މަތީ ތައުލީމުގެ ކޯސްތަކުން ފާސްވުމަށް އެސެސްމަންޓްތަކުން % 50 ފާސްވާންޖެހޭ ގޮތަށް ހަމަޖައްސައިފި

މަތީ ތައުލީމު ދޭ މަރުކަޒުތަކުން ހިންގާ ކޯސްތަކުން ފާސްވުމަށްޓަކައި ކޮންޓްރޯލްޑް އެސެސްމަންޓްތަކުން % 50 ފާސްވާން ޖެހޭ ގޮތަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ހަމަޖައްސައިފިއެވެ. މި ބަދަލު ގެނެސްފައިވަނީ "ގައިޑްލައިންސް ފޯ ޕްރޮގްރާމް އެކްރެޑިޓޭޝަން" ގެ އުޞޫލަށް އިސްލާޙު ގެނައުމާ ގުޅިގެންނެވެ.

އެމްކިއުއޭ އިން މިފަދަ ނިންމުމެއް ނިންމާފައިވަނީ މަތީ ތައުލީމު ދޭ މަރުކަޒުތަކުން ހިންގާ ކޯސްތަކުގައި ހަދަން ޖެހޭ އެސެސްމަންޓްތައް އެހެން މީހުން ލައްވައި ހެދުމާއި ގަނެ ވިއްކުމުގެ މައްސަލަ އިތުރުވަމުން ދިއުމާ ގުޅިގެންނެވެ. މި ބަދަލާ އެކު، ކޯސްތަކުން ފާސްވުމަށްޓަކައި ކޮންޓްރޯލްޑް އެސެސްމަންޓްތަކުން % 50 ފާސްވާން ޖެހޭނެއެވެ.

އިޞްލާޙު ގެނެވުނު އުޞޫލުގައި، ކުރިން ހުއްދަ ދެވިފައިވާ ކޯސްތަކަށްވެސް އަމަލުކުރަންޖެހޭ އައު ގަވާއިދުތަކެއް ހިމެނިފައިވެއެވެ. މީގެ ތެރޭގައި:

• ކޮންމެ މޮޑިއުލެއް ނުވަތަ ޔުނިޓަކަށް އެސެސްމަންޓް މިންގަނޑުތައް ސާފުކޮށް ބަޔާންކުރުން
  
• ދަރިވަރުގެ ގާބިލުކަން ވަޒަންކުރެވޭނެ މަދުވެގެން އެއް އަމިއްލަ މަސައްކަތް ހިމެނުން
  
• މާސްޓާޒް ކޯސްތަކުގެ ރިސާޗް ފިޔަވައި ހުރިހާ ކޯހެއްގައި މަދުވެގެން % 50 ސުޕަވައިޒްކޮށް، ވަގުތު ކަނޑައަޅައި، ކޮންޓްރޯލްކުރެވޭ އެސެސްމަންޓް ހާލަތްތައް ހިމެނުން
  
• އެސެސްމަންޓުގެ  %50 އަކީ އެއްވެސް މީހެއްގެ އެހީތެރިކަމެއް ނެތި ހަދާ އެއްޗަކަށްވުން

މީގެއިތުރުން، އެއްވެސް މޮޑިއުލަކުން ހުރިހާ އެސެސްމަންޓެއް ގޭގައި ހެދުމުގެ ފުރުސަތު ދީގެން ނުވާނެކަމަށްވެސް އުޞޫލުގައި ބަޔާންކޮށްފައިވެއެވެ.

މަތީ ތައުލީމުގެ ގާނޫނު (2021) ގައިވާ ގޮތުން، ދަރިވަރަކު އަމިއްލައަށް ފުރިހަމަކުރަންޖެހޭ މަސައްކަތެއް އެހެން މީހަކު ލައްވައި ކުރުވައިފިނަމަ 5,000 ރުފިޔާއިން އެ ދަރިވަރަކު ޖޫރިމަނާ ކުރެވޭނެއެވެ. އަދި އެފަދަ މަސައްކަތްތައް ކޮށްދޭ މީހުން 10,000 ރުފިޔާއިން ޖޫރިމަނާ ކުރެވޭނެއެވެ.