ފަހަތުން އަރައި މެޗު ކާމިޔާބުކޮށް، ނައިފަރުން ކެންދޫގެ ބާރު ކަނޑުވާލައިފި

އެއް ގޯލު ފަހަތުން އަރައި ނައިފަރުން ކެންދޫ ބަލިކޮށް، ކެންދުއަށް ނައިންޓީ ޕްލަސް ގޯލްޑް ކަޕްގެ ދެވަނަ ބުރުން ޖާގައެއް ލިބުމުގެ ބާރު ކަނޑުވާލައިފިއެވެ. މެޗުގެ ކުރީކޮޅު ގޯލެއް ޖަހާ ކެންދޫއިން ލީޑު ނަގާފައިވަނިކޮށް، ނައިފަރުން ފަހަތުން އަރާ މެޗު ކާމިޔާބުކުރީ އިމްރާން މުހައްމަދު ކާމިޔާބުކުރި 2 ގޯލުންނެވެ. މި މެޗު 2-1 އިން ނައިފަރުން ކާމިޔާބު ކުރިއިރު، އެ ޓީމަށް ވަނީ ގްރޫޕްގެ ދެވަނަ ޔަގީން ވެފައެވެ.

މެޗުން ބަލިވި ނަމަވެސް، އެއް ޕޮއިންޓާއެކު ގްރޫޕް-ޑީގެ ދެވަނަ ބުރުގެ ޖާގައެއް ކެންދޫއަށް ލިބުމަކީ އެކަށީގެންވާ ކަމެކެވެ. ނަމަވެސް އެހެން ވާނީ، މިއަދު ހަވީރު މާފުއްޓާއި އަލިފުށި ބައްދަލުކުރާ މެޗުގައި އަލިފުށިން 5 ގޯލުގެ ތަފާތަކުން މެޗު ކާމިޔާބުކޮށްފިނަމައެވެ. އޭރުން އެންމެ ޕޮއިންޓަކާއެކު ދެވަނަ ބުރަށް ދާ ހަމައެކަނި ޓީމަކަށް ވާނީ ކެންދޫއެވެ. އަލިފުށިން މިއަށް ވުރެން ތަފާތު ކުޑަކޮށް މެޗު ކާމިޔާބުކޮށްފިނަމަ، އެ ފުރުސަތު އޮންނާނީ މާފުއްޓަށެވެ.

ކެންދޫ ބަލި ކުރުމަށްފަހު ނައިފަރުން މިވަނީ 3 މެޗުން 6 ޕޮއިންޓު ހޯދާ، ގްރޫޕް-ޑީގެ ދެވަނަ ޔަގީން ކޮށްފައެވެ. ސަބަބަކީ މިއަދުގެ ހަވީރު މެޗުން މާފުށި މޮޅުވި ނަމަވެސް، އެ ޓީމަށް ޖުމްލަ 4 ޕޮއިންޓު ލިބުމެވެ.

ރޭގެ މެޗުގައި ކެންދޫއިން ލީޑު ނެގީ މެޗުގެ 2 ވަނަ މިނެޓުގައެވެ. އެ ޓީމަށް މި ގޯލު ކާމިޔާބުކޮށްދިނީ މަލްސޫން ޔާމީނެވެ. މިއީ ނައިފަރުގެ ޕެނަލްޓީ އޭރިއާ ބޭރުން އޭނާ ކާމިޔާބުކުރި ގޯލެކެވެ.

ނައިފަރުން ނަތީޖާ ހަމަހަމަ ކުރި ގޯލަކީ ވެސް އޭރިއާ ބޭރުން ފޮނުވާލި ބޯޅައެކެވެ. މެޗުގެ 19 ވަނަ މިނެޓުގައި އިމްރާން ފޮނުވާލި މި ހަމަލާ އަމާޒުވެފައި ވަނީ ކެންދޫ ގޯލުގެ މަތީ ކަނަށެވެ.

ފުރަތަމަ ހާފު 1-1 އިން އޮވެ ނިމުނު ނަމަވެސް، ދެ ޓީމަށް ވެސް ވަނީ ލީޑު ނަގާނެ ރަނުގެ ފުރުސަތުތައް ލިބި ބޭކާރުވެފައެވެ. 

އަދި ދެވަނަ ހާފުގައި ކެންދޫ އިން ވަނީ އެމީހުންގެ ލީޑު އަނބުރާ ހޯދުމަށް ގިނަ މަސައްކަތްތަކެއް ކޮށްފައެވެ. ނަމަވެސް، އެ ހަމަލާތައް ގޯލަކަށް ބަދަލު ނުކުރެވުނީސް، ނައިފަރުން ލީޑު ނެގިއެވެ. މިއީ މެޗުގެ 74 ވަނަ މިނެޓުގައި އިމްރާން ކާމިޔާބުކޮށްދިން ގޯލެކެވެ.

މި މުބާރާތުގައި މިއަދު ހަވީރު ގްރޫޕް-ޑީގައި އަލިފުއްޓާއި މާފުށި ބައްދަލުކުރާއިރު، ރޭގަނޑު ކުޅޭ މެޗުގައި ބައްދަލުކުރާނީ ގްރޫޕް-އޭގެ ފުވައްމުލަކާއި ފާރެސްމާތޮޑާއެވެ. ދެވަނަ ބުރުގެ ޖާގައެއް ލިބޭތޯ ބެލުމަށް، ފަރެސްމާތޮޑާއިން މި މެޗު ކާމިޔާބުކުރަން ޖެހޭނެއެވެ.