Ads by Exprox

ޚަބަރު

ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމަށް އެޗްޑީސީން އެއްބާރުލުން ލިބޭނެ

ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމަށް އެޗްޑީސީން އެއްބާރުލުން ލިބޭނެ

ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު

އާމިނަތު ޔުމްނާ

އާމިނަތު ޔުމްނާ

04 ޑިސެމްބަރު 2024، 10:04

04 ޑިސެމްބަރު 2024، 10:04

ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމަށް ބޭނުންވާ ކަންކަން ފަހިކޮށްދޭނެ ކަމުގެ ޔަގީންކަން ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ދެއްވައިފިއެވެ.

ނޫސްވެރިންނަށް މަޢުލޫމާތު ދެއްވަމުން ފަޒުލް ވިދާޅުވީ، އެޗްޑީސީން މާލޭ ސިޓީ ކައުންސިލަށް ދޫކޮށްލަނީ ހަމައެކަނި މުނިސިޕަލް ޚިދުމަތްތަކާ ގުޅޭ ކަންކަން ކަމަށާއި، މިކަން ކުރުމަށް މާލޭ ސިޓީ ކައުންސިލަށް ދޭންޖެހޭ އެންމެހައި އެއްބާރުލުން އެ ކުންފުނީގެ ފަރާތުން ދެއްވާނެ ކަމަށެވެ. އަދި މުނިސިޕަލް ޚިދުމަތްތައް ރައްޔިތުންނާ ހަމައަށް ފޯރުކޮށްދިނުމަށް ނުވަތަ މާލޭ ސިޓީ ކައުންސިލްގެ ޤާނޫނީ އިމުގެ ތެރެއިން ކުރަންޖެހޭ ކަންތައްތައް ކުރުމަކަށް އެ ކޯޕަރޭޝަންގެ އެއްވެސް ހުރަހެއް ނެތް ކަމަށް އޭނާ ވިދާޅުވިއެވެ.

"މިތިބީ އެ ފުރުޞަތު އެ ބޭފުޅުންނަށް ފަހިކޮށްދޭން. މީގައި އަޅުގަނޑު ޤަބޫލުކުރާ ގޮތުގައި ގޮންޖެހުންތަކެއް އެ ބޭފުޅުންނަށް އަމާޒުވެފައި އެ އޮތީ އެ ބޭފުޅުން މިކަން ކޮމާޝަލީ ވަޔަބަލް ކުރާނީ ކިހިނެއްތޯ،" އެޗްޑީސީގެ މެނޭޖިންގ ޑިރެކްޓަރ ފަޒުލް ވިދާޅުވިއެވެ.

މިކަމުގެ ފަހުމުނާމާއެއްގައި ސޮއިކުރެވި، ގައިޑްލައިންތަކެއް ކަނޑައެޅި، އެކަމުގެ މަސައްކަތްތައް މިހާރު ކުރެވެމުންދާ ކަމަށް ވެސް ފަޒުލް ވަނީ ވިދާޅުވެފައެވެ.

މިކަމާ ގުޅޭގޮތުން މާލޭ ސިޓީ ކައުންސިލްގެ ޑެޕިއުޓީ މޭޔަރ އަޙްމަދު ނަރީޝް ވިދާޅުވީ، މިކަމުގައި މާލޭ ސިޓީ ކައުންސިލަށް ދިމާވާ އެންމެ ބޮޑު ހުރަހަކީ މާލީގޮތުން ހުރި ދަތިތައް ކަމަށާއި، މިފަދަ ޚިދުމަތެއް ދިނުމަށް ހަވާލުވާއިރު މާލޭ ސިޓީ ކައުންސިލުން ބޭނުންވަނީ އެޗްޑީސީން އެ ޚިދުމަތް ދެމުން އަންނަ ގޮތަށްވުރެ ރަނގަޅަށް އެ ޚިދުމަތް ދިނުން ކަމަށެވެ.

ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލްގެ ދަށަށް ބަދަލުކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެއްކަން ފާހަގަކޮށްލެވެއެވެ.
                    

މި ލިޔުން ކިޔާލުމުން

Ads by MSS