އިމިގްރޭޝަން ވޮޗަށް 1000 އަށްވުރެ ގިނަ މައްސަލަ

ރާއްޖޭގައި ޤަވާއިދާ ޚިލާފަށް އުޅޭ ބިދޭސީންނާ ގުޅޭ މައްސަލަތައް ހުށަހެޅުމަށް ޤާއިމުކުރި "އިމިގްރޭޝަން ވޮޗް" އަށް މިހާތަނަށް 1000 އަށްވުރެ ގިނަ މައްސަލަ ހުށަހަޅާފައިވާކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.

މިއަހަރުގެ ޖުލައި މަހުގެ 17 ވަނަ ދުވަހު ތަޢާރަފުކުރި މި އޮންލައިން ޕްލެޓްފޯމަކީ ބިދޭސީންނާ ގުޅުންހުރި މައްސަލަތައް ރިޕޯޓްކުރުމަށް މިހާތަނަށް ޤާއިމުކުރެވުނު އެންމެ ހަރުދަނާ ނިޒާމުކަމަށް ސަރުކާރުން ފާހަގަކުރެއެވެ.

މޯލްޑިވްސް އިމިގްރޭޝަނުން މަޢުލޫމާތު ދެއްވިގޮތުގައި ނޮވެމްބަރު މަހުގެ ނިޔަލަށް އިމިގްރޭޝަން ވޮޗަށް 1017 މައްސަލަ ހުށަހަޅާފައިވެއެވެ. މީގެ ތެރެއިން އެންމެ ގިނައިން ހުށަހަޅާފައިވަނީ ބިދޭސީ މަސައްކަތްތެރިން ޤާނޫނާއި ގަވާއިދާ ޚިލާފަށް ވިޔަފާރިކުރާ މައްސަލަތަކެވެ. މިފަދަ 239 މައްސަލަ ހުށަހަޅާފައިވާކަމަށް އިމިގްރޭޝަނުން ވަނީ ހާމަކޮށްފައެވެ.

ދެވަނައަށް އެންމެ ގިނައިން ހުށަހަޅާފައިވަނީ ވޯކް ވިސާއާ ގުޅޭ 239 މައްސަލައެވެ. މީގެ އިތުރުން، ހަށިވިއްކުމުގެ 65 މައްސަލަ، މީހުން ގެއްލިގެން ރިޕޯޓްކުރި 41 މައްސަލަ، އަދި ޓޫރިސްޓް ވިސާއާ ގުޅޭ 14 މައްސަލަވެސް ހުށަހަޅާފައިވެއެވެ.

އިމިގްރޭޝަނުން އިތުރަށް ހާމަކުރިގޮތުގައި، ހުށަހެޅުނު 1017 މައްސަލައިގެ ތެރެއިން 39 މައްސަލަ މިހާރު ވަނީ ވެރިފިކޭޝަން މަރުޙަލާގައެވެ. އަދި 187 މައްސަލަ މިހާތަނަށް ވެރިފައިކުރެވިފައި ނުވާއިރު، އެ އިދާރާއާ  ގުޅުންނެތް 81 މައްސަލަވެސް ހުށަހަޅާފައިވެއެވެ.

ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުރުމަށް ސަރުކާރުން ދަނީ ޚާއްސަ އިސްކަމެއް ދެމުންނެވެ. މި މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން، އެހެނިހެން ރަށްރަށާއި ރިސޯޓުތަކުގައި ދިރިއުޅޭ ބިދޭސީންގެ މަޢުލޫމާތު އެއްކުރުމުގެ މަސައްކަތްވެސް ކުރިއަށްދެއެވެ.

މިހާތަނަށް ގަވާއިދާ ޚިލާފަށް އުޅުނު 5000 އަށްވުރެ ގިނަ ބިދޭސީން ޑީޕޯޓްކޮށްފައިވާކަމަށް މޯލްޑިވްސް އިމިގްރޭޝަނުން ވަނީ ހާމަކޮށްފައެވެ. އަދި ރާއްޖޭގައި ތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް، ބިދޭސީންގެ މައްސަލަތައް 3 އަހަރުގެ ތެރޭގައި ޖުމްލަ ޙައްލެއް ގެނައުމަކީ ސަރުކާރުގެ އަމާޒެކެވެ.