ފަތުރުވެރިކަމުގެ ބާޒާރަށް ގެސްޓު ހައުސްތަކުން 1،000 އަށްވުރެ ގިނަ އެނދު އަލަށް ނެރެފި

މިއަހަރުގެ މިހާތަނަށް ފަތުރުވެރިކަމުގެ ބާޒާރަށް ގެސްޓު ހައުސްތަކުން 1،000 އަށްވުރެ ގިނަ އެނދު އަލަށް ނެރެފައިވާކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތަކުން ދައްކައިފިއެވެ. މި އަހަރު ފެށުނުއިރު ގެސްޓު ހައުސްތަކުން އޮޕަރޭޝަނަށް ގެނެސްފައިވާ އެނދުގެ އަދަދު ހުރީ 13،657 ގައި ކަމަށާއި، މިއީ 809 ގެސްޓް ހައުސްއަކުން އޮޕަރޭޝަނަށް ގެނެސްފައިވާ އެނދުކަމަށް ތަފާސްހިސާބުތަކުން ދައްކައެވެ.

ފަތުރުވެރިކަމާބެހޭ ވުޒާރާއިން އެންމެ ފަހުން ނެރެފައިވާ ޑެއިލީ އަޕްޑޭޓު ރިޕޯޓުގައިވާގޮތުން މިމަހުގެ ދެ ވަނަ ދުވަހުގެ ނިޔަލަށް 909 ގެސްޓް ހައުސްއަކުން 15،325 އެނދު ވަނީ އޮޕަރޭޝަނަށް ގެނެސްފައެވެ. މިއީ އަހަރު ފެށުނުއިރު އެނދުގެ ނިސްބަތް ހުރި އަދަދާއި އަޅާބަލާއިރު 1،214 އެނދުގެ އިތުރުވުމެކެވެ. އަދި މިއަހަރުތެރޭގައި މުޅިން އަލަށް 100 ގެސްޓުހައުސް ހުޅުވާފައިވާކަމަށް ވުޒާރާއިން ހާމަކޮށްފައިވެއެވެ.

ގެސްޓު ހައުސްތަކުން ގިނަ އަދަދެއްގެ އެނދު ފަތުރުވެރިކަމަށް ނެރެފައިވާއިރު، ރާއްޖޭގެ ފަތުރުވެރިކަމުގެ ޖުމްލަ އެނދުގެ އަދަދު ވަނީ 62،864 އަށް އިތުރުވެފައެވެ. މީގެތެރޭގައި ހިމެނެނީ ރިސޯޓުތަކުގެ 42،539 އެނދާއި ގެސްޓު ހައުސްތަކުގެ 15،325 އެނދާއި ސަފާރީތަކުން އޮޕަރޭޝަނަށް ގެނެސްފައިވާ 3،044 އެނދާއި ހޮޓާތަކުގެ 1،956 އެނދުކަމަށް ފަތުރުވެރިކަމާބެހޭ ވުޒާރާއިން ވިދާޅުވެއެވެ.

މިހާރު ފަތުރުވެރިންނަށް ހުޅުވާލާފައިވާ ޓޫރިސްޓު ފެސިލިޓީތަކުގެ ޢަދަދުތަކަށް ބަލާއިރު، 171 ރިސޯޓު، 909 ގެސްޓުހައުސް، 155 ސަފާރީ، އަދި 14 ހޮޓާ ހިމެނޭހެން ޖުމްލަ 1249 ޓޫރިސްޓު ފެސިލިޓީއެއް ވަނީ މިހާރު ފަތުރުވެރިންނަށް ހުޅުވާލާފައެވެ.