ދުވަހަކުވެސް ރަސްމީ ރޭޓުގައި ޑޮލަރު ދޫނުކުރާ މިންވަރަށް މި ސަރުކާރުން ދަނީ ޑޮލަރު ދޫކުރަމުން: ވަޒީރު ސައީދު

ރާއްޖޭގަައި މިހާތަނަށް ރަސްމީ ރޭޓުގައި ބޭންކުތަކުން ޑޮލަރު ދޫނުކުރާ މިންވަރަށް، މިހާރު ވިޔަފާރިތަކަށާއި އާންމު ފަރުދުންނަށް ޑޮލަރު ދޫކުރަމުންދާ ކަމަށް އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

ވަޒީރު ސައީދު މިހެން ވިދާޅުވީ، ރާއްޖޭގެ އިގްތިސާދީ ހާލަތާ ގުޅޭގޮތުން އިދިކޮޅު ފަރާތްތަކުން ފަތުރަމުންދާ ދޮގު މައުލޫމާތުތަކަށް ރައްދު ދެއްވަމުންނެވެ. ވަޒީރު ވިދާޅުވީ އިދިކޮޅުން މިފަދަ ވާހަކަތައް ދައްކަނީ މާކެޓުގައި ނުތަނަވަސްކަން އުފައްދައި، ބްލެކް މާކެޓަށް ހިތްވަރުދީ، ސިޔާސީ ބޭނުމަށް މީހުން މުޒާހަރާއަށް ޖަމާކުރުމަށް ކަމަށެވެ. ނަމަވެސް، މިއަދު ރައްޔިތުންނަށް ހަގީގަތް އެނގޭނެ ކަމަށް ވަޒީރު ވިދާޅުވިއެވެ.

ތަފާސްހިސާބުތަކުން ފެންނަ ބޮޑު ތަފާތު

މިދިޔަ އެމްޑީޕީ ސަރުކާރުގެ އަހަރުތަކާއި މިހާރުގެ ހާލަތު އަޅާކިޔުއްވަމުން ވަޒީރު ވަނީ ތަފާސްހިސާބުތައް ހިއްސާކުރައްވާފައެވެ:

ބޭންކް ކާޑުތައް: 2021 ވަނަ އަހަރު ބޭންކް ކާޑުތަކަށް މަހަކު ދޫކުރީ ގާތްގަނޑަކަށް 10 މިލިއަން ޑޮލަރެވެ. ނަމަވެސް މިހާރު މަހަކު 39 މިލިއަން ޑޮލަރު ކާޑުތަކަށް ދޫކުރެއެވެ.

ވިޔަފާރިތަކަށް ދޭ ޓީޓީ ސަޕޯޓް: 2021 ގައި މަހަކު އެވްރެޖްކޮށް ދޫކުރީ 6.7 މިލިއަން ޑޮލަރެވެ. މިހާރު އެ އަދަދު ވަނީ 26.6 މިލިއަން (ގާތްގަނޑަކަށް 27 މިލިއަން) ޑޮލަރަށް އިތުރުވެފައެވެ. ކުރިން ބޭންކު މެދުވެރިކޮށް ހެދެނީ އިމްޕޯޓުގެ %5 ނަމަވެސް، މިހާރު %30 އާއި %40 އާ ދެމެދުގެ އަދަދަކަށް ޓީޓީ ހަދައިދެއެވެ.

ދަރިވަރުންގެ ކިޔެވުން: 2021 ގައި ދަރިވަރުންނަށް ދޫކުރީ 1.9 މިލިއަން ޑޮލަރެވެ. މިހާރު އެ އަދަދު ވަނީ ދެގުނަ އިތުރުވެ، 3.6 މިލިއަން (ގާތްގަނޑަކަށް 4 މިލިއަން) ޑޮލަރަށް އަރާފައެވެ.

ބޭސްފަރުވާ (މެޑިކަލް): 2021 ގައި ގާތްގަނޑަކަށް 159,000 ޑޮލަރު އަދި 2022/2023 ގައި 3 ލައްކަ ޑޮލަރު ދޫކުރިއިރު، މިހާރު މަހަކު 3 މިލިއަން ޑޮލަރު ރަސްމީ ރޭޓުގައި ދޫކުރެއެވެ.

ބޭރަށް ދަތުރުކުރާ މީހުން: 2021 ގައި 1.5 މިލިއަން ޑޮލަރު ދޫކުރިއިރު، މިހާރު މަހަކު 10 މިލިއަން ޑޮލަރު ރަސްމީ ރޭޓުގައި ބޭންކުން ދޫކުރެއެވެ.

ވަޒީރު ސައީދު ވިދާޅުވީ، ބޭންކިންގް ސިސްޓަމް ތެރެއަށް ޑޮލަރު ނުވައްދާ ބްލެކް މާކެޓުގައި ޑޮލަރު ވިއްކާ ފަރާތްތަކަށް ހިތްވަރު ލިބޭ ގޮތަށް ކުރީގެ ވެރިން ވާހަކަ ދެއްކެވުމަކީ ޒިންމާދާރުކަން ކުޑަ އަމަލެއް ކަމަށެވެ. ރައީސް ނަޝީދުގެ ވެރިކަމުގައި ޑޮލަރު ނުލިބިގެން ކިއު ހެދުމުން، ކޮންމެ ޑޮލަރެއްގެ ފަހަތުގައި ފުލުހަކު ބަހައްޓަން ޖެހޭނެ ކަމަށް ވިދާޅުވި ހަނދާން ވެސް ވަޒީރު އާކުރެއްވިއެވެ.

މީގެ އިތުރުން، ކުރީ ސަރުކާރުން ފައިސާ ޗާޕުކުރުމުގެ ސަބަބުން ރުފިޔާގެ އަގު ވެއްޓުނު ކަމަށާއި، އޭރު ކޮވިޑް ތެރޭގައި ބޭރުން ގިނަ ފައިސާ ލިބުނު އިރުވެސް ބަޖެޓުގައި ނެތް އެތައް މަޝްރޫއެއް އިންތިހާބާ ދިމާކޮށް ހިންގާފައިވާ ކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ކުރީ ސަރުކާރުން ދިވެހިންގެ ބޮލުގައި އެޅުވި 1.2 ބިލިއަން ޑޮލަރުގެ ބޮޑު ލޯނު ދައްކާފައި ކަމަށެވެ. އަދި ރަހުނުކޮށްފައި ހުރި ސުކޫލުތަކާއި ހޮސްޕިޓަލްތައް ސަލާމަތްކޮށް، އެއާޕޯޓް ޓާމިނަލް ހުޅުވައި، ވިޔަފާރި ބަނދަރުގެ މަސައްކަތް ބާރަށް ކުރިއަށްދާ ކަމަށް ވިދާޅުވިއެވެ.

"ދުނިޔޭގެ ހާލަތު ބަދަލުވެ، އަވަށްޓެރި ގައުމުތަކުން ކައްކާ ގޭސް ހުސްވި އިރުވެސް، ރާއްޖޭގައި ހަނޑޫ، ހަކުރު، ފުށާއި ތެޔޮ ހުސްނުވެ ލިބެން ހުރީ ސަރުކާރުގެ ހަރުދަނާ ސިޔާސަތުގެ ސަބަބުން،" ވަޒީރު ވިދާޅުވިއެވެ.

ނިންމަވާލައްވަމުން ވަޒީރު ވިދާޅުވީ، ރާއްޖޭގެ ޓޫރިޒަމް ދާއިރާގައި 10 ބިލިއަން ޑޮލަރުގެ މަޝްރޫއުތައް ހިނގަމުންދާ މިދަނޑިވަޅުގައި، ގައުމުގެ އިގްތިސާދަށް ނުރައްކާވާ ފަދަ ދޮގު ވާހަކަތައް ނުދެއްކުމަށް އެންމެހާ ފަރާތްތަކަށް އިލްތިމާސްކުރައްވާ ކަމަށެވެ.