ޚަބަރު
ރިފޯމް އެޖެންޑާގެ ދަށުން އޮކްޓޫބަރުގެ ނިޔަލަށް 228 ސިޔާސީ މުވައްޒަފަކު ވަކިކުރެވިފައިވޭ
ރައީސް އޮފީސް.
ސަރުކާރުގެ ރިފޯމް އެޖެންޑާގެ ދަށުން 31 އޮކްޓޫބަރުގެ ނިޔަލަށް 228 ސިޔާސީ މުވައްޒަފުން ވަކިކުރެވިފައިވާ ކަމަށް ރައީސް އޮފީހުން ހާމަކޮށްފިއެވެ.
ރައީސް އޮފީހުން މިކަން ހާމަކޮށްފައިވަނީ އަމިއްލަ ފަރާތަކުން މަޢުލޫމާތު ހޯދުމަށް އެދި ފޮނުވި ސުވާލަކަށް ޖަވާބުދެމުންނެވެ.
ރައީސް އޮފީހުން މއ.ސްނޯވައިޓް އަޙްމަދު އަފްރާޙް އިސްމާޢިލް ހުށައަޅައިފައިވާ ފޯމުގެ ޖަވާބުގައި ބުނެފައިވަނީ މިސަރުކާރުގެެ އިކޮނޮމިކް ރިފޯމް އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމަށް ޓަކައި ރައީސުލްޖުމްހޫރިއްޔާ ގެންދަވަނީ ފިޔަވަޅުތަކެއް އަޅުއްވަމުން ކަމަށެވެ.
އެފިޔަވަޅު ތަކުގެ ދަށުން ސަރުކާރުގެ އެކި ވުޒާރާތަކުގައި މަސައްކަތް ކުރައްވާ ސިޔާސީ މުވައްޒަފުން މަދުކުރެއްވުމަށް އެމަނިކުފާނު ނިންމަވައި 31 އޮކްޓޫބަރު 2024 ގެ ނިޔަލަށް 228 މުވައްޒަފަކު ވަޒީފާއިން ވަކިކޮށްފައިވާ ކަމަށެވެ.
މީގެއިތުިރުން ރައީސް އޮފީހުން ބުނެފައިވަނީ އަފްރާޙު ހޯދުމަށް އެދިވަޑައިގަތް މަޢުލޫމާތުގެ ތެރެއިން ސިޔާސީ މުވައްޒަފުންގެ ނަންތަކަކީ ޒާތީ މަޢުލޫމާތައް ވެފައި އެބޭފުޅުން މަސައްކަތް ކުރެއްވެވި ވުޒާރާތަކުގެ ނަންތައް ހާމަކޮށްފިނަމަ އެބޭފުޅުންގެ ޒާތީ މަޢުލޫމާތު ހާމަވެދާނެކަމަށް ޤަބޫލު ކުރެވޭތީ އެފަދަ މަޢުލޫމާތު ހާމަކުރުމަކީ މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ކުރެވޭނެ ކަމެއް ނޫންކަމަށެވެ.
އަދި އަފްރާޙް ހޯދަން އެދުނު މަޢުލޫމާތުތަކުގެ ތެރެއިން ވަކިކުރެވުނު މުއައްޒަފުންގެ މަޤާމުތަކުގެ ނަންތަކާއި ވަކިކުރެވުނު އަދަދުގެ ތަފްސީލާއި މުއައްޒަފުން ވަކިކުރުމުގެ ސަބަބުން ދައުލަތުގެ ބައިތުލްމާލުން ސަލާމަތްކުރެވޭނެ ޢަދަދަު ރައީސުލްޖުމްހޫރިއްޔާގެ އެކްސް ޕޯސްޓްތަކުން ފެންނާނޭ ކަމަށެވެ.
