އިންޑިއާގެ ސީޖޭޕީގެ އިހުތިޖާޖުތަކުން ހާމަވީ އައު ޖީލުގެ ވިސްނުން

އިންޑިއާގެ ވެރިރަށް ދިއްލީގެ މަގުތަކަށް އެތައް ހާސް ޒުވާނުންނެއް ނުކުމެ، ޒިންމާދާރުކުރުވުމާއި، ދެފުށް ފެންނަ ނިޒާމަކަށް ގޮވާލައި ބޮޑު އިހުތިޖާޖެއް ބާއްވައިފައިވާއިރު، ކޮކްރޯޗް ޖަންތާ ޕާޓީ (ސީޖޭޕީ) އާ ގުޅިގެން ކުރިއަށްދިޔަ މި މުޒާހަރާތަކަކީ ހަމައެކަނި ސިޔާސީ ވާދަވެރިކަމެއް ނޫން ކަމަށާއި މި މުޒާހަރާތަކުން ދައްކުވައިދިނީ އިންޑިއާގެ އައު ޖީލުގެ ވިސްނުން ކަމަށް އިންޑިއާގެ މަޝްރަޙް ދިރާސާކުރާ ފަރާތްތަކުން ބުނެފިއެވެ.

މި އިހުތިޖާޖުތަކުން ހާމަވެގެން ދިޔައީ އިންޑިއާގެ އެންމެ ހަގު ޖީލު، ނުވަތަ ޖެނެރޭޝަން ޒީ އިން ސިޔާސީ މަސްރަޙާއި، ދައުލަތުގެ މުއައްސަސާތަކާއި، އަދި އިޖުތިމާއީ އަދުލުވެރިކަމާ މެދު ދެކޭ ގޮތަށް އައިސްފައިވާ ބޮޑު ބަދަލެވެ. މިއީ ހަމައެކަނި އިންޑިއާގައި ހިނގާ ކަމެއް ނޫނެވެ. ހޮންކޮންގް، ޗިލީ، ފަރަންސޭސިވިލާތް އަދި ބަންގްލަދޭޝް ފަދަ ގައުމުތަކުގައި ވެސް ޒުވާނުން އިސްވެ ތިބެ، އިންސާފާއި ޒިންމާދާރުކުރުވުމަށް ގޮވާލައި ކުރާ ހަރަކާތްތަކުގެ ބައެކެވެ.

މި މުޒާހަރާތަކުގެ މައިގަނޑު އަސާސަކީ އިންޑިއާގެ މެޑިކަލް އެންޓްރަންސް އިމްތިހާން، ނީޓްއާ ގުޅޭގޮތުން އުފެދުނު ޝައްކުތަކެވެ. "މެރިޓް ނުވަތަ އަމިއްލަ ގާބިލިއްޔަތަށް ބަލައި ފުރުސަތު ލިބޭނެ ކަމުގެ ޔަގީންކަން ގެއްލުމަކީ" އިންޑިއާގެ މިލިއަނުން ބެލެނިވެރިންނާއި ދަރިވަރުންގެ މެދުގައި އޮތް އެންމެ ބޮޑު ކަންބޮޑުވުމެވެ. އިމްތިހާނުގެ ކަރުދާސް ލީކުވި ކަމަށް ބުނާ ވާހަކަތަކާ އެކު، މުޅި ތައުލީމީ ނިޒާމުގެ އިތުބާރު ވަނީ ގެއްލިފައެވެ.

މި ހަރަކާތްތައް ފެށުނީ ވަކި ކަމަކާ ގުޅިގެން ކަމަށް ވިޔަސް، ވަގުތު ފާއިތުވަމުން ދިޔަ ވަރަކަށް މިއީ ސިޔާސީ ބޮޑު ކުރިމަތިލުމަކަށް ބަދަލުވެގެން ދިޔައެވެ. ތާރީޚުން ފެންނަން އޮތް ގޮތުގައި، އާންމުންގެ ހަގީގީ ކަންބޮޑުވުންތަކުން ފެށޭ ހަރަކާތްތަކުގެ ތެރެއަށް ސިޔާސީ ފަރާތްތަކުން ވަދެ، އޭގެ ނާޖާއިޒު ފައިދާ ނެގުމަކީ ޑިމޮކްރަސީތަކުގައި އާންމު ކަމެކެވެ. މީގެ ކުރިން އަންނާ ހަޒާރޭ އިސްވެ ހުރެ ކުރިއަށް ގެންދިޔަ ކޮރަޕްޝަނާ ދެކޮޅު ހަރަކާތަކީ ވެސް މިފަދަ މިސާލެކެވެ.

މި މުޒާހަރާތަކުން ސަރުކާރުތަކަށް ލިބިގެންދާ ފިލާވަޅަކީ، ޒުވާން ޖީލުގެ ކަންބޮޑުވުންތަކަށް ހަރުދަނާ ހައްލެއް ހޯދައިދޭން ޖެހޭ ކަމެވެ. ޑިމޮކްރަސީއެއް ވަރުގަދަވަނީ އާންމުންގެ ހަގީގީ ޝަކުވާތައް އަޑުއަހައި، މުއައްސަސާތައް އިސްލާހު ކުރުމުންނެވެ. ނަމަވެސް، ހަމައެކަނި ސިޔާސީ މަންފާއަށްޓަކައި މިފަދަ ކަންކަން ބޭނުންކުރުމަކީ ނިޒާމު ބަލިކަށިވާނެ ކަމެކެވެ.

ސީޖޭޕީގެ އިހުތިޖާޖުތައް މީޑިއާގެ ސުރުޚީތަކުން ފަނޑުވެގެން ދިޔަ ނަމަވެސް، މި ޖީލުން ދެއްކި ހިތްވަރާއި ވިސްނުން ދެމިއޮންނާނެއެވެ. ކުރިއަށް އޮތް ދިހަ އަހަރުގެ ސިޔާސީ މަސްރަޙު ބައްޓަންވާނީ މި ބަދަލުތައް ދެނެގަނެ، މުއައްސަސާތަކަށް އިތުބާރު ހޯދައިދޭން މަސައްކަތްކުރާ ބަޔަކަށެވެ. ސަރުކާރަކަށް އޮތް އެންމެ ބޮޑު ގޮންޖެހުމަކީ ސިޔާސީ ކުޅިވަރުތަކުގެ ބަދަލުގައި، ހަގީގީ އިސްލާހީ ބަދަލުތައް ގެނައުމެވެ.