ކަންނެތްކަމާއި ޑިޕްރެޝަންގެ ތަފާތު ދެނެގަންނާނީ ކިހިނެއް؟

މިއީ ތިބާއަށް އަބަދު ކުރިމަތިވާ އާދައިގެ ކަމެއް ހެއްޔެވެ؟ އެލާމްގެ އަޑަށް ހޭލެވުނު ނަމަވެސް، އެނދުން ތެދުވެ ބިމުގައި ފައި ޖައްސާލުމަކީ ވެސް ކުރެވޭނެ ކަމެއް ކަމަށް ގަބޫލެއް ނުކުރެވެއެވެ. މިއީ ހަމައެކަނި ވަރުބަލިވުމެއް ނޫނެވެ. މުޅި އިންސާނާގެ ހަރަކާތްތައް "ހުއްޓުމަކަށް" އައީއެވެ. ހިތަށް އަރަނީ ހަމައެކަނި ރަޖާގަނޑުގެ ނިވަލުގައި އޮވެ، ފޯނަށް އަންނަ މެސެޖުތަކަށް ވެސް ޖަވާބު ނުދެވޭ ހާލު، މުޅި ދުނިޔެ ތިބާއާ ނުލައި އެނބުރެން ދޫކޮށްލުމަށެވެ.

ދިރިއުޅުމުގެ ބުރަދަނާއި، ވަޒީފާގެ ފިއްތުންތަކާއި، ގުޅުންތައް ދެމެހެއްޓުމުގައި ހުންނަ ގޮންޖެހުންތަކުގެ ސަބަބުން، މަދުން ނަމަވެސް މިފަދަ އިހުސާސްތައް ކުރެވުމަކީ އާދައިގެ ކަމެކެވެ. ސިކުނޑިއާއި ހަށިގަނޑަށް އަރާމު ބޭނުންވާ ވަގުތުތައް އަންނާނެއެވެ. ނަމަވެސް، އަދުގެ މުޖުތަމައު ބިނާވެފައިވަނީ އަބަދުވެސް "މަސައްކަތްކުރުމާއި އުފެއްދުންތެރިވުމުގެ" މައްޗަށެވެ. އަބަދު ކޮންމެވެސް ކަމެއްގައި މަޝްޣޫލުވެގެން ނޫޅޭ ނަމަ، ތިބާއަކީ "ކަންނެތް" މީހެއްގެ ގޮތުގައި ބަލަން ފަށައެވެ. މިފަދަ އިޖުތިމާއީ ފިއްތުންތަކުގެ ސަބަބުން، ގިނަ ބަޔަކު އަމިއްލައަށް ގަބޫލުކުރަން ފަށަނީ އެމީހުންނަކީ ކަންނެތް ބައެއް ކަމަށެވެ. އެކަމަކު ހަގީގަތަކީ އެމީހުން އެ ތަހައްމަލު ކުރަނީ ނަފްސާނީ ގޮތުން ކުރިމަތިވެފައިވާ ބޮޑު ދަތިތަކެއް ކަމަށް ވެދާނެ ކަމެވެ.

ޑިޕްރެޝަނަކީ އާންމުކޮށް ވަރަށް ބޮޑަށް އޮޅުން އަރާފައިވާ ސިއްހީ ހާލަތެކެވެ. މިއީ ހަމައެކަނި ކޮޓަރީގައި އެކަނިވެ، ރޯން އޮތުމެއް ނޫނެވެ. ބައެއް ފަހަރު ބޭރުފުށުން ހިނިތުންވުން ދައްކައިގެން ހުންނަ އިރުވެސް، އެތެރެހަށިން މީހާ ހުންނަނީ މުޅިން ވަރުބަލިވެ، ހަކަތަ ހުސްވެފައެވެ. ތިބާގެ "ހިތްވަރު" ނެތްކަމަށް ބުނެ އަމިއްލަ ނަފްސު ކުށްވެރިކުރުމުގެ ކުރިން، މިއީ ޑިޕްރެޝަންގެ ސަބަބުން ދިމާވާ ކަމެއްތޯ ފުންކޮށް ވިސްނާލަން ޖެހެއެވެ. ތިރީގައި މިވަނީ ތިބާއަށް ކުރެވޭ އިހުސާސަކީ ކަންނެތްކަމެއް ނޫންކަން އަންގައިދޭ މުހިންމު 6 ނިޝާނެވެ.

ޑިޕްރެޝަނަކީ އަމިއްލަ އިޚްތިޔާރުގައި ކޮންޓްރޯލް ކުރެވޭ ކަމެއް ނޫން
ޑިޕްރެޝަން ތަހައްމަލުކުރާ ފަރާތްތަކުން މަސައްކަތްތަކާ ދުރުހެލިވަނީ ކަންނެތްކަމުން ނުވަތަ އަރާމުކުރަން ބޭނުންވާތީއެއް ނޫނެވެ. އޭގެ ބަދަލުގައި، މިއީ ޖިސްމާނީ އަދި ނަފްސާނީ ގޮތުން މީހާގެ ބާރު ކެނޑި، "ވާގިނެތޭ" ފަދަ އިހުސާސެއް ކުރެވުމުގެ ނަތީޖާއެކެވެ. ދުވަހުން ދުވަހަށް ކުރަންޖެހޭ އާދައިގެ ކަންކަން ކުރުމަށް ބޭނުންވި ނަމަވެސް، ހަށިގަނޑުގައި ވަރުނެތުމާއި ހަރަކާތްތެރިވުމަށް ހުރަސްތަކެއް ކުރިމަތިވަނީއެވެ. 'ނޭޝަނަލް އިންސްޓިޓިއުޓް އޮފް މެންޓަލް ހެލްތު' އިން ފާހަގަކުރާ ގޮތުގައި، ޑިޕްރެޝަނަކީ ސިކުނޑީގެ މަސައްކަތްތަކަށް، ހާއްސަކޮށް މީހާގެ ޝުއޫރުތަކާއި ހަކަތަ ކޮންޓްރޯލްކޮށްދޭ 'ނިއުރޯޓްރާންސްމިޓަރ' ތަކަށް އަންނަ ބަދަލުތަކަކާ ގުޅިފައިވާ ސިއްހީ ސީރިއަސް ހާލަތެކެވެ. އެހެންކަމުން، ކަންކަމުގައި ހަރަކާތްތެރި ނުވެވުމަކީ އެމީހެއްގެ އަހުލާގީ އުނިކަމެއް ނޫނެވެ. އެއީ ބަލީގެ ސަބަބުން ކުރިމަތިވާ ސިއްހީ އަލާމާތެކެވެ.

އެއްވެސް ކަމަކުން އުފާވެރިކަމެއް ނުލިބުން 
އާދައިގެ ގޮތެއްގައި ކަންނެތްކަން އިހުސާސްވާ މީހަކަށް، މީރު ކާއެއްޗެއްގެ ވަސް ދުވުމުން ނުވަތަ ގާތް ރަހުމަތްތެރިއަކާ ބައްދަލުވުމުން މޫޑަށް ހެޔޮ ބަދަލެއް އާދެއެވެ. ނަމަވެސް، ޑިޕްރެޝަންގެ ހާލަތުގައި ކުރިން އުފާލިބުނު އެއްވެސް ކަމަކުން ހިތްހަމަޖެހުމެއް ނުލިބެއެވެ. ގަދައަށް ނިދިި ނަމަވެސް، ނުވަތަ މީރު ކާއެއްޗެހި ކެއުމުން ވެސް ހިތަށް އިހުސާސް ކުރެވެނީ ފުން ހުސްކަމެކެވެ. މިއީ ހަމައެކަނި "ދެރަވުމުގެ" އިހުސާސެއް ނޫނެވެ. މިއީ އެއްވެސް ޝުއޫރެއް ނުވާ، ފަޅު ނުވަތަ "ބްލޭންކް" ހާލަތެކެވެ. މި ހާލަތުގައި ދިރިއުޅުން ފެންނަނީ ފުސް ބިއްލޫރިގަނޑެއްގެ ފަހަތުން ބަލާ ފަދަ، ކުލަައެއް ނެތް މަންޒަރެއްގެ ގޮތުގައެވެ.

ކުރިން ކުރާހިތްވި ކަންކަމަށް ހުންނަ ޝައުގުވެރިކަން މުޅިން ގެއްލުން
ކުރިން ތިބާ އެންމެ ކުރާހިތްވާ، އުފާލިބޭ ކަންކަމާ މެދު ވިސްނާލަބަލާށެވެ. އެއީ ކުރެހުން ކަމަށް ވިޔަސް ނުވަތަ ފޮތް ކިޔުން ކަމަށް ވިޔަސްމެއެވެ. އާދައިގެ ގޮތެއްގައި ކަންނެތް މީހަކު، ކުރަންޖެހޭ މަސައްކަތުގެ ބަދަލުގައި އިޚްތިޔާރު ކުރާނީ އޭނާ ކުރާހިތްވާ މަޖާ ކަންކަމެވެ. ނަމަވެސް ޑިޕްރެޝަންގެ ހާލަތުގައި، ކުރިން އުފާލިބުނު އެއްވެސް ކަމަކުން އެއްވެސް ޝައުގުވެރިކަމެއް ނުލިބެއެވެ. ސިއްހީ ގޮތުން މި ހާލަތަށް ކިޔަނީ 'އެންހެޑޯނިއާ' އެވެ. މިއީ ހަމައެކަނި މަސައްކަތެއް ކުރަން ފަސްކުރުމެއް  ނޫނެވެ. މިއީ މުޅި ދިރިއުޅުމުގެ އުފާވެރިކަމުން އެކަހެރިވެ، ޝައުގުވެރިކަން މުޅިން ކެނޑިގެން ދިއުމެވެ.

އާދައިގެ ކަންކަމަކީ އުފުލަންޖެހޭ ބޮޑު ބުރައަކަށް ވުން
ނަފްސާނީ ދުޅަހެޔޮކަމުގެ މުހިންމުކަން އެންމެ ބޮޑަށް ފާހަގަވަނީ ދިރިއުޅުމުގެ އާދައިގެ ކަންކަން ކުރާ އުސޫލުންނެވެ. ޑިޕްރެޝަންގެ ހާލަތުގައި، މެސެޖަކަށް ޖަވާބު ދިނުމަކީ ވެސް ބޮޑު އިމްތިހާނެއް ކުރިމަތިވުން ފަދަ ދަތި ކަމަކަށް ވެއެވެ. ފެންވަރާލުން ފަދަ ދުވަހުން ދުވަހަށް ކުރަންޖެހޭ ކަންކަމަކީ ވެސް އިންތިހާ ދަރަޖައިގެ ހިތްވަރެއް ބޭނުންވާ ކަންކަމަށް ބަދަލުވެއެވެ. އެހެން މީހުން އެމީހުންގެ މަސައްކަތްތަކާއި އިޖުތިމާއީ ގުޅުންތައް އާދައިގެ މަތިން ކުރިއަށްގެންދާތަން ފެނުމުން، އަމިއްލަ ނަފްސަށް ނަފްރަތުކުރެވޭ ގޮތް މެދުވެރިވެއެވެ. ނަމަވެސް، މިއީ ސިކުނޑީގެ ހަކަތަ މަދުވުމުގެ ސަބަބުން، ހަށިގަނޑު ހަރަކާތްތެރިވުމަށް ކުރިމަތިވާ ހުރަހެކެވެ.

ވަކި ސަބަބެއް ނެތި މިފަދަ އިހުސާސްތަކެއް ކުރިމަތިވުން
އާންމު ގޮތެއްގައި މަސައްކަތެއް ފަސްކުރުމަށް ނުވަތަ ކަންނެތްވުމަށް ދިމާވާ ވަކި ސަބަބުތަކެއް ހުރެއެވެ. ނަމަވެސް، ޑިޕްރެޝަނަކީ ދިރިއުޅުމުގެ ހުރިހާ ކަމެއް އަމާންކޮށް، ބޭރުފުށުން ހުރިހާ ކަމެއް ފުރިހަމައަށް ހުއްޓާވެސް ކުރިމަތިވެދާނެ ސިއްހީ ހާލަތެކެވެ. ރަނގަޅު ވަޒީފާއެއް އޮވެ، އާއިލާގެ ލޯތްބާއި އަޅާލުން ލިބި، އަދި ދިރިއުޅުމުގެ ހުރިހާ ތަނަވަސްކަމެއް ހުރި ނަމަވެސް، މި ފުން ހިތްދަތިކަން އިހުސާސް ކުރެވިދާނެއެވެ. މިފަދަ ހާލަތްތަކުގައި، "މިހާ އުފާވެރި މާހައުލެއްގައި އުޅެމުން ވެސް މިފަދަ އިހުސާސްތަކެއް ކުރެވެނީ އަމިއްލަ ކަންނެތްކަމުން" ކަމަށް ބުނެ، އަމިއްލަ ނަފްސު ކުށްވެރިކުރެވޭ ގޮތްވެއެވެ. އެހެންނަމަވެސް، ހަގީގަތަކީ މިއީ ޖެނެޓިކްސް ނުވަތަ ސިކުނޑީގެ ކެމިކަލްތަކަށް އަންނަ ބަދަލުތަކެއްގެ ސަބަބުން މެދުވެރިވާ ސިއްހީ މައްސަލައެއް ކަމެވެ.

މިއީ ތިބާގެ އިޚްތިޔާރުގައި އޮންނަ ކަމެއް ނޫން
ކަންނެތްކަމާއި ޑިޕްރެޝަނާ ދެމެދު އޮތް އެންމެ ބޮޑު ތަފާތަކީ އެ މީހެއްގެ އަމިއްލަ އިޚްތިޔާރެވެ. އާދައިގެ ކަންނެތްކަމަކީ ވަގުތީ ގޮތުން އަރާމާއި ހިތްހަމަޖެހުން ލިބިދޭ ކަމެކެވެ. ނަމަވެސް، ޑިޕްރެޝަންގެ ސަބަބުން މީހާ އަބަދުވެސް ހުންނަނީ ނަފްސާނީ ގޮތުން ނުހަނު ބޮޑު ބުރައެއް އުފުލައިގެންނެވެ. ޙަޤީޤަތުގައި ޑިޕްރެޝަން ތަހައްމަލުކުރާ ފަރާތްތަކަކީ އާދައިގެ މީހުންނަށްވުރެ ދެގުނަ އިތުރަށް މަސައްކަތްކުރަން ޖެހޭ ބައެކެވެ. ސަބަބަކީ، އާންމު ހާލަތެއްގައި ހުރި މީހެއްގެ ގޮތުގައި ފެނުމަށްޓަކައި ވެސް، އެމީހުންގެ ހަށިގަނޑާއި ސިކުނޑީގައި ހުރި ހަކަތައިގެ ބޮޑުބައެއް ހޭދަކުރަން މަޖުބޫރުވާތީއެވެ.

'އެމެރިކަން ސައިކިއޭޓްރިކް އެސޯސިއޭޝަން' އިން ހާމަކުރާ ގޮތުގައި، ޑިޕްރެޝަނަކީ އިންސާނާގެ ދިރިއުޅުމުގެ ހުރިހާ ދާއިރާއަކަށް ނުފޫޒު ފޯރުވާ ސިއްހީ ބޮޑު މައްސަލައެކެވެ. މިއީ އެއްވެސް ހާލެއްގައި އަހުލާގީ އުނިކަމެއް ނޫނެވެ. އެހެންކަމުން، ތިބާގެ ކިބައިން މިފަދަ އަލާމާތްތަކެއް ފެންނަމަ، އަމިއްލަ ނަފްސަށް އޯގާތެރިވެ، ކަމާބެހޭ މާހިރެއްގެ އެހީތެރިކަން ހޯދުމަކީ ދުޅަހެޔޮ ދިރިއުޅުމަކަށް އެޅޭނެ އެންމެ މުހިންމު ފިޔަވަޅެވެ.

ސިއްހީ އިރުޝާދު: މިއީ ހަމައެކަނި މައުލޫމާތު ފޯރުކޮށްދިނުމުގެ މަގުސަދުގައި ލިޔެފައިވާ ލިޔުމެކެވެ. މިއީ ސިއްހީ ފަރުވާގެ ބަދަލުގައި ބޭނުންކުރެވޭނެ ލަފައެއް ނޫނެވެ. ތިބާގެ ނަފްސާނީ ދުޅަހެޔޮކަމާ މެދު ކަންބޮޑުވުންތަކެއް ހުރި ނަމަ، ލަސްނުކޮށް ސިއްހީ އެހީތެރިއެއްގެ މަޝްވަރާ ހޯއްދަވާށެވެ.