން އަފީފް ވަނީ، ފަތުރުވެރިކަމަކީ ރާއްޖޭގައި ކުރިއަށްގެންދެވިދާނެ ސިނާއަތެއްކަން ބެލުމުގެ މަސައްކަތްކުރައްވާފައެވެ.

ރާއްޖެއަށް އެންމެ ފުރަތަމަ ފަތުރުވެރިން ގެންނެވުމުގެ މަސައްކަތް ފެށްޓެވިއިރު، ޙުސެއިން އަފީފް ވަނީ ރިސޯޓު ދާއިރާގެ އެކި މަސައްކަތްތައް ކުރައްވާފައެވެ. އެގޮތުން، ރިސޯޓުގެ ބަދިގޭގައި މަސައްކަތްކުރެއްވުމާއި، ޓުއަރ ގްރޫޕްތަކުގައި މަސައްކަތްކުރެއްވުން، އަދި މެނޭޖްމެންޓްގެ ދާއިރާގައި އެމަނިކުފާނު މަސައްކަތްކުރެއްވިއެވެ. ދިވެހިރާއްޖޭގެ ހޮސްޕިޓާލިޓީ ދާއިރާގައި ވަކި މިނގަނޑުތަކެއް ހިފެހެއްޓުވުމަށް އެމަނިކުފާނުދެއްދި އިސްކަން މިކަމުން ފެނިގެންދެއެވެ.

އެމަނިކުފާނުގެ ތަސައްވުރާ އެއްގޮތަށް ދިވެހިރާއްޖޭގައި ފަތުރުވެރިކަމުގެ ދާއިރާ ކުރިއެރުވުމަށް ކުރެވުނު މަސައްކަތްތަކުގެ ނަތީޖާއަކީ، ރާއްޖޭގައި ފުރަތަމަ ފަހަރަށް އުފެދުނު އިންޓަނޭޝަންލް ހޮސްޕިޓާލިޓީ ބްރޭންޑެވެ. މީގެ އިތުރުން، ތަފާތު ބައިނަލްއަޤްވާމީ މާކެޓްތަކުގައި ދިވެހިރާއްޖޭގެ ފަތުރުވެރިކަން ޕްރޮމޯޓްކުރެއްވުމަށް ޙުސެއިން އަފީފް ގިނަގުނަ މަސައްކަތްތަކެއް ކުރައްވާފައިވާކަން ފާހަގަކޮށްލެވެއެވެ.

ތިމާވެއްޓައި ރައްޓެހި ހަކަތަ ބޭނުންކޮށްގެން 2014 ވަނަ އަހަރުގެ ފަހުކޮޅު ރާއްޖޭގައި ހުޅުވި ދުނިޔޭގެ އެންމެ ފުރަތަމަ ސޯލާ ރިސޯޓް މާލެ އަތޮޅު ގަސްފިނޮޅުގައި ހުޅުއްވުން ވެގެންދިޔައީ، ފަތުރުވެރިކަމުގެ ދާއިރާއަށް އަފީފް ގެންނެވި އިންގިލާބީ ބަދަލަކަށެވެ. މިއީ ރާއްޖޭގެ ފަތުރުވެރިކަމުގެ ދާއިރާގައި ފާހަގަކޮށްލެވޭ މުހިންމު ބަދަލެކެވެ.

ޗަންޕާ ޙުސެއިން އަފީފަކީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑްސްޓްރީ (މަޓީ) އުފެއްދެވި، އެ އެސޯސިއޭޝަނުގެ ފައުންޑިންސް މެންބަރެވެ. އެމަނިކުފާނުވަނީ، އެ އެސީސިއޭޝަނުގެ ޗެއަރމަންކަން ފަދަ މަތީ މަޤާމުތައް ފުރުއްވާފައި ކަމަށްވާއިރު ޙުސެއިން އަފީފް މިހާރު ވެސް ހުންނެވީ މަޓީގެ ޗެއަރމަންކަމުގެ މަޤާމުގައެވެ. މި މަޤާމުގައި ހުންނަވައިގެން އަފީފް ގެންދަވަނީ، ފަތުރުވެރިކަމުގެ ދާއިރާގެ އިސް ފަރާތްތަކާއި އަދި ޤާނޫނު ހަދާ ފަރާތްތަކާއެކު އޮންނަ ގުޅުން ހަރުދަނާކުރުމަށް އެތައް މަސައްކަތްތަކެއް ކުރައްވަމުންނެވެ. 

ފަތުރުވެރިކަމުގެ އިތުރުން، ހޮސްޕިޓާލިޓީގެ ދާއިރާއާއި، އޭވިއޭޝަންގެ ދާއިރާއާއި، ބޭންކިންގްގެ ދާއިރާއާއި، ސިއްޙީ ދާއިރާ ފަދަ ތަފާތު ދާއިރާތަކަށް ވިޔަފާރިވެރިއެއްގެ ހައިސިއްޔަތުން ޙުސެއިން އަފީފް ކޮށްދެއްވާފައިވާ ޚިދުމަތްތަކަކީ ހާއްސަ ގޮތެއްގައި ފާހަގަކޮށްލެވޭ ހިދުމަތްތަކެކެވެ. އެގޮތުން، އަފީފް ވަނީ އައްޑޫ އިންޓަނޭޝަނަލް އެއަރޕޯޓް ތަރައްޤީކުރުމަށް އެހީތެރިވެދެއްވާފައެވެ. އަދި ޓްރީޓޮޕް ހޮސްޕިޓަލް ޤާއިމުކުރައްވާ ހިދުމަތްދެއްވަން ފަށްޓަވާފައިވާއިރު، އެއީ ރާއްޖޭގެ ސިއްހީ ދާއިރާއަށް އިންގިލާބީ ބޮޑު ބަދަލެއް އައި ކަމެއްކަން ފާހަގަކޮށްލެވެއެވެ. އެ 210 އެނދުގެ ޓާޝަރީ ލެވެލްގެ ހޮސްޕިޓަލުގެ ސަބަބުން، މީގެ ކުރިން ނުލިބޭފަދަ ހިދުމަތްތައް ރާއްޖެއިން ލިބެން ފެށިއެވެ. 

ޙުސެއިން އަފީފްގެ ބައްޕަ، އަލިފުޅު ތުއްތުއަށް ނިސްބަތްކުރައްވާ އުފައްދަވާފައިވާ އަލިފުޅު ތުއްތު ފައުންޑޭޝަން (އޭއެޕްޓީއެފް) ގެ ދަށުން، ގިނަ އަދަދެއްގެ ސީއެސްއާރް އަދި މުޖްތަމައަށް ފައިދާވާފަދަ މަޝްރޫއުތަކެއް އެމަނިކުފާނު ކުރިއަށްގެންދަވާފައިވެއެވެ. މި ފައުންޑޭޝަންގެ އެހީގައި ތްއުލީމު ހާސިލުކޮށްފައިވާ ވަރަށް ގިނަ އަދަދެއްގެ ކުދިން މިއަދު ދަނީ ރާއްޖޭގެ އެކި ދާއިރާތަކަށް ހިދުމަތްކޮށްދެމުންނެވެ.

އަފީފްގެ އިސްނެންގެވުމުގެ ދަށުން ރާއްޖޭގެ ބައެއް ރަށްރަށުގައި ފެނާއި ނަރުދަމާގެ ނިޒާމް ޤާއިމުކުރެވިފައިވާކަން ވެސް ފާހަގަކޮށްލެވެއެވެ. މީގެ އިތުރުން އެމަނިކުފާނުގެ ބައިވެރިވެވަޑައިގަތުމާއެކު ރާއްޖޭގައި ކޮމާޝަލް ބޭންކް އޮފް މޯލްޑިވްސް ގާއިމުވެގެން ވަނީ ގޮސްފައެވެ. މި ބޭންކުގެ ސަބަބުން، ދިވެހި ވިޔަފާރިތަކަށް މާލީ ކުރިއެރުންތައް ލިބުމުގެ މަގު ފަހިވެގެން ދިޔައެވެ.  

އަފީފަށް ވަނީ ރާއްޖެއާއި ރާއްޖެއިން ބޭރުގައި ވެސް ފަތުރުވެރިކަމުގެ ދާއިރާއިން އެތައް އެވޯޑެއް ލިބިވަޑައިގަންނަވާފައެވެ. އެގޮތުން، މެދުނުކެނޑި 25 އަހަރު ފަތުރުވެރިކަމަށް ހިދުމަތްކުރައްވާފައިވާތީ ޓުއަރިޒަމް މިނިސްޓްރީން ދެއްވި އެވޯޑާއި، ރާއްޖޭގެ ޓޫރިޒަމަށް 50 އަހަރުފުރުމާއި ގުޅިގެން އަފީފްގެ ހިދުމަތުގެ އަގުވަޒަންކުރައްވާ ދެއްވި ޕްރެޒިޑެންޓްސް ޓޫރިޒަމް ގޯލްޑް އެވޯޑް ހިމެނެއެވެ. އަދި ފަތުރުވެރިކަމުގެ ރޮނގުން އާންމު ހިދުމަތުގެ ހިތްވަރުދިނުމުގެ އިނާމާއި، ފަތުރުވެރިކަމުގެ ރޮނގުން އާންމު ހިދުމަތުގެ ޝަރަފުވެރިކަމުގެ އިނާމު އެމަނިކުފާނަށް ލިބިވަޑައިގެންފައި ވެއެވެ. ނިޝާން މުލީގޭ ޝަރަފުގެ އިއްޒަތް އެމަނިކުފާނަށް އެރުވީ 26 ޖުލައި 2013 ގައެވެ. 

ޗަންޕާ ޙުސެއިން އަފީފަށް، ދިވެހި ދަޢުލަތުގެ މަތިވެރި އިއްޒަތް، ނިޝާން އިއްޒުއްދީންގެ އިއްޒަތުގެ ވެރިކަން އެރުވުމަށް ރައީސުލްޖުމްހޫރިއްޔާ ނިންމެވީ، އެމަނިކުފާނަކީ، ދިވެހި ރައްޔިތުންނަށާއި، ރާއްޖޭގެ އިޤްތިސާދީ ދާއިރާއަށާއި، ފަތުރުވެރިކަމުގެ ދާއިރާ ކުރިއަރުވަން މަސައްކަތްކުރައްވާ، އިޖްތިމާއީ ގޮތުން މުޖްތަމައު ކުރިއެރުވުމަށް މިހާރުވެސް މަސައްކަތްޕުޅުތަކެއް ކުރައްވަމުންގެންދަވާ ބޭފުޅަކަށް ވާތީއެވެ.