ޚަބަރު
އާސަންދައިން ބޭސް ނުލިބެނީއެއްނޫން ، ބައެއް ފާމަސީތަކުން އިތުރު ފައިދާ ލާފަ ވިއްކަނީ

އާސަންދަ އޮފީސް ފޮޓޯ:މޯލްޑިވްސް ފައިނޭންޝަލް ރިިވިއު
ފަހަކަށް އައިސް އިޖުތިމާޢީ މީޑިއާގައި ދެކެވެމުންދާ ވާހަކަތަކުން ދައްކާގޮތުގައި، އާސަންދަ އިންޝުއަރެންސް ސްކީމާ މެދު ރައްޔިތުންގެ މެދުގައި އޮޅުންތަކެއް އުފެދެމުންދާކަން ފާހަގަކުރެވެއެވެ. ބައެއް ފަރާތްތަކުން ބުނާގޮތުގައި އާސަންދައިން މިހާރު ބޭސް ނުދޭކަމަށާއި، އަމިއްލަ ޖީބުން ޚަރަދުކޮށްގެން ބޭސް ގަންނަން ޖެހޭކަމަށް ދަޢުވާކުރެއެވެ. ނަމަވެސް މި މައްސަލައިގެ ޙަޤީޤަތް މިއަށްވުރެ ތަފާތެވެ.
އާސަންދައިން ބޭހުގެ އަގުތައް އެއްހަމަކޮށްފައިވަނީ ކުރިން "ފައިދާ" ގެ ނަމުގައި ނަގަމުން އައި ބޮޑެތި އަގުތައް ހުއްޓުވުމަށެވެ. ނަމަވެސް ބައެއް އަމިއްލަ ފާމަސީތަކުން މިހާރުވެސް ބޭސް ވިއްކަމުންދަނީ އާސަންދައިން ފާސްކޮށްފައިވާ އަގުތަކަށްވުރެ މަތީ އަގުގައެވެ. މިގޮތުން އިތުރަށް ނަގާ އަގު ދައްކަންޖެހެނީ ކަސްޓަމަރުންނެވެ. މިކަމުގެ ސަބަބުން އާސަންދައިން ބޭސް ނުދޭކަމަށް ގިނަ ބަޔަކު ވަނީ ދެކެން ފަށާފައިވެއެވެ.
އެސްޓީއޯގެ ފާމަސީތަކުން ލިބޭ ބޭސްތަކުގެ އަގުތައް ހުންނަނީ އާސަންދައިން ކަނޑައަޅާފައިވާ މިންގަނޑުތަކާ އެއްގޮތަށެވެ. އެހެންކަމުން މިތަންތަނުން ބޭސް ނަގާ ފަރާތްތަކަށް އިތުރު އަގެއް ދައްކާކަށް ނުޖެހެއެވެ. މިކަމުން ދައްކައިދެނީ ފާމަސީތަކުގެ އަގު ކަނޑައެޅުމުގެ އުސޫލުތަކާއި އާސަންދައިގެ ޚިދުމަތްތައް ލިބޭ ތަންތަނާ ބެހޭގޮތުން ރައްޔިތުން ހޭލުންތެރިވުމަކީ މުހިންމު ކަމެކެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު އަދި ނޭޝަނަލް ސޯޝަލް ޕްރޮޓެކްޝަން އޭޖެންސީ އެންސްޕާގެ ސީއީއޯ ހީނާ ވަލީދު ވަނީ، އާސަންދައިގެ ދަށުން އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރަމުންދާކަން ފާހަގަކުރައްވާފައެވެ. އަދި އޭގެ ނަތީޖާއެއްގެ ގޮތުން ރައްޔިތުންނަށް ބޮޑެތި ގެއްލުން ލިބެމުންދާކަމަށް ވިދާޅުވެފައެވެ. މިގޮތުން އާސަންދަ އިސްލާޙުކުރުމަށް ކުރަމުންދިޔަ މަސައްކަތުގެ ތެރެއިން ބައެއް ބޭސް ގަންނަ އަގަށްވުރެ ބޮޑު އަގުގައި އާސަންދައަށް ބިލްކޮށްފައިވާކަމަށާއި، ގަވާއިދާ ޚިލާފު އެތައްކަމެއް ހިންގަމުންދާކަން ހާމަވެފައިވެއެވެ.
ލޮލުގެ ފަރުވާގައި ބޭނުންކުރާ އެންމެ ޚަރަދު ބޮޑު އެއް ބޭސްކަމުގައިވާ ލުސެންޓިސް އިންޖެކްޝަންގެ އަގު ބެލުމަށްޓަކައި އާސަންދައިން އެދުމުން ފޮނުވި އިންވޮއިސްތަކުން، މި ބޭސް އެ ފަރާތަށް ގަންނަން ލިބޭ އަގަށްވުރެ ބޮޑުތަނުން ބޮޑުކޮށް އާސަންދައަށް ބިލްކޮށްފައިވާކަންވަނީ ފާހަގަވެފައެވެ. އެގޮތުން މިބޭސް ރާއްޖެއަށް 500 ޑޮލަރަށް ގެނެސް 1492 ޑޮލަރަށް އާސަންދައަށް ބިލްކޮށްފައިވެއެވެ.
އާސަންދައިން ކުރާ އިސްރާފާއި ގަވާއިދާ ޚިލާފަށް ހިންގަމުންދާ ޖަރީމާތައް ހުއްޓުވުމަށް ސަރުކާރުންދަނީ މަސައްކަތް ކުރަމުންނެވެ. މިގޮތުން އެންމެ ބޭނުންޖެހޭ ފަރާތްތަކަށް ލިބޭ އެއްޗަކަށް އާސަންދަ ހެދުމަށްދަނީ އުޞޫލުތަކަށް ބަދަލު ގެނައުމުގެ މަސައްކަތް އަންނަނީ ކުރަމުންނެވެ. މިއާއެކު ސަރުކާރުގެ އަމާޒު ހުރީ އާސަންދަ ނިޒާމުގެ ތެރެއިން ކުރެވޭ އިސްރާފު ކުޑަކޮށް، މި ނިޒާމު އިތުރަށް ހަރުދަނާކޮށް ދެމެހެއްޓެނިވިގޮތެއްގައި ހިންގުމަށެވެ.