ބަހެއް އެކްސިޑެންޓްވެ 5 މެޑިކަލް ދަރިވަރުން މަރުވެއްޖެ

ހޯމަ ދުވަހުގެ ރޭ 9 ގެ ހާއިރު އިންޑިއާގެ ކޭރަލާ ސްޓޭޓުގެ އަލަޕުޒާ ޑިސްޓްރިކްޓުގައި ހިނގި ނުރައްކާތެރި  ހާދިސާއެއްގައި 5 މެޑިކަލް ދަރިވަރުން މަރުވެއްޖެއެވެ. މި ހާދިސާ ހިނގީ ވަންދަނަމް މެޑިކަލް ކޮލެޖުގެ 7 ދަރިވަރުން ދުއްވަމުންދިޔަ ޝެވްރޮލެޓް ޓަވެރާ ކާރެއް ކޭރަލާ ސްޓޭޓް ރޯޑް ޓްރާންސްޕޯޓޭޝަން ކޯޕަރޭޝަން (ކޭއެސްއާރްޓީސީ) ގެ ބަހަކާ  ޖެހުމުންނެވެ.

އޮފިޝަލުން ބުނާ ގޮތުގައި މި ހާދިސާގައި މަރުވި ދަރިވަރުންނަކީ މުހައްމަދު، މުހްސިން، އިބްރާހީމް، ދޭވާނަންދް އަދި ޝްރީދީޕްއެވެ. މީގެ ތެރެއިން 3 ދަރިވަރުން މަރުވެފައިވަނީ ހާދިސާ ހިނގި ތަނުގައެވެ. އަނެއް 2 ދަރިވަރުން މަރުވެފައިވަނީ ހޮސްޕިޓަލަށް ގެންދިޔުމުގެ ތެރޭގައެވެ. މި ހާދިސާގައި އަނިޔާވި އިތުރު 2 ދަރިވަރުން ފަރުވާ ދިނުމަށް އަލަޕުޒާ މެޑިކަލް ކޮލެޖް ހޮސްޕިޓަލަށް ގެންދެވިފައިވެއެވެ.

ފުލުހުން ބުނާ ގޮތުގައި ގުރުވަޔޫރުން ކަޔަމްކުލަމަށް ދަތުރުކުރަމުންދިޔަ ބަހުގައި ތިބި 4 ފަސިންޖަރުންނަށް ކުދި އަނިޔާތަކެއް ވެފައިވެއެވެ. ނަމަވެސް އެ ފަރާތްތަކުގެ ހާލަތު ރަނގަޅު ކަމަށް ބުނެފައިވެއެވެ.

އެވަަގުތު މަގުމަތީގައި ތިބި މީހުން ބުނާ ގޮތުގައި މި ހާދިސާ ހިނގީ ކާރު އެހެން އުޅަނދެއް އޯވަރޓޭކް ކުރަން އުޅުމުގެ ތެރޭގައި ކުއްލިއަކަށް ބްރޭކް ޖެއްސިވަގުތު ބަހުގައި  ޖެހުމުންނެވެ. މި ހާދިސާ ހިނގި ސަބަބު ދެނެގަތުމަށް ތަހުގީގު ކުރަމުންދާ ކަމަށް ފުލުހުން ބުނެފައިވެއެވެ.