ރާއްޖޭގައި ހުރި ހުރިހައި ނިޒާމެއް، ލާމަރުކަޒީ ނިޒާމަށް ފަހިވެފައި އަދި ނެތް: ވަޒީރު އާދަމް ޝަރީފު

ރާއްޖޭގައި ހުރި ހުރިހައި ނިޒާމެއް، ލާމަރުކަޒީ ނިޒާމަށް ފަހިވެފައި އަދި ނެތްކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ. 

ވަޒީރު އާދަމް ޝަރީފް މިހެން ވިދާޅުވީ މަތިވެރި ކައުންސިލުން ހިންގި މާލީ ބަޔާން ތައްޔާރުކުރާނެ ގޮތުގެ ތަމްރީނު ޕްރޮގްރާމް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

އިއްޔެ ހަވީރު މަތިވެރީގައި އޮތް މި ރަސްމިއްޔަތުގައި ވަޒީރުދެއްކެވި ވާހަކަފުޅުގައި ވިދާޅުވެފައިވަނީ، ތަނެއް އޯޑިޓްކުރާ ވާހަކަ މީހަކު ބުނެފި ނަމަ އެ ތަނެއްގައި އުޅޭ ބަޔަކު މީގެ ކުރިން ބިރުގަންނަ ކަމަށާ، ނަމަވެސް އޯޑިޓްކުރުމަކީ ނުވަތަ އޯޑިޓް ރިޕޯޓެއް ނެރުމަކީ ތަނެއްގައި ގޯހުން ކަމެއް ދާނަމަ އެ ކަމެއް ރަނގަޅުކުރުމަށް އެހީތެރިވެދީ އެ ކަމެއް ރަނގަޅުކުރާނެ ގޮތް ބުނެދިނުން ކަމަށެވެ.

މި ރަސްމިއްޔާތުގައި ވަޒީރު އާދަމް ޝަރީފު ދެއްކެވި ވާހަކަފުޅުގައި ތަމްރީނު ޕްރޮގްރާމުތަކަކީ ނުވަތަ ޕޮރޮފެޝަނަލް ޑިވޮލޮޕްމެންޓް ޕްރޮގްރާމުތަކަކީ ނުހަނު ބޭނުންތެރި އޭގެ ސަބަބުން ގިނަގުނަ ފައިދާތަކެއް މުއައްސަސާތަކަށް ލިބިގެންދާނެ ކަމެއްކަމަށް ވިދާޅުވިއެވެ. 

މީގެއިތުރުން ކުރިއަށް އޮތްތަނުގައި މި ފަދަ ޕްރޮގްރާމުތައް ރާއްޖޭގެ ތަފާތު ކަންކޮޅުތަކުގައި ހިންގުމަށް އިސްކަންދެއްވާނެ ކަމަށް ވިދާޅުވިއެވެ. ވަޒީރު އާދަމް ޝަރީފް އިތުރަށް ވިދާޅުވީ އެނގިގެން ކުރާ މަސައްކަތްތަކާ ނޭނގި ކުރާ މަސައްކަތްތަކުގައި ބޮޑެތި ތަފާތުތަކެއް ހުންނަ ފަދައިން އެނގިގެން މަސައްކަތްކުރުމަކީ ކުރާ މަސައްކަތް އިތުރަށް ހަލުއިވެގެންދާ ކަމެއް ކަމަށެވެ.

 ވަޒީރު އާދަމް ޝަރީފު އިތުރަށް ވިދާޅުވީ އޮޑިޓަރ ޖެނަރަލް އޮފީހަކީ، ދައުލަތުގެ މާލިއްޔާތަށް އަދި ރައްޔިތުންގެ މުދަލަށް ވަރަށް ބޮޑަށް ހުޝިޔާރުވާ، އަދި އެއީ ރައްޔިތުންގެ މުދާކަން ދަނެގެން މަސައްކަތްކުރާ މުއައްސަސާއެއް ކަމަށެވެ.

އިއްޔެ ހަވީރު މަތިވެރީގައި އޮތް މި ރަސްމިއްޔަތުގައި ބަންޑާރަ ނައިބާއި، އަރިއަތޮޅު އުތުރުބުރީ އަތޮޅު ކައުންސިލްގެ ރައީސާއި، މަތިވެރި ކައުސިލްގެ ރައީސާއި، އަތޮޅު ކައުންސިލާއި، މަތިވެރި ކައުންސިލްގެ މެންބަރުންނާއި، ވުޒާރާގެ ސްޓޭޓް މިނިސްޓަރ މުޙައްމަދު މާހިރާއި، ޝަރަފުއްދީން އަބޫބަކުރާއި އަދި އއ. އަތޮޅު ބެލެހެއްޓުމާއި ޙަވާލުވެ ހުންނެވި މި ވުޒާރާގެ ނާއިބު އަޙްމަދު ޙަލީމް ބައިވެރިވެ ވަޑައިގެންނެވިއެވެ.

މަތިވެރީގައި ބޭއްވި މި ތަމްރީން ޕްރޮގްރާމަކީ މަތިވެރިކައުންސިލާއި، ބަންޑާރަ ނައިބުގެ އޮފީސް ގުޅިގެން މަތިވެރީގައި ހިންގި، މާލީ ބަޔާން ތައްޔާރުކުރާނެ ގޮތުގެ ތަމްރީނު ޕްރޮގްރާމެކެވެ.