ޚަބަރު
މަނީ ޗޭންޖިންގ ވިޔަފާރިއާބެހޭ ޤަވާޢިދު ގެ ދަށުން މިހާތަނަށް ފައިސާ މާރުކުރުމުގެ ލައިސެންސަށް ހުށައެޅީ 98 ފަރާތެއް

މޯލްޑިވްސް މަނިޓަރީ އޮތޯރިޓީ. ފޮޓޯ:އިންޓަރނެޓް
"މަނީ ޗޭންޖިންގ ވިޔަފާރިއާ ބެހޭ ޤަވާޢިދު" ގެ ދަށުން މިހާތަނަށް ފައިސާ މާރުކުރުމުގެ ލައިސެންސަށް މިހާތަނަށް ހުށައެޅި 98 ފަރާތެއް ކަމަށް މޯލްޑިވްސް މަނިޓަރީ އޮޓޯރިޓީ އިން ހާމަކޮށްފިއެވެ.
އެމްއެމްއޭއިން ބުނެފައިވަނީ، ލައިސަންސްއަށް އެދި ހުށައެޅުމުގެ ސުންގަޑި 30 ނޮވެމްބަރ ވަނަ ދުވަހު ހަމަވެފައިވާ ކަމަށާއި، އެހާތަނަށް 98 ފަރާތަކުން ލައިސަންސްއަށް އެދި ހުށައަޅާފައިވާކަމަށެވެ.
އެގޮތުން ޓިއާ 1 ލައިސަންސަށް 79 ފަރާތަކުން ވަނީ ހުށައަޅާފައިވާ ކަމަށާއި މީގެތެރޭގައި މުޅިން އަލަށް ހުށައަޅާފައިވާ 44 ފަރާތަކާއި ކުރިން ލައިސަންސް އޮތް 35 ފަރާތެއް ހިމެނޭ ކަމަށް އެމްއެމްއޭ އިން ބުނެފައިވެއެވެ. ޓިއާ2 ލައިސަންސްއަށް އެދި 19 ފަރާތެއް ވަނީ ހުށައަޅާފައެވެ. މީގެތެރޭގައި މުޅިން އަލަށް ލައިސަންސްއަށް އެދި ހުށައަޅާފައިވާ 5 ފަރާތަކާއި، ކުރިން ލައިސަންސް އޮތް 14 ފަރާތަކުން ވަނީ ހުށައަޅާފައި ކަމަށް އެމްއެމްއޭއިން ބުނެއެވެ.
"މަނީ ޗޭންޖިންގ ވިޔަފާރިއާބެހޭ ޤަވާޢިދު"ގެ ދަށުން ލައިސަންސްއަށް އެދި ހުށައެޅުމަށް އެމްއެމްއޭއިން ހުޅުވާލީ އޮކްޓޯބަރ މަހުގެ 2 ވަނަ ދުވަހުއެވެ.
މިޤަވާޢިދުގެ ދަށުން ލައިސެންސް ތަކުގެ ތެރެއިން ދޫކުރާ ޓިއާ1 ކެޓަގަރީގެ ވިޔަފާރިތަކަށް ދޫކުރަނީ ބޭރުފައިސާ ގަނެ ވިއްކުމަށް ދޫކުރާ ލައިސަންސެވެ. ޓިއާ2 ލައިސަންސަކީ ހަމައެކަނި ރިސޯޓްތަކަށް ބޭރުފައިސާ ވިއްކަން ދެވޭ ލައިސަންސެކެވެ.
މިހާރު މަނީ ޗޭންޖިންގ ލައިސަންސް އޮތް ފަރާތްތަކުގެ އަދަދަކީ 212 އެވެ. މީގެތެރެއިން މުޅިން އަލަށް ލައިސަންސްއަށް އެދި ހުށައަޅާފައިވަނީ 49 ފަރާތެވެ.