ހިޔާ ފްލެޓް ތަކުގައި އަލަށް ހަރުކުރާ ލިފްޓު ތަކަށް 18 މިލިއަން ޑޮލަރު ޚަރަދު ވާނެ

ހިޔާ ފްލެޓް ތަކުގައި އަލަށް ހަރުކާރާ ލިފްޓު ތަކަށް 18 މިލިއަން ޑޮލަރު ޚަރަދުވާނެ ކަމަށް ހައުސިންގ ޑިވަލޮޕްމެންޓ ކޯޕަރޭޝަންގެ މެނޭޖިންގ ޑިރެކްޓަރ އިބްރާހިމް ފަޟުލް ރަޝީދު ވިދާޅުވެއްޖެއެވެ.

އެޗްޑީސީގެ އެމްޑީ މިހެން ވިދާޅުވީ މިއަދު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުވެ ވަޑައިގެން ދެއްކެވި ވާހަކަ ފުޅުގައެވެ. 

މާލިއްޔަތު ކޮމިޓީގައި ވާހަކަފުޅު ދައްކަވަމުން ފަޟުލް ރަޝީދު ވިދާޅުވީ ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓްތަކުގައި އަލަށް ހަރުކުރާ 32 ލިފްޓު ހަރުކުރުމަށް 18 މިލިއަން ޑޮލަރު ޚަރަދުވާނެ ކަމަށެވެ. އެއީ ދިވެހި ފައިސާއިން ބަލާނަަމަ 278 މިލިއަން ރުފިޔާއެވެ. 

ފަޟުލް ރަޝީދު އިތުރަށް ވިދާޅުވީ ލިފްޓް ހަރުކުރުމުގެ ޕްރޮޖްކެޓް މިހާރު ކުރިއަށް ގެންދާއިރު، ކޮންމެ ޓަވަރަކު ދެ ލިފްޓް ހަރުކުރަންޖެހޭ ކަމަށެވެ.

ލިފްޓު ހަރުކުރުމުގެ ޕްރޮޖެކްޓް މި އަހަރުގެ ފެބްރުއަރީ މަހު ހަވާލުކުރީ ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕް ކޯ ލިމިޓެޑާ އެވެ. ހިޔާ ޓަވަރުތަކުގައި އަލަށް ހަރުކުރާ ލިފްޓްތަކުގެ ތެރެއިން އެއް ލިފްޓަކީ ސްޓްރެޗާ އުފުލޭ ވަރުގެ ބޮޑު ލިފްޓެކެވެ. ދެން ހުރީ ގާތްގަނޑަކަށް 14 މީހުންގެ ކެޕޭސިޓީގެ ލިފްޓެކެވެ.

އެ މަސައްކަތް ކުރުމަށް މި އަހަރުގެ ބަޖެޓުގައި 200 މިލިއަން ރުފިޔާ ހިމެނި ނަމަވެސް ފަހުން އެ އަދަދު ވަނީ 100 މިލިއަން ރުފިޔާ އަށް ކުޑަކޮށްފަ އެވެ.

ހިޔާގެ ޓަވަރުތަކުގައި 50،000 އެއްހާ މީހުން މިހާރު އަންނަނީ ދިރިއުޅެމުންނެވެ. ޓަވަރުތަކުގައި ލިފްޓު މަދުވުމުން އަރާފޭބުމުގެ އުނދަގޫތައް ހުރުމުގެ ސަބަބުން ހިޔާ ޓަވަރު ތަކުގައި ދިރިއުޅޭ މީހުންގެ ޝަކުވާތައް އަންނަނީ އިވެމުންނެވެ.