އޮލިމްޕިކް ސައިޒު ސްވިމިން ޕޫލް އެޅުމުގެ މަސައްކަތް އަންނަ އަހަރު ނިމޭނެ: ވަޒީރު އަބްދުﷲ ރާފިއު

އޮލިމްޕިކް ސައިޒު ސްވިމިން ޕޫލް އެޅުމުގެ އަމަލީ މަސައްކަތް މިހާރު ކުރިއަށްދާ ކަމަށާއި، މި މަސައްކަތް އަންނަ އަހަރުގެ ތެރޭގައި ނިންމާލެވޭނެ ކަމަށް އުންމީދުކުރައްވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު، އަބްދުﷲ ރާފިއު ވިދާޅުވެއްޖެއެވެ.

އެމްއެމްޓީވީއަށް މައުލޫމާތު ދެއްވަމުން ވަޒީރު ފާހަގަކުރެއްވި ގޮތުގައި، ކުރިން ހުއްޓިފައި އޮތް މި މަސައްކަތް އަލުން ފެށިގެން ދިޔުމަކީ ކުޅިވަރަށް މި ސަރުކާރުން ދެއްވާ އަހައްމިއްޔަތުކަން ދައްކުވައިދޭ ކަމެކެވެ. އަދި ބައިނަލްއަގުވާމީ ފެންވަރުގެ މުބާރާތްތައް ބޭއްވޭނެ ފެންވަރުގެ ސްވިމިން ޕޫލެއް އެޅުމަށް ކުރީގެ ދެ ސަރުކާރުން ވެސް މަސައްކަތްތަކެއް ކުރެއްވި ނަމަވެސް، އަމަލީ މަސައްކަތާ ހަމައަށް ވަޑައިނުގެން އެ މަސައްކަތްތައް މަޑުޖެހިފައިވަނިކޮށް، މިހާރުގެ ސަރުކާރުން ވަނީ އެންމެ އަހަރެއްގެ ތެރޭގައި ހުރިހާ ލިޔެކިޔުމެއްގެ މަސައްކަތް ނިންމައި،  އަމަލީ މަސައްކަތް ވެސް ފައްޓަވާފައި ކަމަށް ވަޒީރު ވިދާޅުވިއެވެ.

މި ސްވިމިން ކޮމްޕްލެކްސް ގާއިމުކުރުމަށް ހަމަޖެހިފައިވަނީ ކުރީގެ މާލޭ ކުނިގޮނޑު އޮތް ސަރަހައްދުގައެވެ. އެ މަޝްރޫޢުއަށް 50 މިލިއަން ރުފިޔާ ޚަރަދުވާނެ ކަމަށް ކުރީގެ ސަރުކާރުން ލަފާކުރައްވާފައިވާއިރު، އެ ބިން ވަނީ 50 އަހަރުގެ މުއްދަތަށް ސްވިމިން އެސޯސިއޭޝަނާ ހަވާލުކުރައްވާފައެވެ. މިހާރު އެ މަސައްކަތް ކުރިއަށްދަނީ ސްވިމިން އެސޯސިއޭޝަންގެ ބެލުމުގެ ދަށުންނެވެ.

މި ސްވިމިން ޕޫލް ނިމުމުން ރާއްޖޭގައި ބައިނަލްއަގުވާމީ ފެންވަރުގެ ފެތުމުގެ މުބާރާތްތައް ބޭއްވުމަށް މަގުފަހިވެގެންދާނެ ކަމަށް ބެލެވެއެވެ. އަދި ރާއްޖޭގެ ފެތުންތެރިންނަށް ވެސް ބައިނަލްއަގުވާމީ ފެންވަރުގެ ތަމްރީނުތައް ހޯދުމަށް ފަސޭހަވެގެންދާނެ ކަމަށް އުންމީދުކުރެވެއެވެ.