ގުޅީފަޅާއި ތިލަފުށްޓާ ދެމެދު ކަނޑުއޮޅި ބަންދުކުރަނީ

އަންނަ ބުރާސްފަތި ދުވަހުން ފެށިގެން ގުޅީފަޅާއި ތިލަފުށްޓާ ދެމެދު ކަނޑުއޮޅިން ދަތުރު ނުކުރުމަށް އިމާރާތްކުރުމާއި ބިނާރާބެހޭ ވުޒާރާއިން މިއަދު އަންގައިފިއެވެ.

މިނިސްޓްރީން މިއަދު ނެރުނު އިއުލާނެއްގައި ބުނެފައިވަނީ މާލެއާއި ތިލަފުށްޓާ ދެމެދު ބުރިޖު އެޅުމުގެ މަޝްރޫއުގެ ދަށުން ގުޅީފަޅާއި ތިލަފުށްޓާ ދެމެދު ކަނޑުގައި ތަނބު ޖެހުމުގެ މަސައްކަތް މި ހަފުތާގެ ބުރާސްފަތި ދުވަހު ފެށުމަށް ހަމަޖެހިފައިވާ ކަމަށެވެ. މި މަސައްކަތާ ގުޅިގެން އެ ދުވަހުން ފެށިގެން ގުޅީފަޅާއި ތިލަފުށްޓާ ދެމެދު ކަނޑުއޮޅި ބަންދުވާނެ ކަމަށާއި، ކަނޑު އުޅަނދުފަހަރު އެ ސަރަހައްދުން ދަތުރު ނުކުރުމަށް އަންގާފައިވެއެވެ.

މީގެ އިތުރުން، މާލެއާއި ވިލިމާލެއާ ދެމެދު ކަނޑުއޮޅި އަދި ވިލިމާލެއާއި ގުޅީފަޅާ ދެމެދު ކަނޑުތައްވެސް ބަންދުކޮށްފައިވާތީ، އެ ސަރަހައްދުތަކުންވެސް ދަތުރު ނުކުރުމަށް މިނިސްޓްރީން އަންގާފައިވެއެވެ.

މާލެ-ތިލަފުށި ބުރިޖުގެ މަޝްރޫއަކީ އިންޑިއާގެ އެގްޒިމް ބޭންކުން ދޭ 400 މިލިއަން ޑޮލަރުގެ ލޯނު އެހީގެ ދަށުން ކުރިއަށްގެންދާ މަޝްރޫއެކެވެ. މި މަޝްރޫއުގެ މަސައްކަތާ އިންޑިއާގެ އެފްކޮންސްއާ ހަވާލުކުރެވުނީ 2021 ވަނަ އަހަރުގެ އޮގަސްޓު މަހުގެ ތެރޭގައެވެ.