ގްރޫޕްގެ އެންމެ ވަރުގަދަ ޓީމު ބަލިކޮށް މާފުށިން ދެވަނަ ބުރުގެ ޖާގައެއް ކަށަވަރުކޮށްފި

ނައިންޓީ ޕްލަސް ގޯލްޑް ކަޕްގެ ގްރޫޕް-ޑީއިން ދެވަނަ ބުރުގެ ފަހު ޖާގަ މާފުށިން ހޯދައިފިއެވެ. މާފުށިން މި ފުރުސަތު ހޯދީ، މި ގްރޫޕްގެ އެންމެ ވަރުގަދަ އަލިފުށި 1-0 އިން ބަލިކޮށްގެންނެވެ.

މި މެޗަށް މާފުއްޓާއި އަލިފުށި ނިކުތްއިރު، އަލިފުށީގެ އިތުރުން ނައިފަރު ވެސް އޮތީ ދެވަނަ ބުރުގެ ޖާގައެއް ޔަގީންކޮށްފައެވެ. އޭރު ހަމައެކަނި ޔަގީން ނުވެއޮތީ، މި ގްރޫޕުން ދެވަނަ ބުރަށް ދަތުރުކުރާނެ ތިން ވަނަ ޓީމެކެވެ. އެ ފުރުސަތު މާފުއްޓާއި ކެންދޫއަށްވެސް އޮތެވެ.

އަންގާރަ ދުވަހުގެރޭ ނައިފަރުން ކެންދޫ ބަލިކުރި ނަމަވެސް، 3 މެޗުން ލިބުނު އެއް ޕޮއިންޓާއެކު ކެންދޫއަށް ގްރޫޕް-ޑީގެ ދެވަނަ ބުރުގެ ޖާގައެއް ލިބުމުގެ ފުރުސަތު އޮތެވެ. ނަމަވެސް އެހެން ވާން އޮތް ހަމައެކަނި ގޮތަކީ، މާފުއްޓާއި އަލިފުށި ބައްދަލުކުރި މެޗު އަލިފުށިން 5 ގޯލުގެ ތަފާތަކުން ކާމިޔާބު ކުރުމެވެ. އޭރުން އެންމެ ޕޮއިންޓަކާއެކު ދެވަނަ ބުރަށް ދާ ހަމައެކަނި ޓީމަކަށް ކެންދޫ ވީހެވެ. 

ނަމަވެސް ކެންދޫއިން އުއްމީދުކުރި ގޮތާ ހިލާފަށް، އަލިފުށިން މާފުއްޓާއި ދެކޮޅަށް ކުޅުނީ މާ ހަމަޖެހިލައިގެންނެވެ. ކުރިން ދެ މެޗުގައި ދެއްކި ކުޅުން ކުޅެން އުޅޭ ތަނެއް ނުފެނުނެވެ. 

މެޗުގެ ހަމައެކަނި ގޯލު ފެނިގެން ގޮސްފައިވަނީ ދެވަނަ ހާފުގައެވެ. ދެވަނަ ހާފު ފަށައިގެން ދެވަނަ މިނެޓުގެ ތެރޭގައި މާފުށިން މި ގޯލު ކާމިޔާބުކުރީ، އަލިފުށި ޓީމުގެ ކީޕަރަށް ހެދުނު ގޯހެއްގެ ފައިދާ ނަގައިގެންނެވެ. މާފުއްޓަށް މި ގޯލު ކާމިޔާބުކޮށްދިނީ އިބްރާހިމް އަތީގު ދިން ބޯޅައަކުން އިސްމާއިލް ނަޒީހުއެވެ.

އޭގެ ފަހުން މެޗުގެ ނަތީޖާ ހަމަހަމަ ކުރުމަށް އަލިފުށިން ރަގަޅު ހަމަލާތަކެއް އުފެއްދިއެވެ. ނަމަވެސް އެ ޓީމަށް ގޯލެއް ކާމިޔާބު ކުރެވޭ ގޮތް ނުވީއެވެ. 

ގްރޫޕް ފޭސް-1ގެ ގްރޫޕް-ޑީ އިން ތިން ވަނަ ޓީމުގެ ގޮތުގައި މާފުށިން ދެވަނަ ބުރުގެ ޖާގަ ހޯދިއިރު، ގްރޫޕް ފޭސް-2ގައި މާފުއްޓާއި އެއް ގްރޫޕެއްގައި އޭދަފުށި ހިމެނެއެވެ. އެ ގްރޫޕްގައި ދެން ހިމެނޭ ޓީމެއް އަދި ޔަގީނެއް ނުވެއެވެ.