ކަމަލް އަދްވަން ހޮސްޕިޓަލުގައި 100 އަށް ވުރެ ގިނަ މީހުން މަރުގެ ތުންފަތްމަތީގައި

ޣައްޒާގެ ކަމަލް އަދްވަން ހޮސްޕިޓަލުގައި 100 އަށްވުރެ ގިނަ މީހުން މަރުގެ ތުންފަތްމަތީގައި އެބަތިބި ކަމަށް އަލްޖަޒީރާގައި ރިޕޯޓު ކޮށްފިއެވެ.

ޣައްޒާގެ ޞިއްޙީ ވުޒާރާގެ ހޮސްޕިޓަލް ތަކާއި ބެހޭ ޑިރެކްޓަރ އަށް ހަވާލާދީ އަލްޖަޒީރާގައި ބުނެފައިވަނީ އިޒްރާއިލް ސިފައިން އިސްތިޢުމާރުކޮށްފައި އޮތް ސަރަހައްދުގައި ހުރި ކަމަލް އަދްވަން ހޮސްޕިޓަލުގެ އެތެރޭގައި މިހާރުތިބި 100 އަށްވުރެ ގިނަ ބަލިމީހުން މިހާރުވެސް ތިބީ މަރުގެ ތުންފަތްމަތީގައި ކަމަށެވެ.

އިޒްރާއިލް ސިފައިން މިހާރުވެސް ދަނީ ކަމަލް އަދްވަން ހޮސްޕިޓަލް އަށް ވަންނަ މީހުންނަށް އަމާޒުކޮށް ހަމަލާދީ އެތަނުން ދިޔުމަށް މަޖުބޫރުކުރަމުން ކަމަށް ވެސް އަލްޖަޒީރާގައި ބުނެފައިވެއެވެ.

މީގެއިތުުރުން އަލްއައުދާ ހޮސްޕިޓަލަށް ވަނުމަށް ބޭނުންކުރާ ދޮރު އިޒްރާއިލް ސިފައިން ބައްދާލައި ނުވެދެވޭނެހެން ހަދައިފައިވާ ކަމަށްވެސް އަލްޖަޒީރާގައި ބުނެފައިވެއެވެ.

މީގެއިތުރުން ހޮސްޕިޓަލްތަކަށް ދޫކުރާ އޮކްސިޖަން ލިބޭނެ މަގު އިޒްރާއިލުން ބަންދު ކުރުމަށް ކުރާ މަސައްކަތުން މުޅި ޣައްޒާގެ ޞިއްޙީ ނިޒާމަށް ވަނީ ބުރުއަރައިފައެވެ.

ކަމަލް އަދްވަން ހޮސްޕިޓަލަށް މިއަދު އިޒްރާއިލް ސިފައިން ދިން ޑްރޯން ހަމަލާތަކުގެ ސަބަބުން އަވަސްފަރުވާ ދިނުމަށް މަސައްކަތް ކުރާ ތިން މީހަކު ވަނީ ޒަޚަމްވެފައެވެ.

ހުއްޓާނުލާ އިޒްރާއިލުން ޣައްޒާއަށް ދެމުންދާ ހަމަލާތަކުގެ ސަބަބުން މިހާތަނަށް ފަލަސްޠީނުގެ 44،532 މީހަކު ވަނީ ޝަހީދުވެފައެވެ. މީގެއިތުރުން 105،538 މީހަކަށް ވަނީ އެކިވަރުގެ ޒަޚަމްތައް ލިބިފައެވެ.