ދުނިޔެ
ރައީސް ބައިޑަން ދަރިކަލުން ހަންޓަރއަށް މަޢާފު ދެއްވައިފި

އެމެރިކާގެ ރައީށް ޖޯ ބައިޑަން އަދި ދަރިކަލުން ހަންޓަރ ފޮޓޯ: އިންޓަނެޓް
އެމެރިކާގެ ރައީސް ޖޯ ބައިޑަން އޭނާގެ ދަރިކަލުން، ހަންޓަރ ބައިޑަންގެ މައްޗަށް އުފުލާފައިވާ ދަޢުވާތަކަށް މަޢާފު ދެއްވައިފިއެވެ. މި މަޢާފު ދެއްވުމާއެކު، 2014 ޖަނަވަރީ 1 އިން 2024 ޑިސެންބަރު 1 އާ ދެމެދު ހަންޓަރ ކުރައްވާފައިވާ ހުރިހާ ކުށެއް ބާޠިލުވެގެން ދިޔައެވެ.
ރައީސް ބައިޑަން މި ނިންމެވުން ނިންމެވީ، ހަންޓަރގެ މައްޗަށް ޓެކުހަށް މަކަރު ހެއްދެވުމުގެ ދަޢުވާގެ ޝަރީޢަތް ހިނގަމުންދަނިކޮށެވެ. މީގެ ކުރިން އޭނާގެ މައްޗަށް ހަތިޔާރާ ގުޅޭ ދަޢުވާއެއް ވެސް ވަނީ ސާބިތުވެފައެވެ.
ވައިޓް ހައުސުން ނެރުނު ބަޔާނެއްގައި ރައީސް ބައިޑަން ވިދާޅުވެފައިވަނީ، "މިއަދު، އަޅުގަނޑުގެ ދަރިފުޅަށް މަޢާފު ދިނުމުގެ ލިޔުމުގައި ސޮއިކުރިން. ވެރިކަމާ ޙަވާލުވި ދުވަހުން ފެށިގެން އަޅުގަނޑު ބުނަމުން ގޮސްފައި ވާނެ، ޝަރުޢީ އިދާރާގެ ކަންކަމަށް ނުފޫޒު ނުފޯރުވާނަމޭ، އަދި އެ ގޮތުގައި އަޅުގަނޑު ދެމިހުރީމު، ނަމަވެސް، އަޅުގަނޑުގެ ދަރިފުޅާ ދެކޮޅަށް ނާއިންސާފުން ޝަރިޢަތް ހިންގާ މަންޒަރު ބަލާކަށް ނުހުރެވޭނެ" ކަމަށެވެ.
މި ނިންމެވުމާ ގުޅިގެން ރިޕަބްލިކަން ޕާޓީން ވަނީ ބައިޑަންގެ އަމަލު ވަރަށް ބޮޑަށް ކުށްވެރިކޮށްފައެވެ. އިންތިޚާބީ-ރައީސް ޑޮނަލްޑް ޓްރަމްޕް މިކަން ސިފަކުރެއްވީ "ނާއިންސާފުން ހިންގާފައިވާ އަނިޔާވެރި އަމަލެއް" ގެ ގޮތުގައެވެ.
ހަންޓަރއަށް މަޢާފު ދެއްވުމުގެ ކުރިން، އޭނާގެ މައްޗަށް ދޮގުހެކި ދިނުމާއި ހަތިޔާރު ގެންގުޅުމާ ގުޅޭ މާ ގުޅޭ މައްސަލައެއްގައި ދަޢުވާ ސާބިތުވެ، ޙުކުމް އިއްވަން ތައްޔާރުވެފައިވާ ދަނޑިވަޅެއްގައެވެ. އަދި، ދައުލަތަށް ޓެކުހުގެ ގޮތުގައި ދައްކަވަން ޖެހޭ 1.4 މިލިޔަން އެމެރިކާ ޑޮލަރު އޮޅުވައިލައްވައިގެން އޭނާ ވަނީ ޓެކުހަށް މަކަރު ހައްދަވާފައެވެ.
މި ހާދިސާއަކީ އެމެރިކާގެ ސިޔާސީ މަސްރަޙުގައި ބޮޑު ހަލަބޮލިކަމެއް އުފެދިގެން ދިޔަ ކަމެކެވެ. އަދި ރައީސް ބައިޑަންގެ ނިންމެވުމާމެދު ގިނަ ފާޑުކިޔުންތަކެއް އަމާޒުވެގެން ދިޔައެވެ.