މަސްތުވާ ތިން ބާވަތެއް ބޭނުންކޮށްގެން އުދުހުނު ޕައިލެޓަކު މަސްތުވާތަކެއްޗާއި އެކު ހައްޔަރުކޮށްފި

ގިނަ އަދަދެއްގެ މަސްތުވާތަކެއްޗާއެކު މެލޭޝިއާގެ ޕައިލެޓަކު އިންޑޮނޭޝިއާގެ ޖަކާޓާގެ ސޮއެކާނޯ-ހައްޓާ އިންޓަނޭޝަނަލް އެއާޕޯޓުން ހައްޔަރުކޮށްފިއެވެ. މިދިޔަ ބުދަ ދުވަހު ހިނގި މި ހާދިސާގައި ހައްޔަރުކޮށްފައިވަނީ އުމުރުން 39 އަހަރުގެ ޕައިލެޓެކެވެ. އޭނާގެ ވަނަވަރު ހާމަކޮށްފައިވަނީ ހަމައެކަނި "އެމް.އެސް.އޯ" ގެ ނަމުންނެވެ.

ކުއާލަލަމްޕޫރުން ޖަކާޓާއަށް އައި މި ޕައިލެޓްގެ ފޮށި ބަލާ ފާސްކުރިއިރު، އޭގެ ތެރެއިން 70،000 އަށްވުރެ ގިނަ "އެކްސްޓަސީ" ގުޅަ ފެނިފައިވާ ކަމަށް ކަސްޓަމްސް އޮފިޝަލުން މައުލޫމާތު ދެއެވެ. މި ތަކެތި ފެނިފައިވަނީ އޭނާގެ ފޮށީގައި އޮތް 14 ކޮތަޅެއްގެ ތެރެއިންނެވެ. މީގެ އިތުރުން، އޭނާ އަތްދަބަހުން ހަތަރު ގްރާމްގެ "މެތައެމްފަޓަމިން (މެތު)" ވެސް ވަނީ ފެނިފައެވެ.

އެއާޕޯޓް ކަސްޓަމްސް އޮފީހުގެ އޮފިޝަލެއް ކަމަށްވާ ހެންގްކީ ޓޮމުއަން ޕަރލިންޑުންގަން އަރިޓޯނަންގް ވިދާޅުވި ގޮތުގައި، ހައްޔަރުކުރި ވަގުތު ޕައިލެޓްގެ ކުޑަކަމުދާ ތަކެތި ޓެސްޓުކުރިއިރު، އޭނާ ހުރީ ބާރުގަދަ ތިން ބާވަތެއްގެ މަސްތުވާތަކެއްޗަށް ޕޮޒިޓިވްވެފައެވެ. އެއީ މެތު، އެމް.ޑީ.އެމް.އޭ އަދި ކޮކެއިންއެވެ. މިއީ އޭނާ ބޯޓު ދުއްވި އިރުވެސް ހުރީ މަސްތުގެ ހާލަތުގައިކަން ދޭހަވާ ކަމެއް ކަމަށްވާތީ ކަމާބެހޭ ފަރާތްތަކުން ވަނީ ބޮޑު ކަންބޮޑުވުމެއް ފާޅުކޮށްފައެވެ.

މި ޕައިލެޓް މަސައްކަތް ކުރާ އެއާލައިން ރަސްމީކޮށް ހާމަކޮށްފައި ނުވި ނަމަވެސް، ފްލައިޓް ނަންބަރަށް ބަލާއިރު އެއީ މެލޭޝިއާ އެއާލައިންސްގެ ފްލައިޓެއްކަން އެނގެއެވެ. ތަހުގީގަށް އޭނާ ދީފައިވާ ބަޔާނުގައި ބުނެފައިވަނީ، މި ތަކެތި ޖަކާޓާއަށް ފޯރުކޮށްދިނުމުން 50,000 މެލޭޝިއަން ރިންގިޓް  ދޭނެ ކަމަށް ވަނީ ވައުދުވެފައެވެ.

މި ހާދިސާއާ ގުޅިގެން މެލޭޝިއާ އެއާލައިންސް އިން ބުނީ ކުރިއަށްދާ ތަހުގީގަށް ވަކި އެއްޗެއް ބުނަން ބޭނުންނުވާ ކަމަށެވެ. ނަމަވެސް، ކުންފުނީގެ އުސޫލުތަކާ ހިލާފުވާ މުވައްޒަފުންނަށް އެއްވެސް އިސްތިސްނާއެއް ނޯންނާނެ ކަމަށާއި، މި މައްސަލައިގައި ކަމާބެހޭ ފަރާތްތަކަށް ފުރިހަމަ އެއްބާރުލުން ދޭނެ ކަމަށް އެ އެއާލައިނުން ވަނީ ބުނެފައެވެ.

އިންޑޮނޭޝިއާގެ ގާނޫނުތަކަކީ މަސްތުވާތަކެތީގެ މައްސަލަތަކުގައި ދުނިޔޭގައިވެސް އޮތް އެންމެ ހަރުކަށި ގާނޫނުތަކެވެ. މި ކުށުގެ އަދަބެއްގެ ގޮތުން އެ ޕައިލެޓަށް މަރުގެ އަދަބު ނުވަތަ އުމުރަށް ޖަލަށްލުން ފަދަ ހަރުކަށި އަދަބެއް ލިބުމުގެ ފުރުސަތު ބޮޑެވެ. އިންޑޮނޭޝިއާގައި އެންމެ ފަހުން މަރުގެ އަދަބު ތަންފީޒުކޮށްފައިވަނީ 2016 ވަނަ އަހަރުއެވެ. އެ އަހަރު މަސްތުވާތަކެތީގެ މައްސަލައެއްގައި އިންޑޮނޭޝިއާ މީހަކާއި ނައިޖީރިއާގެ ތިން މީހެއްގެ ގަޔަށް ބަޑިޖަހައި ވަނީ މަރުގެ އަދަބު ދީފައެވެ.