މާކުރަތު ބަނދަރު ބޮޑުކުރުމުގެ މަޝްރޫއުގެ 60 އިންސައްތަ މަސައްކަތް ނިމިއްޖެ

ރ. މާކުރަތު ބަނދަރު ބޮޑުކުރުމާއި ފުންކުރުމުގެ މަޝްރޫޢުގެ 60 މަސައްކަތް ނިމިފައިވާ ކަމަށް، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ވިދާޅުވެއްޖެއެވެ.

އެ ކުންފުނިން އެކްސްގައި ކުރެއްވި ޕޯސްޓެއްގައި ހާމަކޮށްފައިވާ ގޮތުގައި، މަޝްރޫއުގެ ދަށުން މިހާރު އެ ސަރަހައްދުގައި ކުރިއަށްދަނީ، ބޭރުތޮށި ޕްރޮފައިލް ކުރުމުގެ މަސައްކަތެވެ.

މި މަޝްރޫޢުގެ ދަށުން 45,024 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 140 މީޓަރުގެ ބޭރުތޮށި ލުމާއި، 129 މީޓަރުގެ އެއްގަމުތޮށި ލުމުގެ އިތުރުން 85 މީޓަރުގެ ސަރަޙައްދެއްގައި ރިވެޓްމަންޓް ޖެހުމުގެ މަސައްކަތް ވަނީ އެމްޓީސީސީއާ ހަވާލުކުރެވިފައެވެ. 

Project Update: Design and Build of R. Maakurathu Harbor Extension

Breakwater A profiling works are ongoing. Overall project progress is 60%.

Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/rwqJuAdQEj

— MTCC Plc (@MTCCPlc) August 18, 2026

މިއީ 26.67 މިލިއަން ރުފިޔާގެ މަޝްރޫއެކެވެ. މި މަޝްރޫއުގެ އެއްބަސްވުމުގައި ސޮއިކޮށްފައި ވަނީ ކުރީގެ ސަރުކާރުގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އާއި އެމްޓީސީސީއާއި ދެމެދުއެވެ. 

މިނިސްޓްރީގެ ފަރާތުން ސޮއިކުރެއްވީ އެމިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަޙްމަދު ޙަމީދެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ އޭރުގެ ސީއީއޯ އާދަމް އާޒިމެވެ. ދެ ފަރާތުގެ ދެމެދުގައި މި މަސައްކަތުގެ އެއްބަސްވުމުގައި ސޮއިކުރެވުނީ 2022 ޖެނުއަރީ 14 ގައެވެ. 

މި މަޝްރޫޢު ނިމިގެން ދިއުމާއެކު، މާކުރަތުގެ ރައްޔިތުންނަށް ކުރިމަތިވެފައިވާ ބަނދަރުގެ ޖާގައިގެ ދަތިކަމުގެ މައްސަލައަށް ދާއިމީ ޙައްލެއް ލިބިގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ ރާއްޖޭގެ އެކި ކަންކޮޅުތަކުގައި މިފަދަ ތަރައްޤީގެ ގިނަ މަޝްރޫޢުތަކެއް އެމްޓީސީސީ މެދުވެރިކޮށް ހިންގަމުންނެވެ.