މިރޭ މާލޭގައި ހަވާ އަރުވަނީ!

ދިވެހިރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބާއްވާ ކުލަގަދަ ހަރަކާތްތަކުގެ ތެރެއިން، މިރޭ މާލޭގައި ހަވާ އެރުވުމާއި އަސްކަރީ ހިނގާލުން ބޭއްވުމަށް ހަމަޖެހިއްޖެއެވެ.

މިނިވަން ދުވަހުގެ އުފާ ފާޅުކުރުމުގެ ގޮތުން ބާއްވާ ހަވާ އެރުވުމުގެ ހަރަކާތް އޮންނާނީ މިރޭ 22:15 ހާއިރުއެވެ. މި ހަރަކާތް ކުރިއަށްދާނީ މާލޭގެ އުތުރު ފަރާތު 1 ނަންބަރު ފާލަމާ ދިމާ ބޭރުން މޫދުގައެވެ. ގާތްގަނޑަކަށް 5 މިނެޓަށް ދެމިގެންދާ މި ހަރަކާތަކީ ކޮންމެ އަހަރަކުވެސް އާންމުންގެ ބޮޑު ތަރުހީބެއް ލިބޭ ހަރަކާތެކެވެ.

މީގެ އިތުރުން، މިރޭ ޖުމްހޫރީ މައިދާނުގައި މިނިވަން ދުވަހުގެ ކުޅިވަރުތަކާއި އަސްކަރީ ހިނގާލުން ބޭއްވުމަށް ވަނީ ހަމަޖެހިފައެވެ. ދިވެހި ފުލުހުންގެ ޚިދުމަތުން މަޢުލޫމާތު ދެއްވާފައިވާ ގޮތުގައި، އަސްކަރީ ހިނގާލުން ފެށުމަށް ހަމަޖެހިފައިވަނީ މިރޭ 20:30 ގައެވެ. ޖުމްހޫރީ މައިދާނުން ފަށާ މި ހިނގާލުމުގައި އެމް.އެން.ޑީ.އެފް ބޭންޑާއެކު ޖުމްލަ ހަ ގެމައަކުން ބައިވެރިވާނެއެވެ. މި ހިނގާލުމުގެ ތެރެއިން ސިފައިންގެ ތަފާތު ކޯރތަކާއި ޚިދުމަތްތައް އާންމުންނަށް ދައްކާލުމަށް ވަނީ ރޭވިފައެވެ.

އަސްކަރީ ލަޝްކަރު މާލޭގެ ހަތަރު ސަރަހައްދެއްގައި މަޑުކުރުމަށް ވަނީ ހަމަޖެހިފައެވެ. އެއީ:

• މަޖީދީމަގާއި ބޮޑުތަކުރުފާނުމަގު ގުޅޭ ހިސާބުން އާޓިފިޝަލް ބީޗް ސަރަހައްދު.
  
• އަމީނީމަގު ކުޑަކުދިންގެ ބަގީޗާ ކުރިމަތި.
  
• އަމީނީމަގު ގަލޮޅު ޕޮލިސް ކުރިމަތި.
  
• ކަޅުތުއްކަލާކޮށީގެ ހުޅަނގު އުތުރު ކަންމަތި.

މި ސަރަހައްދުތަކުގައި ލަޝްކަރު މަޑުކުރާ ވަގުތުތަކުގައި ސިފައިންގެ ބޭންޑުން ތަފާތު ރާގުތައް ކުޅުމަށް ހަމަޖެހިފައިވެއެވެ.

މިރޭގެ ހަރަކާތްތަކުގެ ތެރޭގައި ޤައުމީ ކެޑޭޓު ކޯގެ ޕެރޭޑާއި، ސްކޫލުތަކުގެ ފަރާތުން ހުށަހަޅައިދޭ ކުޅިވަރުތަކާއި ސަޤާފީ ހަރަކާތްތައް ވެސް ކުރިއަށްދާނެއެވެ. މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖުން މަޢުލޫމާތު ދެއްވި ގޮތުގައި، ރާއްޖޭގެ މަޝްހޫރު ނަށާ ގްރޫޕުތަކާއި ބޮޑުބެރު ގްރޫޕުތަކުގެ ފޯރިގަދަ ހުށަހެޅުންތައް ވެސް މިރޭގެ މައިދާނީ ހަރަކާތްތަކުގެ ތެރެއިން ފެނިގެންދާނެއެވެ.