ވިލުންތެރި ގެދޮރު ބިނާކުރުމުގެ އިރުޝާދުފޮތް އިފްތިތާޙުކޮށްފި

ދިވެހިރާއްޖޭގައި ވިލުންތެރި ގެދޮރު ބިނާކުރުމުގެ އިރުޝާދުފޮތް މިއަދު އިފްތިތާޙުކޮށްފިއެވެ. މިއަދު ބޭއްވުނު ޖަލްސާގައި ފޮތް އިފްތިތާޙުކޮށްދެއްވީ އިމާރާތް ކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްޠަލިބެވެ.

މިނިސްޓަރު ވަނީ މިފޮތް ސިޓީތަކާއި އިދާރާތައް ހިންގުމާއި އާންމު މަސައްކަތްތަކާބެހޭ ވުޒާރާގެ މިނިސްޓަރ އޮފް ސްޓޭޓް މުޙައްމަދު އިބްރާހީމްއާއި ޙަވާލުކުރައްވާފައެވެ. މި އިރުޝާދު ފޮތަކީ ވޯލްޑް ބޭންކުގެ ހައުސިންގ ރެސިލިއަންސް ޓެކްނިކަލް އެސިސްޓަންސްގެ ތެރެއިން ކުރިއަށް ގެންގޮސްފައިވާ ޕްރޮޖެކްޓެކެވެ.

މި ފޮތުގައި ރައްކައުތެރި ގެދޮރު ބިނާކުރުމަށާއި، ކާރިސާތަކާއި މޫސުމަށް އަންނަ ބަދަލުތަކުން ގެދޮރު އިތުރަށް ރައްކައުތެރިކުރުމަށާއި، ދެމެހެއްޓެނިވި ގޮތަކަށް ގެދޮރު އިމާރާތްކޮށް ގޭގައި ދިރިއުޅުން ދުޅަހެޔޮކުރުމަށްޓަކައި ބޭނުންކުރެވިދާނެ އިރުޝާދުތައް ބަޔާންކޮށްފައިވެއެވެ.

ރާއްޖޭގެ އަތޮޅުތަކުގެ ގިނަ ރަށު ކައުންސިލްތައް އޮންލައިންކޮށް މި ރަސްމިއްޔާތުގައި ބައިވެރިވެފައިވާއިރު، އެކި ވުޒާރާތަކާއި އިދާރާތަކާއި އިންޓަރނޭޝަނަލް އޯގަނައިޒޭޝަންތަކުގެ ބޭފުޅުންވެސް ވަނީ މާލޭގައި ބޭއްވުނު ޙަފްލާގައި ބައިވެރިވެވަޑައިގަންނަވާފައެވެ. މި ޙަފްލާގައި ވޯލްޑް ބޭންކުގެ ސީނިއަރ ހައުސިންގ ސްޕެޝަލިސްޓް މިސް ޑާއޯ ހެރިސަން ވެސް ބައިވެރިވެވަޑައިގެން ވާހަކަފުޅު ދައްކަވާފައިވެއެވެ.

މިނިސްޓަރ ޑރ. އަބްދުﷲ މުއްޠަލިބާއި ލޯކަލް ގަވަރމަންޓް އޮތޯރިޓީގެ ޗީފް އެގްޒެކެޓިވް އޮފިސަރ މުޙައްމަދު ނިމާލް ވަނީ މިފަދަ ފޮތެއް ތައްޔާރުކުރުމުގެ މުހިންމުކަމާއި ވިލުންތެރި ގެދޮރު ބިނާކުރުމުގެ މުހިންމުކަމާ ބެހޭގޮތުން ވާހަކަފުޅު ދައްކަވާފައެވެ.

މިފޮތް ތައްޔާރުކޮށްފައިވަނީ ބޭރުގެ ފަންނީ ފަރާތެއް ކަމުގައިވާ ބިލްޑް ޗޭންޖާއި ދިވެހިރާއްޖޭގެ ކުންފުންޏެއް ކަމުގައިވާ ރިޔަން ޕްރައިވެޓް ލިމިޓެޑާ ގުޅިގެންނެވެ. މި މަސައްކަތަށް ފަންޑުކޮށްފައިވަނީ ވޯލްޑް ބޭންކުގެ ގްލޯބަލް ފެސިލިޓީ ފޮރ ޑިޒާސްޓަރ ރިސްކް ރިޑަކްޝަން އެންޑް ރިކަވަރީގެ އިތުރުން ޖަޕާނު ސަރުކާރާއި ކްލައިމެޓް ޗޭންޖް ފައިނޭންސް ގެޕް ފަންޑުގެ އެހީތެރިކަމާއެކުގައެވެ.

ފޮތް އިފްތިތާޙުކުރުމަށްފަހު ވިލުންތެރި ގެދޮރު ބިނާކުރުމުގެ މުހިންމުކަމާ ބެހޭގޮތުން އިންޓަރނޭޝަނަލް އެކްސްޕަރޓް އެލިޒަބަތް ހައުސްލަރ ވަރޗުއަލް ޕްރެޒެންޓޭޝަނެއް ދެއްވާފައިވެއެވެ. އަދި މިއަށްފަހު ޕެނަލް ޑިސްކަޝަންއެއްވެސް ވަނީ މި މައުޟޫއާ ގުޅިގެން ކުރިއަށް ގެންގޮސްފައެވެ.

ޕެނަލިސްޓުންގެ ގޮތުގައި ނޫނު އަތޮޅު ކައުންސިލްގެ ރައީސް މުޙައްމަދު ބަޝީރު، އިމާރާތްކުރުމާއި ބިނާރާބެހޭ ވުޒާރާގެ ސީއައިޑީޑީ ޑިޕީ ޑިޕާރޓްމަންޓްގެ ޑިރެކްޓަރ ފާތިމަތު ޝައުފާ، ރިޔަން ޕްރައިވެޓް ލިމިޓެޑްގެ ޑިރެކްޓަރ ފާތިމަތު ރަޝީދު، އަދި ޕްރޮޖެކްޓް މެނޭޖަރ އެންޑް ކޮންޓްރެކްޓަރ އިބްރާހީމް ޖަލީލް ހިމެނެއެވެ.