އޮތެންޓިކް މޯލްޑިވްސްއިން ދިވެހި އުފެއްދުންތެރިންނަށް ރިކޯޑު އަދަދެއްގެ ފައިސާ ދޫކޮށްފި

ބިޒްނަސް ސެންޓަރ ކޯޕަރޭޝަން (ބީސީސީ) ގެ ދަށުން ހިންގާ އޮތެންޓިކް މޯލްޑިވްސްގެ ފިހާރަތަކުން ދިވެހި އުފެއްދުންތެރިންނަށް ރިކޯޑު އަދަދެއްގެ ފައިސާ  ދޫކޮށްފައިވާ ކަމަށް އެ ކުންފުނިން މިއަދު ހާމަކޮށްފިއެވެ. ބީސީސީން ބުނާ ގޮތުގައި ފާއިތުވި އަހަރަކީ އެ ކުންފުނީގެ ތާރީޚުގައި އެންމެ ކާމިޔާބު އަހަރެވެ.

ބީސީސީން ހާމަކުރި މަޢުލޫމާތުގައިވާ ގޮތުން، ފާއިތުވި އަހަރެއްހާ ދުވަހުގެ ތެރޭގައި އޮތެންޓިކް މޯލްޑިވްސްއިން 24.1 މިލިއަން ރުފިޔާ ސަޕްލަޔަރުންނަށް ދޫކޮށްފައިވެއެވެ. މިއީ އޮތެންޓިކް މޯލްޑިވްސްގެ 5 އަހަރުގެ ތެރޭގައި ދޫކުރި ފައިސާގެ ޖުމްލަ 27 އިންސައްތައެވެ. އަދި މި މުއްދަތުގެ ތެރޭގައި އޮތެންޓިކްގެ އެކިއެކި އައުޓްލެޓްތަކުން 3000 އަށްވުރެ ގިނަ އުފެއްދުން ވިއްކިފައިވާ ކަމަށްވެސް ބީސީސީން ބުނެފައިވެއެވެ.

މިހާރު އޮތެންޓިކް މޯލްޑިވްސްގެ ފިހާރަތަކުގައި 338 ވިޔަފާރިއަކުން އެމީހުންގެ ތަކެތި ވިއްކަމުންދާ ކަމަށް ބީސީސީން ހާމަކޮށްފައިވެއެވެ. މީގެ ތެރެއިން 60 އިންސައްތައަކީ އަންހެން ވިޔަފާރިވެރިންނެވެ. އަދި މިއަހަރުގެ ތެރޭގައި އެކަނިވެސް 38 އަށްވުރެ ގިނަ އައު ވިޔަފާރިތަކުން އެމީހުންގެ ތަކެތި ވިއްކަން އޮތެންޓިކްގެ ފިހާރަތަކަށް ލާފައިވާ ކަމަށް ބީސީސީން ބުނެފައިވެއެވެ.

މިއަހަރުގެ ތެރޭގައި އޮތެންޓިކް މޯލްޑިވްސްގެ ދެ އައު އައުޓްލެޓް ހުޅުވާފައިވެއެވެ. އެއީ ގަން އިންޓަނޭޝަނަލް އެއަރޕޯޓްގައި ހުޅުވި އައުޓްލެޓާއި، ތޮއްޑޫގައި ހުޅުވި އައުޓްލެޓެވެ. މިހާރު އޮތެންޓިކް މޯލްޑިވްސްގެ ޖުމްލަ 5 އައުޓްލެޓް ހުރި ކަމަށް ބީސީސީން ބުނެފައިވެއެވެ.

އޮތެންޓިކް މޯލްޑިވްސްއަށް ލިބުނު އާމްދަނީ އިތުރުވެފައިވަނީ ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެ، އުފެއްދުންތައް މާކެޓްކުރުމަށް ބީސީސީން ކޮށްފައިވާ ގިނަގުނަ މަސައްކަތްތަކުގެ ސަބަބުން ކަމަށް އެ ކުންފުނިން ބުނެފައިވެއެވެ. އަދި "ދިވެހިންނަށް އިސްކަން" މި ނަމުގައި އެ ކުންފުނިން ފެށި ކެމްޕެއިންގެ ސަބަބުން ފަތުރުވެރިންގެ އިތުރުން ދިވެހިންގެ މެދުގައިވެސް އޮތެންޓިކް މޯލްޑިވްސްއިން ވިއްކާ އުފެއްދުންތަކަށް އޮތް މަޤްބޫލުކަން އިތުރުވެފައިވާ ކަމަށްވެސް ބީސީސީން ފާހަގަކޮށްފައިވެއެވެ.