އެއްވަރުކުރަން ލިބުނު ޕެނަލްޓީ އެމްބައްޕޭ އަތުން ބޭކާރުވެ، މެޑްރިޑަށް މުހިންމު ޕޮއިންޓުތަކެއް ގެއްލިއްޖެ

ޗެމްޕިއަންސް ލީގުގައި ލިވަޕޫލްއާ ދެކޮޅަށް ކުޅުނު މެޗުގެ ނަތީޖާ ހަމަހަމަ ކުރުމަށް ލިބުނު ޕެނަލްޓީ، މި ސީޒަނުގައި ރެއާލް މެޑްރިޑަށް ބަދަލުވި ފްރާންސްގެ ތަރި ކީލިއަން އެމްބައެއްޕޭ އަތުން ބޭކާރުވިތާ 7 ދުވަސް ފަހުން، ސްޕެނިޝް ލީގުގައި އެތުލެޓިކް ބިލްބާއޯއާއި އެއްވަރު ކުރުމަށް ލިބުނު ޕެނަލްޓީ ވެސް އޭނާ އަތުން ބޭކާރުވެ، މެޑްރިޑަށް މުހިންމު 3 ޕޮއިންޓު ގެއްލިއްޖެއެވެ. 

މި މެޗުގައި ބިލްބާއޯ އަތުން 2-1 އިން މެޑްރިޑު ބަލިވުމުން، އަންގާރަ ދުވަހުގެރޭ މަޔޯކާ ބަލިކޮށް 3 ޕޮއިންޓު ހޯދި ބާސެލޯނާއާ އޮތް ފަރަގު ކުޑަކުރެވޭ ގޮތް މިވަނީ ނުވެފައެވެ. ބާސެލޯނާ މިހާރު އޮތީ މެޑްރިޑަށް ވުރެން އެއް މެޗު އިތުރަށް ކުޅެ 4 ޕޮއިންޓުގެ ލީޑެއްގައެވެ.

ބިލްބައޯއާ ދެކޮޅަށް ކުޅުނު މެޗު މެޑްރިޑުން ފެށީ ވެސް ފަހަތު ފަޔަށް ބުރަވެ އޮވެއެވެ. މެޗުގެ ފުރަތަމަ ހާފުގައި ގޯލު ޖެހުމަށް ގިނަ ފުރުސަތުތަކެއް ބިލްބާއޯއިން ތަނަވަސްކޮށްފައި ވާއިރު، މެޑްރިޑަށް ވަނީ މާ އެދެވޭ ކުޅުމެއް ދެއްކޭ ގޮތް ނުވެފައެވެ. 

ބިލްބާއޯގެ ސެން މޭމްސް ބެރިއާގައި ކުޅުނު މި މެޗުގައި އެ ޓީމުން ލީޑު ނެގީ ދެވަނަ ހާފުގެ ކުރީކޮޅުއެވެ. އެ ޓީމުގެ ވާތް ފަރާތްތުން އަރިމައްޗަށް ކުޅޭ ނިކޯ ވިލިއަމްސް ގޯލު ކުރިމައްޗަށް ހުރަސްކޮށްލި ބޯޅަ މެޑްރިޑުގެ ގޯލު ކުރިމައްޗަށް ބައުންސްވުމުން، އެ ޓީމުގެ ގޯލްކީޕަރ ތިއާބަތު ކޯޓްވާއަށް އެ ބޯޅަ ސަލާމަތް ކުރަން އުނދަގޫވެފައި ވަނިކޮށް، ބިލްބާއޯގެ ފޯވާޑް އެލެކްސް ބެރިންގޭ ބޯޅަ ގޯލަށް ފޮނުވާލީ މަޑު މަޑުން ޖައްސާލުމަށް ފަހުއެވެ. 

އޭގެ 15 މިނެޓު ފަހުން މެޗުގެ ނަތީޖާ ހަމަހަމަ ކުރުމަށް ލިބުނު ޕެނަލްޓީ އެމްބައްޕޭ ގޯލުގެ ވާތްފަރާތުގެ ކަނަށް ފޮނުވާލަން މަސައްކަތް ކުރުމުން، ބިލްބާއޯގެ ގޯލްކީޕަރު ހޫލެން އެގިރިޒެބާލާ ވަނީ ގޯލު ދިފާއުކޮށްފައެވެ. ނަމަވެސް މެޗު ނިމެން 12 މިނެޓަށް ވެފައި ވަނިކޮށް، ބިލްބާއޯގެ ޑިފެންސް ލައިނަށް ހެދުނު ގޯހެއްގެ ބޭނުން ހިފައި، ޖޫޑް ބެލިންގްހަމް ވަނީ މެޗުގެ ނަތީޖާ ހަމަހަމަ ކޮށްދީފައެވެ.

މި ގޯލަށްފަހު ލީޑު ނެގުމަށް މެޑްރިޑަށް އިތުރު މަސައްކަތެއް ނުކުރެވެނީސް އޭގެ ދެ މިނެޓު ފަހުން، އެ ޓީމުގެ ފެޑެރިކޯ ވަލްވާރޑޭ ކީޕަރަށް ބޯޅަ ޖައްސާލަން އުޅުމުގެ ތެރޭގައި ބިލްބާއޯގެ ގުރުޒެޓާ ވަނީ އެ ބޯޅަ ހޯދައި، ގޯލުގެ ތެރެއަށް ފޮނުވާލައިގެން ބިލްބާއޯއަށް މެޗު ކާމިޔާބުކޮށްދީފައެވެ.