ހައިބްރިޑް ހަނގުރާމައިން ދަފަރާވުމަށް ޒުވާނުން ތައްޔާރުވުމަށް ރައީސުލްޖުމްހޫރިއްޔާގެ ނައިބު ގޮވާލައްވައިފި

މިއަދުގެ ދުނިޔޭގައި ހައިބްރިޑް ހަތިޔާރާއި ކައްޗަރީ ވިސްނުން ބޭނުންކޮށްގެން ކުރެވޭ ހަނގުރާމަތަކުން ދަފަރާވުމަށް ޒުވާނުން ތައްޔާރުވުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފު ގޮވާލައްވައިފިއެވެ.

 ރޭ އިސްލާމީ މަރުކަޒުގެ ޖަލްސާ ކުރާ މާލަމުގައި ބޭއްވުނު މިއަހަރުގެ ހުރަވީ ދުވަހުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ވިދާޅުވީ، މި ޒަމާނުގެ ގޮންޖެހުންތަކާ ކުރިމަތިލުމަށް ވަރުގަދަ ޢަޒުމަކާއި ހިތްވަރާއެކު، ކަމުގެ ޢިލްމާއި ހުނަރު ދަސްކުރުމަށް ޒުވާނުން މަސައްކަތްކުރަންޖެހޭ ކަމަށެވެ.

ރައީސުލްޖުމްހޫރިއްޔާގެ ނައިބު އިތުރަށް ވިދާޅުވީ، ކައްޗަރީ ހަނގުރާމައިގެ ނުފޫޒުތަކަކީ ޤައުމުގެ އިޖުތިމާޢީ ބިންގަލަށް ދާއިމީ ގެއްލުން ލިބޭނެ ކަމެއް ކަމަށާއި، މީގެ ސަބަބުން އިޖުތިމާޢީ އެއްބައިވަންތަކަމާއި ޢިޤްތިޞާދީ ހަމަޖެހުމަށް އަސަރުކޮށް، ދޮގު މަޢުލޫމާތު ފެތުރިގެންދާނެ ކަމަށެވެ.

ސައިބަރ ސަލާމަތާއި ރައްކާތެރިކަމުގެ މުހިންމުކަން ފާހަގަކުރައްވަމުން، ރައީސުލްޖުމްހޫރިއްޔާގެ ނައިބު ވިދާޅުވީ ސަރުކާރުން މިހާރުވެސް ކަމާބެހޭ ފަރާތްތަކުގެ އެހީގައި ސައިބަރ ސަލާމަތީ ފިޔަވަޅުތައް ހަރުދަނާކުރަމުންދާ ކަމަށެވެ. އަދި ހައިބްރިޑް ހަނގުރާމައިން ދަފަރާވުމަށް ސައިބަރ ރައްކާތެރިކަމުގެ ތަމްރީނުތައް ދިނުމާއި، ދޮގު މަޢުލޫމާތާ ދެކޮޅަށް މަސައްކަތްކުރުމުގެ މުހިންމުކަން އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ލީޑަރޝިޕްގެ ދަށުން ޤައުމީ މަސްލަހަތަށްޓަކައި ކުރެވެމުންދާ މަސައްކަތްތަކާއި، ދިވެހި އަސްކަރީ ބާރު ވަރުގަދަކުރުމަށް ކުރެވޭ މަސައްކަތްތައްވެސް ރައީސުލްޖުމްހޫރިއްޔާގެ ނައިބު ފާހަގަކުރެއްވިއެވެ.

ރަސްމިއްޔާތު ނިންމަވާލައްވަމުން ރައީސުލްޖުމްހޫރިއްޔާގެ ނައިބު ވަނީ ޤައުމަށް ޓަކައި ޤުރުބާންވި ޤައުމީ ބަޠަލުންނަށް ހެޔޮ ރަޙުމަތްލެއްވުމަށާއި، ދިވެހި ޤައުމަށް ނަޞްރާއި ފަތަޙަ މިންވަރުކުރެއްވުމަށް އެދި ދުޢާ ދަންނަވާފައެވެ.