ރަށުން ބޭރުގައި މަޔޯކާ ބަލިކޮށް، ބާސެލޯނާއިން ލީގު ޓޭބަލްގައި ލީޑު ފުޅާކޮށްފި

ބާސެލޯނާގެ ދެ އަރިމަތިން ކުރިޔަށް ކުޅުނު ރަފީނިއާ އާއި ލެމިން ޔަމާލްގެ މޮޅު ކުޅުމާއެކު، ތިން މެޗަށްފަހު ލީގުގައި މޮޅެއް ހޯދައި، އެ ޓީމުން ދެވަނައިގައި އޮތް ރިއާލް މެޑްރިޑާ ފަރަގު ބޮޑު ކޮށްފިއެވެ. މަޔޯކާގެ ދަނޑުގައި ކުޅުނު މި މެޗު ބާސެލޯނާއިން ކާމިޔާބުކުރީ 5-1 އިންނެވެ.

މި މެޗުގައި ބާސެލޯނާއިން ވަނީ މެޗުގެ ކުރީކޮޅު ލީޑެއް ނަގާފައެވެ. މެޗުގެ 12 ވަނަ މިނެޓުގައި އެ ޓީމުގެ ގޯލު ކާމިޔަބުކޮށްދިނީ، އަރާމުކުރަން ވަގުތު ދީފައިވާ ރޮބަޓް ލެވަންޑޯސްކީގެ ބަދަލުގައި ކުޅެން ނިކުތް ފެރަން ޓޮރޭސްއެވެ. 

ނަމަވެސް ހާފު ނިމުމުގެ ކުރިން މަޔޯކާއިން ވަނީ މެޗުގެ ނަތީޖާ ހަމަހަމަކޮށްފައެވެ. މާޔޯކާގެ އެޓޭކަށް ކުޅޭ ކުޅުންތެރިން އޮފްސައިޑް މަޅީގައި ޖެއްސުމަށް ބާސެލޯނާގެ ޑިފެންޑަރުން ކުރިއަށް ޖެހިގެން ކުރަމުން ދިޔަ ޑިފެންސްގެ ބޭނުން ހިފައި، މަޔޯކާގެ ގޯލު ކާމިޔާބުކޮށްދިނީ ވެދަތު މުރީކީއެވެ. 

ދެ ޓީމުން ވެސް އެޓޭކިންގ ގޭމެއް ކުޅެމުން ދިޔަ މި މެޗުގައި ބާސެލޯނާއަށް ހަމަޖެހުމެއް ލިބުނީ، މަޔޯކާގެ ޕެނަލްޓީ އޭރިއާ ތެރެއަށް ޔަމާލް ވަތް ވަގުތު، އޭނާއަށް ފައުލް ކުރުމުން ލިބުނު ޕެނަލްޓީ ރަފީނިއާ ކާމިޔާބުކޮށް، މެޗުގެ 56 ވަނަ މިނެޓުގައި އަލުން އަނބުރާ ލީޑު ލިބުނު ހިސާބުންނެވެ. 

އެ ގޯލުގެ ފަހުން ވެސް، ބާސެލޯނާ ޖެހިލުންވާފަދަ ހަމަލާތަކެއް މަޔޯކާއިން އުފެއްދިއެވެ. ނަމަވެސް މެޗުގެ އޮއިވަރު ބާސެލޯނާގެ ކޮޅަށް އެނބުރުނީ، ޔަމާލް ބޭރުފައިން ގޯލު ކުރިމައްޗަށް ހުރަސްކޮށްލި ބޯޅައެއް، ރަފީނިއާ ގޯލުގެ ތެރެއަށް ފޮނުވާލައި އެ ޓީމުގެ ލީޑު 74 ވަނަ މިނެޓުގައި ފުޅާ ކުރުމުންނެވެ. 

އަދި ބާސެލޯނާގެ 4 ވަނަ ގޯލު އޭގެ 5 މިނެޓުފަހުން ވަނީ ކާމިޔާބުކޮށްފައެވެ. ފްރޭންކީ ޑީ ޔޮންގުގެ މި ގޯލަށްފަހު އޭގެ 5 މިނެޓު ފަހުން އަނެއްކާ ވެސް އެ ޓީމުގެ އިތުރު ގޯލެއް ކާމިޔާބު ކުރިއެވެ. މި ގޯލު ކާމިޔާބު ކޮށްދިނީ ފެރަން ޓޮރޭސްގެ ބަދަލުގައި ކުޅެން ނިކުތް ޕައު ވިކްޓަރއެވެ. 

މި ނަތީޖާއާއެކު 16 މެޗުން ލިބުނު 37 ޕޮއިންޓާއެކު ބާސެލޯނާ އޮތީ ލީގުގެ އެއްވަނައިގައެވެ. ދެވަނައިގައި އޮތް ރެއާލް މެޑްރިޑަށް 33 ޕޮއިންޓު ލިބިފައިވާއިރު، ބާސެލޯނާގެ މެޗުގެ އަދަދަށް އެ ޓީމުގެ މެޗުތައް ހަމަވާނީ އަދި 2 މެޗު ކުޅުމުންނެވެ.