ޕީޕީއެމް އުވާލަން ނިންމައިފި

ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް) އުވާލަން ނިންމައިފިއެވެ. 

ޕީޕީއެމް އުވާލުމަށް ނިންމީ އެޕާޓީ އިން ބޭއްވި ސެނެޓު ބައްދަލުވުމެއްގައެވެ. 

މިކަމަށް ބޭއްވި ސެނެޓު ބައްދަލުވުމުގައި 42 ބޭފުޅަކު ބައިވެރިވި އިރު ޕާޓީ އުވާލަން ފާސްކޮށްފައިވަނީ ބައްދަލުވުމުގައި ބައިވެރިވި މެމްބަރުންގެ އިއްތިފާޤުންނެވެ. ޕާޓީގެ ނިންމުން ނިންމަން ބޭނުންވަނީ 38 ބޭފުޅެއްގެ ވޯޓެވެ. 

މިކަމާއި ގުޅިގެން އެޕާޓީ އިން ނެރެފައިވާ ނޫސްބަޔާނެއްގައި ބުނެފައިވަނީ ޕްރޮގްރެސިވް ޕާޓީ އޮފް މޯލްޑިވްސްގެ ނަމުގައި އިލެކްޝަން ކޮމިޝަނުގައި ރެޖިސްޓްރީކޮށް ހިންގަމުންދާ ސިޔާސީ ޕާޓީ މިވަގުތު މަސައްކަތް ކުރަމުންދަނީ، ކޯލިޝަނެއްގެ ތެރެއިން ކަމަށެވެ. 

މިއާއެކު މިވަގުތު ވެރިކަން ކުރަމުންދަނީ އެޕާޓީގެ އުސޫލްތަކާއި ފިކުރާއި އެއްގޮތް ޕާޓީއެއް ކަމުގައިވާ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށްވެފައި، އެޕާޓީއާއި ޕީޕީއެމްގެ ގިނަ އަދަދެއްގެ މެންބަރުން ގުޅެމުން ދިއުމާއެކު ޕާޓީގެ ލީޑާޝިޕަށް ވަކިން ސިޔާސީ ހަރަކާތެއް ކުރިއަށް ގެންދިއުމުގެ ބޭނުން ނުފެންނަކަމަށް ޕީޕީއެމުން ވަނީ ބުނެފައެވެ. މިއާއެކު ޕާޓީގެ އަސާސީ ޤަވާއިދުގައިވާ ގޮތުގެ މަތީން ޕާޓީގެ ލީޑާޝިޕުން ޕާޓީ އުވާލުމަށް ނިންމައި ޕާޓީ 3 ނައިބު ރައީސުންނާއި ސެކެރެޓަރީ ޖެނެރަލް ސޮއިކޮށް ސެނެޓަށް ޤަރާރެއް ވަނީ ހުށަހަޅާފައެވެ.

ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަކީ ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް އިސްވެ ހުންނަވާ 2011 ވަނަ އަހަރު އުފެއްދެވި ސިޔާސީ ޕާޓީއެކެވެ. އެޕާޓީ އުފެދިގެން ދިޔުމަށް ފަހު އެޕާޓީގެ ރިޔާސީ ޓިކެޓް ކާމިޔާބު ކުރައްވައި އެޕާޓީގެ ރިޔާސީ ކެނޑިޑޭޓެއްގެ ގޮތުގައި ހުންނަވާ ރާއްޖޭގެ ރައީސުލްޖުމްހޫރިއްޔާ ކަމަށް އިންތިޚާބު ވެފައިވަނީ ކުރީގެ ރައީސް އަދި ރައީސް މައުމޫނުގެ ކޮއްކޯފުޅު ޢަބްދުﷲ ޔާމީން ޢަބްދުލްޤައްޔޫމެވެ.