ޖަގުއާރގެ އިލެކްޓްރިކް ކޮންސެޕްޓް ކާރު ތަޢާރަފުކުރުމުން ޚިޔާލު ތަފާތުވެއްޖެ

ލަގްޒަރީ ކާރު އުފައްދާ ކުންފުނި ޖަގުއާރއިން އެ ކުންފުނީގެ އައު އިލެކްޓްރިކް ކޮންސެޕްޓް ކާރު ތަޢާރަފުކޮށްފިއެވެ. މިއީ މި ކާރާ ގުޅޭ ޓީޒަރ ވީޑިއޯއެއް ދައްކާލުމަށްފަހު އޮންލައިންގައި ޚިޔާލު ތަފާތުވުންތަކެއް އުފެދުނު ތާ މަދު ދުވަސްކޮޅެއްގެ ތެރޭގައި ކުރި ކަމެކެވެ.

ޓައިޕް 00 ނަމުގައި ތަޢާރަފުކުރި މި ކާރާ ގުޅޭގޮތުން ސޯޝަލް މީޑިއާގައި ފެނުނީ އެކަމާއި ދެކޮޅު ޚިޔާލުތަކެވެ. ބައެއް މީހުން މި ކާރުގެ ޑިޒައިނަށް ތަޢުރީފުކުރިއިރު އަނެއްބައި މީހުން މި ކާރު ތަޢާރަފުކުރި ގޮތާމެދު ފާޑުކިޔައިފިއެވެ.

ޖަގުއަރގެ އިލެކްޓްރިކް ކާރު

ފާއިތުވި މަހު، މި އައު ކާރު މޮޑެލް ތަޢާރަފުކުރުމުގެ ކުރިން ދެއްކި ޕްރޮމޯޝަނަލް ވީޑިއޯގައި އެއްވެސް ކާރެއް ނުދެއްކިކަން ގިނަ ފާޑުކިޔާ ފަރާތްތަކުން ފާހަގަކޮށްފައިވެއެވެ. ނަމަވެސް، ބައެއް މީހުން މި ކުންފުނިން ހިތްވަރުގަދަ ފިޔަވަޅެއް އަޅައި، އާ ގޮތްތަކެއް ގެނައުމަށް މަސައްކަތްކުރާތީ ތަޢުރީފުކޮށްފައިވެއެވެ.

މައާމީގައި ބޭއްވުނު ޓައިޕް 00 ތަޢާރަފުކުރުމުގެ ރަސްމިއްޔާތުގައި، ޔޫކޭގައި މައި އޮފީސް ހުންނަ މި ކުންފުނީގެ ޗީފް ކްރިއޭޓިވް އޮފިސަރ ޖެރީ މެކްގޮވަން ވިދާޅުވީ ޖަގުއާރގެ އައު އުފެއްދުމަށް ސަމާލުކަން ލިބެމުންދާތީ އުފާކުރައްވާ ކަމަށެވެ.

"މިހާރުވެސް މީގެ ސަބަބުން އިހުސާސްތައް އުފެދިއްޖެ. އަދި ކުރިއަށް އޮތްތަނުގައިވެސް އެކަން ކުރިއަށްދާނެ،" އޭނާ ވިދާޅުވިއެވެ. "ހުރިހާ އެންމެންގެ ލޯބި ހޯދުމުގެ އެއްވެސް ޝައުޤެއް ޖަގުއާރއަކަށް ނެތް."

ޖަގުއާރގެ އައުއުފެއްދުމާއި ގުޅިގެން މީހުން ސޯޝަލް މީޑިއާ ޕޯސްޓުތަކުގައި މި ކާރާ ގުޅޭގޮތުން ދީފައިވާ ކޮމެންޓްގެ ތެރޭގައި "އަލުން ޑިޒައިންކުރަން ފަށާ" އަދި "އުންމީދުކުރަނީ މިއީ ނުނިކުންނާނެ ކާރަކަށް ވުން" ފަދަ ނުރުހުމުގެ ކޮމެންޓުތަކާއި "މޮޅު އުފެއްދުމެއް" އަދި "ވަރަށް ރީތި" ފަދަ ތަޢުރީފުގެ ބަސްތައް ހިމެނެއެވެ.

ކާރު އިންޑަސްޓްރީގެ ދިރާސާވެރިއެއް ކަމަށްވާ ކާލް ބްރޯއަރ ވިދާޅުވީ މި ބްރޭންޑް އަލުން ތަޢާރަފުކުރުމާ މެދު ޝައްކު އުފެދޭ ކަމަށެވެ. ރަނގަޅު މުސްތަޤުބަލެއްގެ އުންމީދުގައި ޖަގުއާރގެ މާޒީ ޤުރުބާންކުރަނީ ކަމަށް ފެނޭ ކަމަށް  ބީބީސީއަށް ދިން އިންޓަރވިއުއެއްގައި ވިދާޅުވިއެވެ. މިކަން ކާމިޔާބުވާނެ ކަމަށް ނުދެކޭ ކަމަށް އޭނާވަނީ ބުނެފައެވެ.