ކުޅިވަރު

ޑި ބްރޫނޭ އެނބުރި އައިސް މެންޗެސްޓަރ ސިޓީ މޮޅުކޮށްދީފި

ޑި ބްރޫނޭ އެނބުރި އައިސް މެންޗެސްޓަރ ސިޓީ މޮޅުކޮށްދީފި

ގޯލު ކާމިޔާބު ކުރުމަށްފަހު ޑި ބްރޫނޭ--- ފޮޓޯ: ޕްރިމިއަރ ލީގު

މިފްތާޙް މުޙައްމަދު

މިފްތާޙް މުޙައްމަދު

05 ޑިސެމްބަރު 2024، 10:57

05 ޑިސެމްބަރު 2024، 10:57

ހުލާސާ

ޕްރިމިއަރ ލީގުގައި އެންމެ ފަހުން މެޗަކުން މޮޅުވިތާ 39 ދުވަސް ފަހުން، 3-0 އިން ނޮޓިންހަމް ފޮރެސްޓު ބަލިކޮށް މެންޗެސްޓަރ ސިޓީ ބަލިވަމުން އައި ސިލްސިލާ ނިމުމަކަށް ގެނަސްފި.

މި ނަތީޖާއާއެކު، އެ ޓީމުން މިވަނީ ލީގުގެ އެއްވަނައިގައި އޮތް ލިވަޕޫލާއި އޮތް ފަރަގު 9 ޕޮއިންޓަށް ކުޑަކޮށްފައި.

ޕްރިމިއަރ ލީގުގައި އެންމެ ފަހުން މެޗަކުން މޮޅުވިތާ 39 ދުވަސް ފަހުން، 3-0 އިން ނޮޓިންހަމް ފޮރެސްޓު ބަލިކޮށް މެންޗެސްޓަރ ސިޓީ ބަލިވަމުން އައި ސިލްސިލާ ނިމުމަކަށް ގެނަސްފިއެވެ. މި މެޗުގެ ތަރިއަކީ، އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާއި ދުރުގައި ހުރުމަށްފަހު އެނބުރި އައި ސިޓީގެ ތަރި ކެވިން ޑި ބްރޫނޭއެވެ.

ސިޓީއަށް މެޗަކުން މޮޅު ނުވެވި މަހަކަށް ވުރެން ގިނަ ދުވަސް ހޭދަވެފައިވާއިރު، މި މުއްދަތުގައި އެ ޓީމުން 7 މެޗު ކުޅެފައިވެއެވެ. 

ސިޓީގެ ކޯޗު، ޕެޕް ގާޑިއޯލާގެ ކޯޗިންގ ކެރިއަރުގައި މުޅިން އަލަށް ޖެހިޖެހިގެން 4 މެޗުން ބަލިވުމަށްފަހު، މި މެޗަށް އެ ޓީމުން ނިކުތީ، ލިވަޕޫލާ ދެކޮޅަށް ކުޅުނު ޓީމަށް 4 ބަދަލު ގެނަސްގެނެވެ. އެގޮތުން މި މެޗުގައި ޑި ބްރޫނޭ، ޖެކް ގްރިއަލިޝް، ޖެރެމީ ޑޮކޫ އަދި ޖޮސްކޯ ވާޑިއޯލްވަނީ ޓީމުގެ ފުރަތަމަ 11 ގައި ހިމެނިގެން ކުޅެން ނިކުމެފައެވެ.

މި މެޗުގައި ސިޓީއިން ލީޑު ނެގީ ވަރަށް ކުރީކޮޅުއެވެ. މެޗުގެ 8 ވަނަ މިނެޓުގައި މި ގޯލު ކާމިޔާބުކޮށްދިނީ ބަނާޑޯ ސިލްވާއެވެ. މިއީ ސީޒަން ހުޅުވަން ކުޅުނު މެޗުގައި އޭނާ ކާމިޔާބުކުރި ގޯލަށްފަހު، ލީގުގައި އޭނާ ކާމިޔާބުކުރި ފުރަތަމަ ގޯލެވެ.

މުޅި މެޗުގައި ވެސް ސިޓީއިން ރަގަޅު ކުޅުމެއް ދައްކާފައިވާއިރު، ފޮރެސްޓުގެ އެންމެ ނުރައްކާތެރި ހަމަލާ އުފެއްދީ ޑި ބްރޫނޭއަށް ހެދުނު ގޯހަކުންނެވެ. އޭނާ ޓީމުގެ ގޯލްކީޕަރަށް ކުޅެލަން މަސައްކަތްކުރި ބޯޅަ ހޯދައި ފޮރެސްޓުގެ ފޯވާޑު، ކްރިސް ވުޑްސް ވަނީ ސިޓީގެ ގޯލަށް ރަގަޅު ހަމަލާއެއް ފޮނުވާލާފައެވެ. ވުޑްއަށް މި ފުރުސަތު ގޯލަކަށް ބަދަލު ނުކުރެވުނީ ހަމަކިރިޔާއެވެ. ސިޓީގެ ޕެނަލްޓީ އޭރިއާގެ ރޮނގު މަތިން އޭނާ ފޮނުވާލި ބޯޅަ ދިޔައީ ގޯލަށް އަމާޒުނުވެއެވެ. 

އޭގެ މާގިނައިރުތަކެއް ނުވަނީސް، ޑި ބްރޫނޭ ވަނީ ގޯލެއް ޖަހައި، އޭނާއަށް ހެދުނު ގޯހުގެ އަގު އަދާކޮށްދީފައެވެ. މެޗުގެ 31 ވަނަ މިނެޓުގައި ޑޮކޫ ދިން ޕާހަކުން ފޮރެސްޓުގެ އޭރިއާގެ ތެރޭގައި ހުރެފައި އޭނާ ބޯޅަ ފޮނުވާލީ ގޯލުގެ މަތީ ކަނަށެވެ.

ޑި ބްރޫނޭއަށް އެސިސްޓު ކޮށްދިނުމަށްފަހު ސިޓީގެ 3 ވަނަ ގޯލު ކާމިޔާބުކޮށްދިނީ ޑޮކޫއެވެ. މިއީ ހާފުގެ މެދުތެރެއިން ބޯޅަ ހިފައިގެން ގޮސް ފޮރެސްޓުގެ ޕެނަލްޓީ އޭރިއާގެ ތެރެއަށް ގޯލުގެ ވާތް ފަރާތުން ވަނުމަށްފަހު، ގޯލުގެ ދުރުކަނަށް ބޯޅަ ފޮނުވާލައިގެން ކާމިޔާބު ކުރި ގޯލެކެވެ.

މި ނަތީޖާއާއެކު، އެ ޓީމުން މިވަނީ ލީގުގެ އެއްވަނައިގައި އޮތް ލިވަޕޫލާއި އޮތް ފަރަގު 9 ޕޮއިންޓަށް ކުޑަކޮށްފައެވެ. 

މި ލިޔުން ކިޔާލުމުން

Ads by MSS