ޚަބަރު
މާކަނޑުގެ ދިރުންތައް ހިމާޔަތްކުރުމުގެ މުއާހަދާގައި ރާއްޖެއިން ސޮއިކޮށްފި!
ބީބީއެންޖޭގައި ރާއްޖެއިން ސޮއިކުރުން. ފޮޓޯ: ޚާރިޖީ ވުޒާރާ
އދގެ އާންމު މަޖިލީހުގައި ފާސްކުރި މާކަނޑުގެ ދިރުންތަކާއި ސަރަޙައްދުތައް ހިމާޔަތްކުރުމާބެހޭ މުއާހަދާއެއްކަމަށްވާ "ބަޔޯޑައިވަރސިޓީ ބިޔޯންޑް ނޭޝަނަލް ޖުރިސްޑިކްޝަން" (ބީބީއެންޖޭ) ގައި ރާއްޖޭން ސޮއިކޮށްފިއެވެ.
އދ. މިދިޔަ އަހަރުން ޖޫން މަހު އެކުލަވާލި މުއާހަދާގައި ރާއްޖެއިން ސޮއި ކުރުމާއިއެކު، ރާއްޖެ ވެގެން ގޮސްފައިވަނީ މި މުއާހަދާގައި ސޮއި ކުރި 92 ވަނަ ޤައުމަށެވެ.
މިކަމާއި ގުޅޭ ގޮތުން ޚާރިޖީ ވަޒީރު މޫސާ ޒަމީރު ވިދާޅުވެފައިވަނީ، މިއީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ރާއްޖޭގެ އެންމެ އަގުހުރި ވަސީލަތްތައް ކަމުގައިވާ ކަނޑާއި އޭގެ ދިރުންތައް ހިމާޔަތްކުރުމަށް ކުރައްވާ މަސައްކަތުގެ ހެއްކެއް ކަމަށެވެ.
ކަނޑު ހިމާޔަތްކޮށް ރައްކާތެރިކުރުމުގެ މައްޗަށް ދިވެހިން ބަރޯސާވާކަން ފާހަގަކުރައްވާ، ވަޒީރު ޒަމީރު ވިދާޅުވީ، ބީބީއެންޖޭ މުޢާހަދާއިން މާކަނޑުގެ ދިރުންތައް ހިމާޔަތްކުރުމަށް ކުރެވޭ މަސައްކަތްތައް އިތުރުވެގެންދާނެކަމަށާއި، މިކަމުގެ ސަބަބުން ފަތުރުވެރިކަމާއި މަސްވެރިކަމުގެ ސިނާޢަތަށް ކުރިއެރުން ލިބިގެންދާނެކަމަށެވެ.
Today, the Maldives signed the #BBNJ Agreement as its 92nd signatory.
— Moosa Zameer (@MoosaZameer) September 4, 2024
The signing of the Agreement is a testament to President Dr @MMuizzu's commitment to protect our most cherished resources - the ocean and its biodiversity. The people of #Maldives heavily rely on the… pic.twitter.com/C8PT4Tztik
ވަޒީރު ޒަމީރު ވިދާޅުވީ، މިއީ ކަނޑު ހިމާޔަތްކުރުމަށް ގިނަ ފަރާތްތަކެއް ގުޅިގެން މަސައްކަތްކުރުމަށްވާ ވައުދުގެ ރަމްޒެއް ކަމަށާއި، މިކަމުގައި ރާއްޖެއިން އަދާކުރަން ޖެހޭ ދައުރު އަދާކުރުމަށް ތައްޔާރަށް ތިބި ކަމަށެވެ.
ބީބީއެންޖީގައި ރާއްޖެއިން ބައިވެރިވުމަށް ވަޒީރުންގެ މަޖިލީހުން ލަފާދެއްވާފައިވަނީ މިއަހަރުގެ ފެބްރުއަރީމަހުއެވެ.
މި މުޢާހަދާ އަކީ މާކަނޑުގެ ދިރުންތަކާއި ސަރަޙައްދުތައް ހިމާޔަތްކޮށް ރައްކާތެރިކުރުމުގެ އިތުރުން، ދެމެހެއްޓެނިވި ގޮތުގައި ބޭނުންކުރުމަށް މަގުފަހިކުރުމަށް އެކުލަވާލާފައިވާ މުޢާހަދާއެކެވެ.
