ޚަބަރު
މިއަދު ލިބިގަންނަންވީ އެންމެ އަގުހުރި ފިލާވަޅަކީ ދޮންބާޑަރައިންގެ ރިވެތި އަޚްލާޤާއި މަތިވެރި ޖިހާދު: ރައީސް މުޢިއްޒު
ރައީސް ޑރ މުޙައްމަދު މުޢިއްޒު. ފޮޓޯ: ރައީސް އޮފީސް
މިއަދު ލިބިގަންނަންވީ އެންމެ އަގުހުރި ފިލާވަޅަކީ ދޮންބާޑަރައިންގެ ރިވެތި އަޚްލާޤާއި މަތިވެރި ޖިހާދު ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ މިއަދު ފާހަގަ ކުރެވެމުންދާ ހުރަވީ ދުވަހުގެ ތަހުނިޔާ ފޮނުއްވަމުންނެވެ.
ރައީސް ޑރ މުޢިއްޒުގެ ތަހުނިޔާގެ މެސެޖުގައި ވިދާޅުވެފައިވަނީ ހުރަވީ ދުވަހަކީ ޤައުމަށް އަމާނަތް ތެރިވުމާ ޤައުމަށް ޚިޔާނަތްތެރިވުމުގެ މިސާލުވެސް ފެންނަ ދުވަހެއް ކަމަށެވެ. ދުވަހުގެ ބަޠަލް ދޮންބާންޑާރައިންގެ މަތިވެރި ޖިހާދާއި ރިވެތި އަޚްލާޤަކީ މިއަދު ލިބިގަންނަންވި އެންމެ އަގުހުރި ފިލާވަޅު ކަމަށް ރައީސް ޑރ މުޢިއްޒު ވިދާޅުވެފައިވެއެވެ.
— Dr Mohamed Muizzu (@MMuizzu) December 4, 2024
ހުރަވީ ދުވަހަކީ ޖުމާދަލްއާޚިރާ މަހުގެ 3 ވަނަ ދުވަހެވެ. ރާއްޖޭގައި ފުރަތަމަ ފަހަރަށް ހުރަވީ ދުވަސް ފާހަގަ ކުރެވިފައިވަނީ ހިޖުރައިން 1400 ވަނަ އަހަރުގެ ޖުމާދަލްއާޚިރާ މަހުގެ 3 ވަނަ ދުވަހުއެވެ.
އެއީ މީލާދީން 18 އޭޕްރީލް 1980 ގައެވެ. 1166 ވަނަ އަހަރު ޖުމާދަލްއާޚިރާ މަހުގެ 3 ވީ އާދީއްތަ ވިލޭރެއަކީ ދޮންބަންޑާރައިން ހޮޅީންގެ ކިބައިން ރާއްޖެ ސަލާމަތް ކުރެއްވި ތާރީޚެވެ.
ހުރަވީ ދުވަހުގެ ގޮތުގައި މިދުވަސް ފާހަގަކުރަނީ ދިވެހި ޤައުމުގެ އެންމެހާ މުވާޠިނުން ޤައުމީ އަބްޠާލުންގެ ޒިކުރާ ޢަމަލީ ގޮތުން ދިރުވުމުގެ ހިތްވަރު ލިބިގަތުމަށާއި، އެބަޠަލުން ގެނެސްދެއްވި މިނިވަންކަމާއި، ޤައުމިއްޔަތު ދެމެހެއްޓުމުގެ ޢަޒުމާއި، ޖޯޝް ދިވެހި ހިތްތަކުގައި ދިރުވާ ދެމެހެއްޓުމުގެ ގޮތުންނެވެ.
ހުރަވީ ދުވަސް ނިޞްބަތްވާ ބަޠަލު ދޮންބަންޑާރައިންގެ ފުރިހަމަ ނަންފުޅަކީ އައްސުލްޠާނުލްޣާޒީ ޙަސަން ޢިއްޒުއްދީން (1ވަނަ) އެވެ.
