ދުނިޔެ
އަހަރެމެންގެ ގުދަންތައް ހުރީ ހުސްވެފަ: ޣައްޒާގައި އިންސާނީ އެހީ ފޯރުކޮށްދޭ ޖަމިއްޔާތައް

ނުޞައިރަތްގައި ކާބޯތަކެތި ބަހަމުން ދިޔަ ތަނެއްގެ ކައިރީގައި ޖަނާޒާއެެއް ކުރިއަށްދަނީ.
ކާބޯތައްކެއްޗާއި އިންސާނީ އެހީގެ ގޮތުގައި ފޯރުކޮށްދޭ އެހެނިހެން ސާމާނު ރައްކާކޮށްފައި ހުރި ގުދަންތައް ހުސްވެފައިވާ ކަަމަށް ޣައްޒާގައި އިންްސާނީ އެހީ ފޯރުކޮށްދޭ ފަރާތްތަކުން ބުނެފިއެވެ.
ފަލަސްޠީނުގެ އެންޖީއޯސް ނެޓްވޯކްގެ ޑިރެކްޓަރު އަމްޖަދު ޝަވާ އަށް ހަވާލާދީ އަލްޖަޒީރާގައި ބުނެފައިވަނީ ޣައްޒާގެ ހާލަތު މިހާބޮޑަށް ގޯސްވަމުން އަންނަނީ ފިނިމޫސުން ކައިރިވަމުން އަންނައިރު އެހީގެ ޢަދަދު މަދުވަމުންދާތީ ކަމަށެވެ.
ފިނިމޫސުމުގެ ސަބަބުން ދިހަހާސް އާއިލާތަކަށް އެހީބޭނުންވާއިރު ކަންކަން ވަރަށް އުނދަގޫވެފައިވާކަމަށާއި އޭގެ ތެރެއިން ގިނަ އާއިލާތައް ދިރިއުޅެނީ ޣައްޒާގެ ގާތްގަނޑަކަށް 100،000 ޓެންޓުގައިކަމަށެވެ.
އަޅުގަނޑަކަށް މި ޓެންޓްތަކަކީ ހަގީގީ ޓެންޓްތަކެއް ކަމަށް ވެސް ސިފަ ނުކުރެވޭނެ. އެއީ ކުދިކުދި ޖާގަތައް ނިވާކޮށްފައިވާ ޕްލާސްޓިކާއި ފޮތިކޮޅުތަކެއް، އެޓެންޓުތަކުގައި، އުމުރުން ދުވަސްވީ މީހުންނާއި ކުޑަކުދިންނާއި ބަލިމީހުން ދިރިއުޅެނީ
އަމްޖަދު ވިދާޅުވެފައިވެއެވެ.
މިހާރުވެސް އެތައް ހާސް ޓެންޓްތަކެއް ފެންބޮޑުވެ ހަލާކުވެފައިވާ ކަމަށާއި، ބަނޑުހައިހޫނުކަމުގެ ސަބަބުން ބަލިކަށިވެފައިވާ މީހުންގެ ހަށިތައް ފިނިން ރައްކާތެރިކުރާނެ އެއްވެސް ގޮތެއް ނެތިފައިވާ ކަމަށް އޭނާ ވިދާޅުވެފައިވެެއެވެ.
އަދިވެސް ލަފާކުރެވެނީ ޣައްޒާގައި އިތުރު ކާރިސާތަކެއް ކުރިމަތިވާނެ ކަމަށް ކަމަށާއި، އެކާރިސާތަކުގެ އަސަރު ކުރިން ނުފެންނަ ޙާލަތައް ފެނިގެން ދާނެ ކަމަށެވެ. ޚާއްސަކޮށް މިކަމުގެ އަސަރު ކުޑަކުދިންނަށް ކުރާލެއް ބޮޑުވާނެ ކަމަށް އަމްޖަދު ވަނީ ވިދާޅުވެފައެވެ. އެކުދިންނަށްޓަކައި ކޮށްދެވޭނެ އެއްވެސް ކަމެއް ނެތް ކަމަށްވެސް އަމްޖަދު ވަނީ ވިދާޅުވެފައިވެއެވެ.
“އެންޖީއޯތަކާއި އެހީދޭ މަރުކަޒުތަކުގެ ގުދަންތައް އެހުރީ ހުސްވެފައި.” އަމްޖަދު ވިދާޅުވެފައިވެއެވެ.
މިއަދުވެސް ނުޞައިރަތް ކޭމްޕުގައި ކާބޯތަކެތި ބަހަމުންދިިޔަ ތަނަކަށް އިޒްރާއިލް ސިފައިން ދިން ހަމަލާތަކެއްގެ ސަބަބުން ފަސް މީހަކު ވަނީ ޝަހީދުވެފައެވެެ. އަދި އޭގެ ތެރޭގައި ހަތަރު ކުޑަކުއްޖަކުވެސް ހިމެނެއެވެެ.