އޭ ލެވެލް އިމްތިހާނުގެ ނަތީޖާ ދޫކުރަން ފަށައިފި

މި އަހަރުގެ މެއި/ޖޫން މަހު ބޭއްވި އޭ ލެވެލް އިމްތިހާނުގައި ބައިވެރިވި ދަރިވަރުންގެ ނަތީޖާ މިއަދު ދޫކުރަން ފަށައިފިއެވެ.

ޑިޕާޓްމެންޓް އޮފް ޕަބްލިކް އެގްޒަމިނޭޝަންސް (ޑީޕީއީ) އިން ވިދާޅުވީ، ކޭމްބްރިޖް އައިޖީސީއެސްއީ އާއި އެސްއެސްސީ އިމްތިހާނު ހެދި ދަރިވަރުންނަށް މިއަދު މެންދުރު 12:00 އިން ފެށިގެން އެ ދަރިވަރަކު ނިސްބަތްވާ ސްކޫލަކުން ނަތީޖާ ދޫކުރަމުންދާ ކަމަށެވެ.

އަމިއްލަ ގޮތުން އިމްތިހާނުގައި ބައިވެރިވި ދަރިވަރުންނަށް ސެޓްފިކެޓް ދޫކުރުމަށް ހަމަޖެހިފައިވަނީ މިއަދުން ފެށިގެން އަންނަ މަހުގެ 15 ވަނަ ދުވަހުގެ ނިޔަލަށެވެ. މި މުއްދަތުގެ ތެރޭގައި ރަސްމީ ބަންދު ނޫން ކޮންމެ ދުވަހެއްގެ ހެނދުނު 8:30 އިން މެންދުރުފަހު 1:30 އަށް ޑީޕީއީ އިން ސެޓްފިކެޓް ދޫކުރާނެއެވެ.

ސެޓްފިކެޓް ބަލައިދާއިރު އަމަލުކުރަންޖެހޭ އުސޫލުތައް ބަޔާންކުރަމުން ޑީޕީއީން ވިދާޅުވީ، ސެޓްފިކެޓާ ހަވާލުވާން ދާއިރު އައިޑީ ކާޑު ގެންދަން ޖެހޭނެ ކަމަށެވެ. އަދި ބަދަލުގައި މީހަކު ފޮނުވާ ނަމަ، އިމްތިހާނު ހެދި ދަރިވަރުގެ އައިޑީ ކާޑުގެ ކޮޕީއަކާއި ބަލައިދާ މީހާގެ އައިޑީ ކާޑުގެ އަސްލު ގެންދަން ޖެހޭނެއެވެ.

މި އަހަރުގެ މެއި/ޖޫން އިމްތިހާނަކީ 2019 ވަނަ އަހަރަށްފަހު މެދުކަނޑާލާފައި އޮތުމަށްފަހު، އަމިއްލަ ގޮތުން އިމްތިހާނު ހަދާ ކެންޑިޑޭޓުންނަށް ލުއިފަސޭހަ ކޮށްދިނުމުގެ ގޮތުން މި ސަރުކާރުން އަލުން ހުޅުވާލި ފުރުސަތެކެވެ. މި އަހަރުގެ ފެބްރުއަރީ މަހު މި ފުރުސަތު ހުޅުވާލުމުން ޖުމްލަ 1,229 ދަރިވަރުން އިމްތިހާނުގައި ބައިވެރިވިއެވެ. މީގެ ތެރޭގައި ހިމެނެނީ މާލެއިން ބައިވެރިވި 916 ދަރިވަރުންނާއި، އައްޑޫ ސިޓީ ހިތަދޫން ބައިވެރިވި 147 ދަރިވަރުންގެ އިތުރުން ފުވައްމުލަކު ސިޓީން ބައިވެރިވި 27 ދަރިވަރުންނެވެ.

ތައުލީމާބެހޭ ވުޒާރާއިން ވިދާޅުވި ގޮތުގައި، މެއި/ޖޫން ސީރީސް އަލުން ފެށި ނަމަވެސް، ސްކޫލްތަކުގައި ކިޔަވާ ދަރިވަރުންގެ އޭ ލެވެލް އިމްތިހާނު ކުރިއެކޭވެސް އެއްގޮތަށް އޮންނާނީ އޮކްޓޫބަރު/ނޮވެމްބަރު މަހުގައެވެ. މި ބަދަލަކީ އަމިއްލަ ގޮތުން އިމްތިހާނުގައި ބައިވެރިވާން ބޭނުންވާ ފަރާތްތަކަށް އިތުރު ފުރުސަތެއް ފަހިކޮށްދިނުމަށް ނިންމެވި ނިންމުމެކެވެ.