ޕްލޭސްޓޭޝަންގެ ވެރިން: އޭ.އައި އިން ގޭމިންގ އާ ހަޔާތެއް ގެނުވިދާނެ، އެކަމަކު އިންސާނީ އުފެއްދުންތެރިކަން ނުފޮހެވޭނެ

ޕްލޭސްޓޭޝަން ކޮންސޯލް ވުޖޫދަށް  އައިތާ 30 އަހަރު ފުރުމާ ގުޅިގެން، ސޯނީގެ ޕްލޭސްޓޭޝަންގެ ވެރިން ބީބީސީއަށް ދެއްވި ޚާއްޞަ އިންޓަވިއުއެއްގައި، އާޓިފިޝަލް އިންޓެލިޖެންސް (އޭ.އައި) އިން ގޭމިންގ ދާއިރާއަށް ގެނެވިދާނެ ބަދަލުތަކާ ބެހޭގޮތުން ވާހަކަދައްކަވައިފިއެވެ.

ޕްލޭސްޓޭޝަންގެ ބޮސް ހަރމަން ހަލްސްޓް ވިދާޅުވި ގޮތުގައި، އޭ.އައި އިން ގޭމިންގ ދާއިރާއަށް "އިންޤިލާބީ" ބަދަލުތަކެއް ގެނެވިދާނެއެވެ. ނަމަވެސް، އިންސާނުން އުފައްދާ ގޭމްތަކުގައި ހުންނަ "އިންސާނީ ޓަޗް" އޭ.އައި އަށް ދުވަހަކުވެސް ބަދަލު ނުކުރެވޭނެ ކަމަށް އޭނާ ޤަބޫލުކުރައްވައެވެ.

މި އިންޓަވިއުގައި ބައިވެރިވެވަޑައިގެންނެވި އަނެއް ސީ.އީ.އޯ ހިދެއަކި ނިޝިނޯ ވެސް މިކަމާ ގުޅޭގޮތުން ވާހަކަފުޅު ދައްކަވާފައިވެއެވެ. ޕްލޭސްޓޭޝަން 5 ކޮންސޯލްގެ ކާމިޔާބީއާއި އެކު، މިދިޔަ އަހަރަކީ ސޯނީއަށް ކާމިޔާބު އަދި ގޮންޖެހުންތަކާ ކުރިމަތިލާންޖެހުނު އަހަރެއް ކަމަށް ވެސް އެ ދެ ބޭފުޅުން ފާހަގަކުރެއްވިއެވެ.

ކޮވިޑް-19 ބަލިމަޑުކަމަށްފަހު ގޭމިންގ ދާއިރާއަށް އައި މަޑުޖެހުމާ ގުޅިގެން، ގިނަ ކުންފުނިތަކުން ވަޒީފާތައް އުވާލަން ޖެހުނު ނަމަވެސް، އޭ.އައި ގެ ސަބަބުން ވަޒީފާތަކަށް ކުރިމަތިވެދާނެ ނުރައްކަލާ މެދު ގޭމް ޑިވެލޮޕަރުން ކަންބޮޑުވުން ފާޅުކޮށްފައިވެއެވެ.

ހަލްސްޓް ވިދާޅުވި ގޮތުގައި، އޭ.އައި އިން ގޭމިންގ ދާއިރާއަށް ބަދަލުތަކެއް ގެންނަމުންދާއިރު، އިންސާނީ ޑިވެލޮޕަރުންނަށް އަބަދުވެސް ޖާގަ އޮންނާނެއެވެ. "ގޭމިންގ ދާއިރާގައި ދެ ބާވަތެއްގެ ޑިމާންޑެއް އުފެދޭނެ ކަމަށް އަހަރެން ލަފާކުރަން. އެއީ އޭ.އައި އިން ފަރުމާކުރެވޭ އައު ތަޖުރިބާތަކަށާއި، އިންސާނުން އަމިއްލައަށް ފަރުމާކޮށް އުފައްދާ މުއްސަނދި ކޮންޓެންޓަށް،" އޭނާ ބީބީސީއަށް ވިދާޅުވިއެވެ.