ވޯލްޑް ޓްރެވަލް އެވޯޑްސް 2026: ވީ.އައި.އޭ އާއި މާމަހި ލައުންޖް ޝަރަފުވެރި ދެ ކެޓަގަރީއަކުން ނޮމިނޭޓްވެއްޖެ

ވެލާނާ އިންޓަރނޭޝަނަލް އެއަރޕޯޓް (ވީ.އައި.އޭ) އާއި އެ އެއަރޕޯޓުގެ މާމަހި އެގްޒެކެޓިވް ލައުންޖް، ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެވޯޑް ކަމަށްވާ "ވޯލްޑް ޓްރެވަލް އެވޯޑްސް 2026" ގެ ދެ ކެޓަގަރީއަކުން ނޮމިނޭޓްވެއްޖެއެވެ. މިކަން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ވަނީ ރަސްމީކޮށް އިޢުލާނުކޮށްފައެވެ.

މި ފަހަރުގެ އެވޯޑުގައި ވެލާނާ އިންޓަރނޭޝަނަލް އެއަރޕޯޓް ނޮމިނޭޓްވެފައިވަނީ "އިންޑިއަން އޯޝަންސް ލީޑިންގ އެއަރޕޯޓް 2026" ގެ މަޤާމަށެވެ. މިއީ މި ސަރަޙައްދުގައި ފާހަގަކޮށްލެވޭ އެންމެ ކުރިއަރާފައިވާ އެއް އެއަރޕޯޓުގެ ގޮތުގައި ވީ.އައި.އޭ އިން ދަމަހައްޓަމުންދާ މަޤާމު ރަމްޒުކޮށްދޭ ކަމެކެވެ. 

ފާހަގަކޮށްލެވޭ ގޮތުގައި، ވީ.އައި.އޭ އިން ވަނީ މީގެ ކުރިން 12 ފަހަރަކު މި ޝަރަފުވެރި ލަޤަބު ކާމިޔާބުކޮށްފައެވެ.

މީގެ އިތުރުން، އެއަރޕޯޓުގެ މާމަހި އެގްޒެކެޓިވް ލައުންޖް ނޮމިނޭޓްވެފައިވަނީ "އިންޑިއަން އޯޝަންސް ލީޑިންގ އެއަރޕޯޓް ލައުންޖް 2026" ގެ މަޤާމަށެވެ. މިއީ ފަސިންޖަރުންނަށް ފެންވަރު ރަނގަޅު އަދި އަރާމު ޚިދުމަތްތަކެއް ފޯރުކޮށްދިނުމަށް އެ ލައުންޖުން ކުރަމުންދާ މަސައްކަތްތަކަށް ބައިނަލްއަޤުވާމީ ފެންވަރުގައި ލިބުނު ބޮޑު ބަލައިގަތުމެކެވެ.

1993 ވަނަ އަހަރު އުފެދުނު ވޯލްޑް ޓްރެވަލް އެވޯޑްސްއަކީ ދަތުރުފަތުރާއި، ފަތުރުވެރިކަމުގެ ދާއިރާގައި ދުނިޔޭގެ ފެންވަރުގައި ދެވޭ އެންމެ ޝަރަފުވެރި އެއް އެވޯޑެވެ. މި އެވޯޑަށް ރާއްޖޭގެ މައި އެއަރޕޯޓާއި ލައުންޖް ނޮމިނޭޓްވުމަކީ ދިވެހިރާއްޖޭގެ ފަތުރުވެރިކަމުގެ ސިނާޢަތަށް ލިބޭ ބޮޑު ކުރިއެރުމެކެވެ.

އެމް.އޭ.ސީ.އެލް އިން ހާމަކުރި ގޮތުގައި، މި ނޮމިނޭޝަންތަކަކީ އެއަރޕޯޓުގެ ޚިދުމަތްތައް ތަރައްޤީކޮށް، ފަސިންޖަރުންގެ ތަޖުރިބާ އިތުރަށް ފުރިހަމަކުރުމަށާއި، ދިވެހިރާއްޖޭގެ މައި ދޮރާށީގެ ގޮތުގައި ވެލާނާ އިންޓަރނޭޝަނަލް އެއަރޕޯޓުގެ މަޤާމު ވަރުގަދަކުރުމަށް އެ ކުންފުނިން މެދުނުކެނޑި ކުރަމުންދާ މަސައްކަތްތަކުގެ ހެއްކެކެވެ.

ވޯޓު ދެއްވުމަށް:

ވެލާނާ އިންޓަރނޭޝަނަލް އެއަރޕޯޓް – އިންޑިއަން އޯޝަންސް ލީޑިންގ އެއަރޕޯޓް 2026
https://www.worldtravelawards.com/vote-for-velana-international-airport-maldives-2026 

މާމަހި އެގްޒެކެޓިވް ލައުންޖް – އިންޑިއަން އޯޝަންސް ލީޑިންގ އެއަރޕޯޓް ލައުންޖް 2026
https://www.worldtravelawards.com/vote-for-maamahi-executive-lounge-maldives-2026