Ads by Exprox

ޚަބަރު

އެޗްޑީސީ އަށް ނުލިިބި ހުރި ފައިސާގެ ބައެއް ވަނީ މިހާރު ހޯދިފަ: ފަޟުލް

އެޗްޑީސީ އަށް ނުލިިބި ހުރި ފައިސާގެ ބައެއް ވަނީ މިހާރު ހޯދިފަ: ފަޟުލް

މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި އެޗްޑީސީގެ އިސްވެރިން ބައިވެރިވެވަޑައިގަންނަވަނީ.ފޮޓޯ: މަޖިލިސް

ޙަސްނާ އަޙްމަދް

ޙަސްނާ އަޙްމަދް

04 ޑިސެމްބަރު 2024، 06:45

04 ޑިސެމްބަރު 2024، 06:45

ހައުސިންގ ޑިވަލޮޕްމެންޓް ކޯޕަރޭޝަނަށް ނުލިބި ހުރި ފައިސާގެ ތެރެއިން ބައެއް މިހާރު ހޯދިދައިވާ ކަމަށް އެކޯޕަރޭޝަންގެ މެނޭޖިންގ ޑިރެކްޓަރ އިބްރާހިމް ފަޟުލް ރަޝީދު ވިދާޅުވެއްޖެއެވެ. 

އެޗްޑީސީގެ އެމްޑީ ފަޟުލް މިހެން ވިދާޅުވީ  މިއަދު ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި މެމްބަރުންގެ ސުވާލުތަކަށް ޖަވާބުދެއްވަމުންނެވެ. 

އެމްޑީ ފަޟުލް ވިދާޅުވީ ވިޔަފާރީގެ ބޭނުމަށް އެޗްޑީސީން ދޫކޮށްފައިވާ ފައިސާ ކަމަށްވާ 1.4 ބިލިޔަން ރުފިޔާގެ ތެރެއިން މިހާތަނަށް 226 މިލިޔަން ރުފިޔާ ހޯދާފައިވާކަމަށެވެ.

މާލިއްޔަތު ކޮމިޓީގައި ވާހަކަފުޅުދައްކަވަމުން ފަޟުލް ރަޝީދު ވިދާޅުވީ އައު މެނޭޖްމަންޓް ކުންފުންޏާ ހަވާލުވިއިރު އެކި ފަރާތްތަކަށް އެޗްޑީސީން ދޫކޮށްފައިވާ ބިމާއި އިމާރާތްތަކުން ޖުމްލަ 1.4 ބިލިޔަން ރުފިޔާ އެ ކުންފުންޏަށް ނުލިބި ހުރިކަމަށެވެ. މީގެ ތެރޭގައި ލީސްގެ ގޮތުގައި ނުލިބިހުރި 699 މިލިޔަން ރުފިޔާ އާއި ޑިވެލޮޕްމަންޓް އެންޑް ސޭލްސްގެ ގޮތުގައި ލިބެންޖެހޭ 720 މިލިޔަން ރުފިޔާ ވާ ކަން އޭނާ ފާހަގަކުރެއްވެވިއެވެ. 

ކުންފުނީގެ އެމްޑީގެ މަޤާމާއި ހަވާލުވެ ކުންފުންޏަށް ދިމާވެފައި އޮތް ދަރަނީގެ މި މައްސަލަ ހައްލު ކުރުމަށް ކުންފުނީގައި ރިކަވަރީ ކޮމިޓީއެއް އުފައްދާފައިވާ ކަމަށާއި، އެ ކޮމިޓީން ކުރެއްވި މަސައްކަތުން މިހާތަނަށް 226 މިލިޔަން ރުފިޔާ އަނބުރާ ހޯދިފައިވާކަމަށް ވިދާޅުވިއެވެ.

އެޗްޑީސީ އަށް ޖުމްލަ ގޮތެއްގައި އެކި މުއައްސަސާތައް ހިމެނޭހެން 14 ބިލިޔަން ރުފިޔާ ނުލިބިހުރި ކަމަށާއި، އެ ފައިސާ ހޯދަން މީގެ ކުރިން މަސައްކަތް ކޮށްފައިނުވާ ކަންވެސް އެމްޑީ ފަޟުލް ފާހަގަކުރެއްވެވިއެވެ.

ކުންފުންޏަށް ލިބެންޖެހޭ ފައިސާ ހޯދުމަށް އެކި ފަރާތްތަކާއެކުވެފައިވާ އެއްބަސްވުން ބާޠިލުކުރުމަށް ނިންމާފައިވާ ކަމަށާއި،  އޭގެ ކުރިން ފައިސާ ދެއްކުމަށް އަންގައި، ފައިސާ ދައްކައި ޚަލާސް ކުރަން ބޭނުންވާ ފަރާތްތަކަށް ވަކި މުއްދަތެއްގެ ތެރޭގައި ފައިސާ ދެއްކުމުގެ ފުރުސަތުވެސް ދެމުން އަންނަކަން އޭނާ ފާހަގަ ކުރެއްވެވިއެވެ. ހަމަމިއާއި އެކު ފައިސާ ނުދައްކާނަމަ އެފަރާތަކަށް ދީފައިވާ އިމާރާތް ނުވަތަ ބިން އަތުލުމަށް ކޯޓު މަރުހަލާއަށް ދިއުމަށްވެސް ނިންމާފައިވާކަމަށް ފަޟުލް ވިދާޅުވިއެވެ. 

މި ލިޔުން ކިޔާލުމުން

Ads by MSS