ގުލާބީމަގުގައި ހުރި ގެއެއަކުން ޚަބަރު ހުސްވެފައޮތް މީހަކު ފެނިއްޖެ

މިއަދު ހެނދުނު ގުލާބީމަގުގައި ހުރި ގެއެއްގެ ތެރޭގައި މީހަކު ޚަބަރު ހުސްވެފައިއޮތް ކަމުގެ ރިޕޯޓެއް ލިބުމާ ގުޅިގެން ފުލުހުން ވަނީ އެ ސަރަޙައްދުގައި ހަރަކާތްތެރިވެފައެވެ.

އެމީހާ އައި.ޖީ.އެމް.އެޗަށް ގެންދިޔައިރުވެސް ނިޔާވެފައިވާ ކަމަށް އައި.ޖީ.އެމް.އެޗުން ފުލުހުންނަށް މަޢުލޫމާތު ދީފައިވެއެވެ.

ނިޔާވެފައި އޮއްވައި ފެނިފައިވަނީ މ. ހުދު އަކިރި، ޢަބްދުﷲ ޙަސަން (53 އަހަރު) އެވެ. މީހާގެ ހަށިގަނޑުން އެއްވެސް އަނިޔާއެއް ފެންނަން ނެތް ކަމަށް ހޮސްޕިޓަލުން މަޢުލޫމާތު ދީފައިވެއެވެ.

މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ. މި ހާދިސާއާ ގުޅޭ އިތުރު މަޢުލޫމާތު ލިބުމުން އާންމުކުރާނެ ކަމަށް ފުލުހުން ވަނީ ބުނެފައެވެ.
 

އިއްޔެގެ ވަގުތެއްގައިވެސް ހުލުމާލޭގެ ފަޅުތެރެއިން ޚަބަރުހުސްވެފައިވާ މީހަކު ފެނުނު ކަމުގެ މަޢުލޫމާތު ލިބިފައެވެ. ފަޅުތެރިއިން ނިޔާވެފައި އޮއްވާފެނުނީ މ.މަޑުއްވަރީ ކޮކޮނަޓް ވިލާ އިބްރާހީމް ޖިނާހް ނަމަކަށް ކިޔާ 36 އަހަރުގެ ފިރިހެނެކެވެ.