“އޮޅުހިޔާ” ދިރޭތަކެެއްޗާ ބެހޭ ވުޒާރާގެ ދަށަށް ގެންދިޔުމަށް އަންގައިފި

މާލެ ސަރަހައްދުގައި މަގުމަތީގައި ގިނަވެފައިވާ ބުޅާތަކުގެ މައްސަލައަށް ހައްލެއް ގެނައުމަށް ގާއިމްކުރި "އޮޅުހިޔާ" ދަނޑުވެރިކަމާ ދިރޭތަކެއްޗާ ބެހޭ ވުޒާރާގެ ދަށަށް ގެންދިޔުމަށް މާލެ ސިޓީ ކައުންސިލަށް އަންގައިފިއެވެ. 

"އޮޅުހިޔާ" އަކީ ދިރޭތަކެެއްޗާ ބެހޭ ވުޒާރާގެ ބެލުމުގެ ދަށުން މާލެ ސިޓީ ކައުންސިލުން ހުޅުމާލޭގައި ބިނާކޮށްފައިވާ ތަނެކެވެ. "އޮޅުހިޔާ" ބިނާކޮށް ނިމި އެތަން ރަސްމީކޮށް ހުޅުވައިދެއްވައިފައިވަނީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، ނިމިދިޔަ ނޮވެންބަރު މަހުގެ 2ވަނަ ދުވަހުއެވެ.

"އޮޅުހިޔާ" ބިނާކޮށް ނިމުމުން މާލެ ސަރަހައްދުގެ މަގުތަކުގައި ގިނަވެފައިވާ ބުޅާތައް އެތަނަށް ގެންގޮސް އެތަން ހިންގުން ވަނީ މާލެ ސިޓީ ކައުންސިލާއި ހަވާލުކޮށްފައެވެ. އެކަމަށްޓަކައި ދިރޭތަކެއްޗާއި ބެހޭ ވުޒާރާއާއި މާލެ ސިޓީ ކައުންސިލާއި ދެމެދު އެއްބަސްވުމެއްވެސް ހެދިފައިވެއެވެ.

އެއެއްބަސްވުމުގައި "އޮޅުހިޔާ" އަށް މާލެ ސަރަހައްދުގައި ގިނަވެފައިވާ ބުޅާތައް ގެންދިއުމަށް ބަޔާންކޮށްފައިވެއެވެ. އަދި އެކަމަށްޓަކައި ޢަމަލުކުރާނެ  ޕްލޭނެއް ވެސް ވަނީ އެކުލަވައިލައިފައެވެ. 

މީގެ އިތުރުން "އޮޅުހިޔާ" ހިންގުމަށް މާލޭ ސިޓީ ކައުންސިލާ ހަވާލުކޮށްފައިވާ ޒިންމާތައް އެންމެ ފުރިހަމައަށް އަދާނުކުރާތީކަމަށް ބުނެ ދިރޭތަކެއްޗާއި ބެހޭ ވުޒާރާއިން ވަނީ މާލޭ ސިޓީ ކައުންސިލާ ބައްދަލުވެސް ކޮށްފައެވެ. އަދި މަސައްކަތްތައް ލަސްވަމުންދާ ކަންކަމާ ގުޅޭގޮތުންވެސް މަޝްވަރާކުރައްވާފައިވެއެވެ.

މާލެ ސިޓީ ކައުންސިލުން ވަނީ ބުޅާތައް "އޮޅުހިޔާ" އަށް ގެންދިޔުމަށް މަސައްކަތް ފެށުމަށް ނިންމާފައިވާކަމަށް އިޢުލާނު ކޮށްފައިވެއެވެ. 

އެހެންނަމަވެސް އިއްޔެ ދިރޭތަކެއްޗާއި ބެހޭ ވުޒާރާއިން ވަނީ މިކަމާ ގުޅިގެން ބަޔާނެއް ނެރެފައެވެ. އެބަޔާނުގައި "އޮޅުހިޔާ"އަށް ބުޅާތައް ގެންދިއުމުގައި ޢަމަލުކުރާނެ ގޮތުގެ އެސްއޯޕީތަކާއި ޕްލޭންތަކާއި ލަފާތައް އެ ވުޒާރާއިން މާލެ ސިޓީ ކައުންސިލާ ހިއްސާ ކޮށްފައިވީ ނަމަވެސް އެ ކަންކަމަށް މިހާތަނަށް އެއްވެސް ޚިޔާލެއް ލިބިފައި ނެތް ކަމަށް ބުނެފައިވެއެވެ.

 އަދި އެސްއޯޕީތަކަށް ޢަމަލުނުކޮށް، އެ ފެސިލިޓީއަށް ބުޅާތައް މިވަގުތު ގެންދަން ފަށައިފިނަމަ ބުޅާތަކުގެ ޞިއްޙަތަށާއި ދުޅަހެޔޮކަމަށް ނުރަނގަޅު އަސަރުކުރުން އެކަށީގެންވާކަމަށްވެސް އެވުޒާރާއިން ވަނީ ބުނެފައެެވެ.