ޓެލެގްރާމް އެޕް ކުޑަކުދިންގެ ޙައްޤުތައް ޙިމާޔަތްކުރުމަށް އިންޓަނެޓް ވޮޗް ފައުންޑޭޝަނާ ގުޅިއްޖެ

ކުޑަކުދިންގެ ޙައްޤުތައް ޙިމާޔަތްކުރުމަށް އެކި ފަރާތްތަކުން އެތައް އަހަރެއް ވަންދެން އެދެމުން އައި ނަމަވެސް، އެކަމަށް އިޖާބަ ނުދީ ތިބުމަށްފަހު، މަޝްހޫރު މެސެޖިންގ އެޕް ޓެލެގްރާމުން ވަނީ ކުޑަކުދިންނަށް ޖިންސީ ގޯނާކުރުމުގެ މައްސަލަތައް ހުއްޓުވުމަށް މަސައްކަތްކުރާ ބައިނަލްއަޤްވާމީ ޖަމްޢިއްޔާއެއް ކަމަށްވާ އިންޓަނެޓް ވޮޗް ފައުންޑޭޝަން (އައިޑަބްލިއުއެފް) އާ ގުޅުމަށް އެއްބަސްވެފައެވެ.

މި ނިންމުމަކީ ޓެލެގްރާމްގެ ފަރާތުން އައި ބޮޑު ބަދަލެކެވެ. މީގެ ކުރިން ޓެލެގްރާމުން ވަނީ އައިޑަބްލިއުއެފް އާއި މިފަދަ އެހެން ޖަމްޢިއްޔާތަކާ ގުޅުމަށް ދެކޮޅުހަދާފައެވެ. ނަމަވެސް، މިދިޔަ އޮގަސްޓް މަހު ޓެލެގްރާމްގެ ބާނީ ޕަވެލް ޑުރޮވް ޕެރިސްގައި ހައްޔަރުކުރެވުނު ހާދިސާއާ ގުޅިގެން، ޓެލެގްރާމުން ވަނީ މި ނިންމުން ނިންމާފައެވެ.

ޓެލެގްރާމްގެ މި ނިންމުމަކީ "ބޮޑު ބަދަލެއް" ގެނެސްދޭނެ ކަމެއް ކަމަށް އައިޑަބްލިއުއެފްގެ ވަގުތީ ސީއީއޯ ޑެރެކް ރޭ-ހިލް ވަނީ ބުނެފައެވެ. އޭނާ ވިދާޅުވި ގޮތުގައި މިއީ ޓެލެގްރާމަށް "ދިގު ދަތުރެއްގެ ފުރަތަމަ ފިޔަވަޅު" އެވެ.

ދުނިޔޭގެ 950 މިލިއަނެއްހާ މީހުން ބޭނުންކުރާ ޓެލެގްރާމަކީ ކުރިން އޭގެ ބޭނުންކުރާ ފަރާތްތަކުގެ ޕްރައިވަސީއަށް އިސްކަންދޭ އެޕެއްގެ ގޮތުގައި މަޝްހޫރުވެފައިވާ އެޕެކެވެ. ނަމަވެސް، ބީބީސީ އާއި އެހެނިހެން ނޫސްތަކުން ހާމަކޮށްފައިވާ ގޮތުގައި ޓެލެގްރާމް މެދުވެރިކޮށް މަސްތުވާތަކެތި ވިއްކުމާއި، ސައިބަރ ކްރައިމް އަދި ފްރޯޑްގެ ޚިދުމަތްތައް ދިނުމާއި، އަދި އެންމެ ފަހުން ކުޑަކުދިންނަށް ޖިންސީ ގޯނާކުރުމުގެ މައްސަލަތައް ހިންގާކަން ވަނީ ފާހަގަކުރެވިފައެވެ.

ޓެލެގްރާމްގެ ބިލިއަނަރު ވެރިޔާ ޕަވެލް ޑުރޮވް ހައްޔަރުކުރެވުނީ ޕެރިސްގެ އުތުރުގައި ހުންނަ ވައިގެ ބަނދަރެއްގައެވެ. އޭނާއާ ދެކޮޅަށް ކުށް ސާބިތުވެއްޖެނަމަ، މަސްތުވާތަކެތި ޓްރެފިކްކުރުމާއި، ކުޑަކުދިންނަށް ޖިންސީ ގޯނާކުރުމާއި، އަދި ފްރޯޑްގެ މައްސަލަތަކުގައި ޤާނޫނު ތަންފީޒުކުރާ ފަރާތްތަކާ އެއްބާރުލުން ނުދިނުމުގެ ކުށް ސާބިތުކުރެވެއެވެ.

މި ހާދިސާއާ ގުޅިގެން ޓެލެގްރާމުން ވަނީ އެތައް ބަދަލުތަކެއް ގެނެސްފައެވެ. މީގެ ތެރޭގައި އެޕްގެ ޤަވާޢިދާ ޚިލާފުވާ ފަރާތްތަކުގެ އައިޕީ އެޑްރެސްތަކާއި ފޯނު ނަންބަރުތައް ޤާނޫނީ ގޮތުން އޮންނަ ހުއްދައާއިއެކު ފުލުހުންނާ ހިއްސާކުރުމާއި، "ޕީޕަލް ނިއަރބައި" ނުވަތަ ކައިރީގައި ވާ މީހުން ފަދަ ފީޗަރތައް ނިއްވާލުން، އަދި ކޮންޓެންޓް ނައްތާލުމާ ގުޅޭ ޓްރާންސްޕޭރަންސީ ރިޕޯޓުތައް ޝާއިޢުކުރުން ހިމެނެއެވެ.

އައިޑަބްލިއުއެފްއަކީ ދުނިޔޭގައި ކުޑަކުދިންނަށް ޖިންސީ ގޯނާކުރުމާ ގުޅޭ ކޮންޓެންޓް ހޯދައި ނައްތާލުމުގެ ޤާނޫނީ ހުއްދަ ލިބިފައިވާ މަދު ޖަމްޢިއްޔާތަކުގެ ތެރެއިން އެއް ޖަމްޢިއްޔާއެވެ. މި ޖަމްޢިއްޔާއިން ތައްޔާރުކުރާ، އަބަދުމެ އަޕްޑޭޓްވަމުންދާ ލިސްޓެއް ބޭނުންކޮށްގެން ވެބްސައިޓްތަކުގެ މިފަދަ ކޮންޓެންޓް ބްލޮކް ކުރެއެވެ.