ޙައްލުކުރަންޖެހޭ ގިނަ ކަންތައްތަކެއް ހުރުމުން އެކަންކަން ހައްލުނުކޮށް “އޮޅުހިޔާ”އަށް ބުޅާތައް ނުގެންދަން އިލްތިމާސްކޮށްފި

ހައްލުކުރަންޖެހޭ ގިނަ ކަންތައްތަކެއް ހުރުމުން އެކަންކަން ހައްލުނުކޮށް “އޮޅުހިޔާ” އަށް ބުޅާތައް ނުގެންދަން ދަނޑުވެރިކަމާ ދިރޭ ތަކެއްޗާ ބެހޭ ވުޒާރާއިން އިލްތިމާސްކޮށްފިއެވެ. 

މިކަމާ ގުޅިގެން ދިރޭތަކެއްޗާ ބެހޭ ވުޒާރާއިން ބުނެފައިވަނީ މާލޭ ސިޓީގެ މަގުތަކުގައި އުޅޭ ބުޅާތައް އޮޅުހިޔާއަށް ގެންދިއުމުގައި ޢަމަލުކުރާނެ އެސްއޯޕީތަކާއި، ޕްލޭންތަކާއި، ލަފާތައް އެވުޒާރާއިން މާލޭ ސިޓީ ކައުންސިލާ ހިއްސާކޮށްފައިވާނެ ކަމަށެވެ. ނަމަވެސް އެވުޒާރާއިން ހިއްސާކުރި އެއްވެސް ކަމަކަށް އެކައުންސިލުން އެއްވެސް ކޮމަންޓެއް ޚިޔާލެއް ލިބިފައިނުވާކަމަށެވެ. 

މާލެސިޓީ ކައުންސިލުން މިކަމުގައި އެއްބާރުލުން ލިބެމުންނުދިއުމާއި ޙައްލު ކުރަން ޖެހޭ ގިނަ ކަންތައްތަކެއް ހުރުމުން “އޮޅުހިޔާ” އަށް ބުޅާ ގެންދިޔުމަށް ނުފެންނަ ކަމަށް ދިރޭތަކެއްޗާ ބެހޭ ވުޒާރާއިން ވަނީ ބުނެފައެވެ. 

ޙައްލުކުރަން ޖެހޭ ކަންކަން ކަމަށް ދަނޑުވެރިކަމާ ބެހޭ ވުޒާރާއިން ބުނެފައިވާ ސަބަބުތަކަކީ:-

• އޮޅުހިޔާ އަދި އެތަނުގައި މަސައްކަތްކުރާ އެއްވެސް ފަންނީ މަސައްކަތްތެރިއެއް މިހާތަނަށް ރަޖިސްޓަރކުރެވިފައިނުވުން.
• އަލަށް ގެނެވޭ ބުޅާތައް ކަރަންޓީނުކުރުމަށް ބޭނުންވާ ކޮށިތައް އޮޅުހިޔާގައި ނެތުން.
• އޮޅުހހިޔާގައި އޮޕަރޭޝަންތައް ހިންގުމަށް އެކަށީގެންވާ ނިޒާމެއް ޤާއިމްވެެފައި ނެތުން.
• އޮޅުހިޔާގައި އުފެދޭ ނުރައްކާތެރި ބަޔޮލޮޖިކަލް ވޭސްޓް ނައްތާލުމަށް އެއްވެސް ނިޒާމެއް ޤާއިމްވެފައި ނެތުން
• އޮޅުހިޔާއަށް މިވަގުތު ގެންދެވޭ ބުޅާތަކަށް އަޅާލާނެ އެއްެވެސް މުވައްޒަފެއް ހަމަޖައްސައިފައި ނެތުން. 
• އޮޅުހިޔާއިން ޚިދުމަތްދިނުމަށް ބޭނުންވާ ބޭސް ނުވަތަ ބޭސް ހޯދުމަށް މިވަގުތު އެއްވެސް ނިޒާމެއް ހަމަޖެހިފައި ނެތުން. 
• އޮޅުހިޔާގެ މަސައްކަތްތައް އިތުރަށް ހަރުދަނާ ކުރުމަށްޓަކައި ބައެއް ސްޓްރަކްޗަލް ބަދަލުތައް ގެނައުމަށް ވުޒާރާއިން ސިޓީ ކައުންސިލަށް ހުށައަޅައިފައިވުން.

ދިރޭތަކެއްޗާ ބެހޭ ވުޒާރާއިން ބުނެފައިވަނީ “އޮޅުހިޔާ”އިން ޚިދުމަތް ދޭން ފެށުމުގެ ކުރިން މިމައްސަލަތައް ހައްލުކުރަން ޖެހޭ ކަމަށާއި، އެވުޒާރާއިން މިކަންކަމާ ބެހޭ އަދާހަމަތައް ހޯދުމަށާއި މިމައްސަލަތައް ހައްލުކުރުމަށް ސިޓީ ކައުންސިލުގައި އެދިފައިވާކަމަށެވެ.

https://twitter.com/MAAWmv/status/1863890890491896230

ނަމަވެސް މިކަންކަން އަދި މިހާތަނަށް ކުރެވިފައިނުވާ ކަމަށާއި، އެކަންކަން ފުރިހަމަނުކޮށް “އޮޅުހިޔާ” އަށް ބުޅާތައް ނުގެންދިޔުމަށް ސިޓީ ކައުންސިލަށް އެވުޒާރާއިން އިލްތިމާސް ކުރާ ކަމަށް ވަނީ ބުނެފައެވެ.