ކްރިސްޓިއާނޯ ރޮނާލްޑޯ ފިލްމުކުޅެން ނިކުންނަނީ

ދުނިޔޭގެ ފުޓްބޯޅައިގެ ލެޖެންޑް ކްރިސްޓިއާނޯ ރޮނާލްޑޯއަކީ ހަމައެކަނި ދަނޑުމަތީގެ ތަރިއެއް ނޫނެވެ. ފަސް ފަހަރު ބެލޮންޑިއޯ ކާމިޔާބުކޮށްފައިވާ މި ކުޅުންތެރިޔާއަކީ މިހާރުވެސް ހޮޓާ ސައިންސާއި، ފެޝަން، ފިޓްނަސް އަދި ޑިޖިޓަލް މީޑިއާގެ ބޮޑު އެމްޕަޔަރެއް ބިނާކޮށްފައިވާ ކާމިޔާބު ވިޔަފާވެރިއެކެވެ. ނަމަވެސް، މިހާރު އިވެމުންދަނީ ރޮނާލްޑޯގެ ކާމިޔާބު ކެރިއަރުގައި މުޅިން އައު ބާބެއް ހުޅުވި، ހޮލީވުޑްގެ ފިލްމީ ދާއިރާއަށް އޭނާ ފިޔަވަޅު އަޅަން އުޅޭ ހަބަރެވެ.

ރިޕޯޓްތައް ބުނާ ގޮތުގައި، ރޮނާލްޑޯ މިހާރު ތައްޔާރުވަމުންދަނީ ސްކްރިޕްޓަކަށް ތައްޔާރުކުރާ ޓީވީ ޑްރާމާ ސިލްސިލާއެއްގައި އެކްޓްކޮށް، އެ ސިލްސިލާގެ އެގްޒެކެޓިވް ޕްރޮޑިއުސަރެއްގެ ގޮތުގައި މަސައްކަތް ކުރުމަށެވެ. "ޑޭ 1އެސް"  ގެ ނަމުން ނަންދެވިފައިވާ މި ސިލްސިލާއަކީ ފުޓްބޯޅަ އެޖެންޓުންގެ ވާދަވެރި އަދި ނުފޫޒުގަދަ ދުނިޔޭގެ މައްޗަށް ބިނާކޮށް އުފައްދާލާ ފޯރިގަދަ ޑްރާމާއެކެވެ. މިއީ މަޝްހޫރު ޑައިރެކްޓަރު މެތިއު ވޯން އާއި ރޮނާލްޑޯ ގުޅިގެން އުފައްދާފައިވާ "ޔޫއާރ މާވް" ސްޓޫޑިއޯގެ ފުރަތަމަ ޓީވީ ޕްރޮޖެކްޓެވެ.

މެތިއު ވޯންއަކީ "ކިންގްސްމަން"، "އެކްސް-މެން: ފަސްޓް ކްލާސް" ފަދަ ކާމިޔާބު ފިލްމުތައް އުފައްދާފައިވާ މީހެކެވެ. ފުޓްބޯޅަ އެޖެންޓް ޑަރެން ޑެއިންގެ އަސްލު ކޮންސެޕްޓަކަށް ތައްޔާރުކުރާ މި ސިލްސިލާގައި ފެނިގެންދާނީ "ސްޓެންލީ ޑާލްޓަން" ކިޔާ ފިކްޝަނަލް އެޖެންޓެއްގެ ވާހަކައެވެ. މިހާރުވެސް ލަންޑަނުގައި މި ސިލްސިލާގެ މަސައްކަތް ފެށިފައިވާއިރު، މީގެ މުހިންމު ރޯލަކުން މަޝްހޫރު އެކްޓަރު ޑޭމިއަން ލުވިސް ފެނިގެންދާނެއެވެ. މީގެ އިތުރުން، ފްރާންސާއި އާސެނަލްގެ ކުރީގެ ތަރި ތިއަރީ އޮންރީ އާއި ރެޕް ލަވަކިޔުންތެރިޔާ ޑޭވް ވެސް މި ސިލްސިލާގެ ހާއްސަ ފެނިލުންތަކުން ފެންނާނެ ކަމަށް ރިޕޯޓްތައް ބުނެއެވެ.

މި އައު ފެށުމަކީ ރޮނާލްޑޯގެ ވިޔަފާރި ފުޅާކުރުމަށް ކުރަމުންދާ މަސައްކަތުގެ މުހިންމު ބައެކެވެ. މިއަހަރުގެ ކުރީކޮޅު ރޮނާލްޑޯގެ ސްޓޫޑިއޯއިން ވަނީ ކުޅިވަރަށް ހާއްސަ ދެ ފިލްމެއް ނިންމާފައިވާކަން އިއުލާންކޮށްފައެވެ. ސައުދީ އަރަބިއްޔާގެ އަލް ނަސްރު ކްލަބަށް މިހާރު ކުޅެމުންދާ ރޮނާލްޑޯ، އުމުރުން 41 އަހަރުގައި މިފަދަ ބޮޑު ނިންމުމެއް ނިންމާފައިވަނީ ފުޓްބޯޅަ ކެރިއަރަށްފަހު އޭނާގެ މުސްތަގުބަލު ބިނާކުރާނެ ގޮތުގެ ސާފު ތަަސައްވުރަކާއެކުގައެވެ.

ދުނިޔޭގެ އެންމެ ނުފޫޒުގަދަ އެއް ޝަހުސިއްޔަތުގެ ގޮތުގައި ހުރެ، ރޮނާލްޑޯ މި ދައްކައިދެނީ އޭނާގެ ކާމިޔާބީ ހަމައެކަނި ދަނޑުމަތީގެ ލަނޑުތަކަކަށް ހަނިނުވާނެ ކަމެވެ. ހޮލީވުޑްގެ މި އާ ދަތުރާއެކު، "ސީއާރް ސެވަން" ބްރޭންޑް ދުނިޔޭގެ މުނިފޫހިފިލުވުމުގެ ސިނާއަތުގައި އާ އުސްމިންތަކަކަށް ވާސިލްވާނެކަމީ ޝައްކެއް އޮތް ކަމެއް ނޫނެވެ.