ޚަބަރު
އެންސްޕާގެ އޮފީސް ހިންގުމަށް މޯލްޑިވްސް މީޑިއާ ހައުސްއާއެކު ވެފައިވާ އެއްބަސްވުން ނިމުމަކަށް

ނޭޝަނަލް ސޯޝަލް ޕްރޮޓެކްޝަން އޭޖެންސީ ފޮޓޯ: އެޑިޝަން
ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ އޮފީސް ހިންގުމަށް މޯލްޑިވްސް މީޑިއާ ހައުސްއާއެކު ވެފައިވާ އެއްބަސްވުން ނިމުމަކަށް ގެނައުމަށް ނިންމައިފިއެވެ. މިކަން ނިންމާފައިވަނީ މާލީ ވުޒާރާއާ މަޝްވަރާކުރުމަށްފަހުގައެވެ.
އެންސްޕާއިން މިއަދު ނެރުނު ބަޔާނެއްގައި ބުނެފައިވާ ގޮތުގައި، އެ އެޖެންސީ ހިންގަމުންދިޔަ "މޫކައި ސުއިޓްސް" އިމާރާތް މަރާމާތުކުރުމަށްޓަކައި ހުސްކުރުމަށް އަންގާފައިވާތީ، އެޖެންސީ ހިންގާނެ ތަނެއް ހޯދުމަށް މާލީ ވުޒާރާގެ އޯޕަން ޓެންޑަރިންގ އުސޫލުން ހުޅުވާލައި، ކަނޑައެޅިފައިވާ ގަވާއިދުތަކާއި އުސޫލުތަކުގެ ދަށުން އެވޯޑްކޮށް، އެޖެންސީ ހިންގުމަށް ލިބިފައިވާ އިމާރާތުގެ ފަންގިފިލާތައް މޯލްޑިވްސް މީޑިއާ ހައުސްއިން ކުއްޔަށް ހިފުމުގެ މަސައްކަތް ވަނީ ކުރެވިފައެވެ.
ނަމަވެސް، މި މުޢާމަލާތާ ގުޅިގެން މޯލްޑިވްސް މީޑިއާ ހައުސްގެ އަގު ވައްޓާލައި ބަދުނާމުކުރުމަށް ޙަޤީޤަތާ ޚިލާފު އެތައް ވާހަކައެއް ދައްކައި، މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުންދިއުމުގެ ސަބަބުން، އެ ކުންފުންޏަށް މާއްދީ ގޮތުންނާއި މަޢުނަވީ ގޮތުން ފޫނުބެދޭ ވަރުގެ ބޮޑު ގެއްލުމާ ކުރިމަތިވެފައިވާކަމަށް ބުނެ، މި އެއްބަސްވުން ނިމުމަކަށް ގެނައުމަށް މޯލްޑިވްސް މީޑިއާ ހައުސްއިން ވަނީ ހުށަހަޅާފައެވެ.
އެންސްޕާގެ ބަޔާނުގައި އިތުރަށް ބުނެފައިވަނީ، މި އެއްބަސްވުން ނިމުމަކަށް ގެނައުމާ ގުޅިގެން އިތުރަށް ކުރަންޖެހޭ މުޢާމަލާތްތައް ކުރުމާއި، އެއްބަސްވުން ނިމުމަކަށް ގެނައުމަށްފަހު ފުރިހަމަކުރަންޖެހޭ އިޖުރާއަތްތައް ފުރިހަމަކުރުމުގެ މަސައްކަތްތައް މާލީ ވުޒާރާގެ އިރުޝާދުގެ ދަށުން ކުރިއަށް ގެންދާނެ ކަމަށެވެ.